൨. ഖരപുത്തവഗ്ഗോ

൩൮൬. ഖരപുത്തജാതകം (൬-൨-൧)

൭൬. സച്ചം കിരേവമാഹംസു, വസ്തം [ഭസ്തം (സീ. പീ.), കലകം (സ്യാ.), ഗരം (ക.)] ബാലോതി പണ്ഡിതാ;

പസ്സ ബാലോ രഹോകമ്മം, ആവികുബ്ബം ന ബുജ്ഝതി.

൭൭. ത്വം ഖോപി [ത്വം നു ഖോ (സീ. സ്യാ.), ത്വഞ്ച ഖോ (പീ.)] സമ്മ ബാലോസി, ഖരപുത്ത വിജാനഹി;

രജ്ജുയാ ഹി [രജ്ജുയാസി (പീ.)] പരിക്ഖിത്തോ, വങ്കോട്ഠോ ഓഹിതോമുഖോ.

൭൮. അപരമ്പി സമ്മ തേ ബാല്യം [അയമ്പി സമ്മ തേ ബാലോ (ക.)], യോ മുത്തോ ന പലായസി;

സോ ച ബാലതരോ സമ്മ, യം ത്വം വഹസി സേനകം.

൭൯. യം നു സമ്മ അഹം ബാലോ, അജരാജ വിജാനഹി;

അഥ കേന സേനകോ ബാലോ, തം മേ അക്ഖാഹി പുച്ഛിതോ.

൮൦. ഉത്തമത്ഥം ലഭിത്വാന, ഭരിയായ യോ പദസ്സതി [ഭയിയാ യോ പദസ്സതി (പീ.), ഭയിയാ ന ഭവിസ്സതി (ക.)];

തേന ജഹിസ്സതത്താനം, സാ ചേവസ്സ ന ഹേസ്സതി.

൮൧. ന വേ പിയമ്മേതി [ന പിയമേതി (ക.), ന പിയമേദന്തി (കത്ഥചി)] ജനിന്ദ താദിസോ, അത്തം നിരംകത്വാ പിയാനി സേവതി [സേവയേ (?)];

അത്താവ സേയ്യോ പരമാ ച സേയ്യോ, ലബ്ഭാ പിയാ ഓചിതത്ഥേന പച്ഛാതി.

ഖരപുത്തജാതകം പഠമം.

൩൮൭. സൂചിജാതകം (൬-൨-൨)

൮൨. അകക്കസം അഫരുസം, ഖരധോതം സുപാസിയം;

സുഖുമം തിഖിണഗ്ഗഞ്ച, കോ സൂചിം കേതുമിച്ഛതി.

൮൩. സുമജ്ജഞ്ച സുപാസഞ്ച, അനുപുബ്ബം [അനുപുബ്ബ (സീ. സ്യാ.)] സുവട്ടിതം;

ഘനഘാതിമം പടിഥദ്ധം, കോ സൂചിം കേതുമിച്ഛതി.

൮൪. ഇതോ ദാനി പതായന്തി, സൂചിയോ ബളിസാനി ച;

കോയം കമ്മാരഗാമസ്മിം, സൂചിം വിക്കേതുമിച്ഛതി.

൮൫. ഇതോ സത്ഥാനി ഗച്ഛന്തി, കമ്മന്താ വിവിധാ പുഥൂ;

കോയം കമ്മാരഗാമസ്മിം, സൂചിം വിക്കേതുമിച്ഛതി [മരഹതി (സീ. സ്യാ. പീ.)].

൮൬. സൂചിം കമ്മാരഗാമസ്മിം, വിക്കേതബ്ബാ പജാനതാ;

ആചരിയാവ ജാനന്തി [ആചരിയാ സഞ്ജാനന്തി (ക.), ആചരിയാ പജാനന്തി (സ്യാ.), ആചരിയാവ സഞ്ജാനന്തി (പീ.)], കമ്മം സുകതദുക്കടം [ദുക്കതം (സീ. പീ.)].

൮൭. ഇമം ചേ [ഇമഞ്ച (സീ. സ്യാ. പീ.)] തേ പിതാ ഭദ്ദേ, സൂചിം ജഞ്ഞാ മയാ കതം;

തയാ ച മം നിമന്തേയ്യ, യഞ്ചത്ഥഞ്ഞം ഘരേ ധനന്തി.

സൂചിജാതകം ദുതിയം.

