൩൯൫. പാരാവതജാതകം (൬-൨-൧൦)

൧൩൪. ചിരസ്സം വത പസ്സാമി, സഹായം മണിധാരിനം;

സുകതാ [സുകതായ (സീ. പീ.)] മസ്സുകുത്തിയാ, സോഭതേ വത മേ സഖാ.

൧൩൫. പരൂള്ഹകച്ഛനഖലോമോ, അഹം കമ്മേസു ബ്യാവടോ;

ചിരസ്സം ന്ഹാപിതം ലദ്ധാ, ലോമം തം അജ്ജം ഹാരയിം [അപഹാരയിം (സീ. പീ.)].

൧൩൬. യം നു ലോമം അഹാരേസി, ദുല്ലഭം ലദ്ധ കപ്പകം;

അഥ കിഞ്ചരഹി തേ സമ്മ, കണ്ഠേ കിണികിണായതി [ഇദം കണ്ഠേ കിണായതി (ക.), കണ്ഠേ കിംനികിലായതി (സ്യാ.)].

൧൩൭. മനുസ്സസുഖുമാലാനം, മണി കണ്ഠേസു ലമ്ബതി;

തേസാഹം അനുസിക്ഖാമി, മാ ത്വം മഞ്ഞി ദവാ കതം.

൧൩൮. സചേപിമം പിഹയസി, മസ്സുകുത്തിം സുകാരിതം;

കാരയിസ്സാമി തേ സമ്മ, മണിഞ്ചാപി ദദാമി തേ.

൧൩൯. ത്വഞ്ഞേവ മണിനാ ഛന്നോ, സുകതായ ച മസ്സുയാ;

ആമന്ത ഖോ തം ഗച്ഛാമി, പിയം മേ തവ ദസ്സനന്തി.

പാരാവതജാതകം [കാകജാതകം (സീ. പീ.), മണിജാതകം (സ്യാ.)] ദസമം.

ഖരപുത്തവഗ്ഗോ [സേനകവഗ്ഗോ (സീ. പീ.), ഖുരപുത്തവഗ്ഗോ (സ്യാ.), സൂചിവഗ്ഗോ (ക.)] ദുതിയോ.

തസ്സുദ്ദാനം –

അഥ പസ്സ സസൂചി ച തുണ്ഡിലകോ, മിഗ മയ്ഹകപഞ്ചമപക്ഖിവരോ;

അഥ പഞ്ജലി വാരിജ മേജ്ഝ പുന, അഥ വട്ട കപോതവരേന ദസാതി.

അഥ വഗ്ഗുദ്ദാനം –

അഥ വഗ്ഗം പകിത്തിസ്സം, ഛനിപാതം വരുത്തമേ;

അവാരിയാ ച ഖരോ ച [സേനക (സീ.), സൂചി ച (സ്യാ. ക.)], ദ്വേ ച വുത്താ സുബ്യഞ്ജനാതി.

ഛക്കനിപാതം നിട്ഠിതം.