൩൮൮. തുണ്ഡിലജാതകം (൬-൨-൩)

൮൮. നവഛന്നകേ [നവഛന്ദകേ (സീ. പീ.), നവച്ഛദ്ദകേ (സ്യാ.)] ദാനി [ദോണി (ക.), ദാനം, ദാനേ (കത്ഥചി)] ദിയ്യതി, പുണ്ണായം ദോണി സുവാമിനീ ഠിതാ;

ബഹുകേ ജനേ പാസപാണികേ, നോ ച ഖോ മേ പടിഭാതി ഭുഞ്ജിതും.

൮൯. തസസി ഭമസി ലേണമിച്ഛസി, അത്താണോസി കുഹിം ഗമിസ്സസി;

അപ്പോസ്സുക്കോ ഭുഞ്ജ തുണ്ഡില, മംസത്ഥായ ഹി പോസിതാമ്ഹസേ [പോസിയാമസേ (സീ. സ്യാ. പീ.)].

൯൦. ഓഗഹ രഹദം അകദ്ദമം, സബ്ബം സേദമലം പവാഹയ;

ഗണ്ഹാഹി നവം വിലേപനം, യസ്സ ഗന്ധോ ന കദാചി ഛിജ്ജതി.

൯൧. കതമോ രഹദോ അകദ്ദമോ, കിംസു സേദമലന്തി വുച്ചതി;

കതമഞ്ച നവം വിലേപനം, യസ്സ ഗന്ധോ ന കദാചി ഛിജ്ജതി.

൯൨. ധമ്മോ രഹദോ അകദ്ദമോ, പാപം സേദമലന്തി വുച്ചതി;

സീലഞ്ച നവം വിലേപനം, തസ്സ ഗന്ധോ ന കദാചി ഛിജ്ജതി.

൯൩. നന്ദന്തി സരീരഘാതിനോ, ന ച നന്ദന്തി സരീരധാരിനോ;

പുണ്ണായ ച പുണ്ണമാസിയാ, രമമാനാവ ജഹന്തി ജീവിതന്തി.

തുണ്ഡിലജാതകം തതിയം.

൩൮൯. സുവണ്ണകക്കടജാതകം (൬-൨-൪)

൯൪. സിങ്ഗീമിഗോ ആയതചക്ഖുനേത്തോ, അട്ഠിത്തചോ വാരിസയോ അലോമോ;

തേനാഭിഭൂതോ കപണം രുദാമി, ഹരേ സഖാ കിസ്സ നു മം ജഹാസി.

൯൫. സോ പസ്സസന്തോ മഹതാ ഫണേന, ഭുജങ്ഗമോ കക്കടമജ്ഝപത്തോ;

സഖാ സഖാരം പരിതായമാനോ, ഭുജങ്ഗമം കക്കടകോ ഗഹേസി.

൯൬. ന വായസം നോ പന കണ്ഹസപ്പം, ഘാസത്ഥികോ കക്കടകോ അദേയ്യ;

പുച്ഛാമി തം ആയതചക്ഖുനേത്ത, അഥ കിസ്സ ഹേതുമ്ഹ ഉഭോ ഗഹീതാ.

൯൭. അയം പുരിസോ മമ അത്ഥകാമോ, യോ മം ഗഹേത്വാന ദകായ നേതി;

തസ്മിം മതേ ദുക്ഖമനപ്പകം മേ, അഹഞ്ച ഏസോ ച ഉഭോ ന ഹോമ.

൯൮. മമഞ്ച ദിസ്വാന പവദ്ധകായം, സബ്ബോ ജനോ ഹിംസിതുമേവ മിച്ഛേ;

സാദുഞ്ച ഥൂലഞ്ച മുദുഞ്ച മംസം, കാകാപി മം ദിസ്വാന [ദിസ്വ (സീ. പീ.)] വിഹേഠയേയ്യും.

൯൯. സചേതസ്സ ഹേതുമ്ഹ ഉഭോ ഗഹീതാ, ഉട്ഠാതു പോസോ വിസമാവമാമി [വിസമാചമാമി (സീ. പീ. ക.)];

മമഞ്ച കാകഞ്ച പമുഞ്ച ഖിപ്പം, പുരേ വിസം ഗാള്ഹമുപേതി മച്ചം.

൧൦൦. സപ്പം പമോക്ഖാമി ന താവ കാകം, പടിബന്ധകോ [പടിബദ്ധകോ (സീ. പീ.)] ഹോഹിതി [ഹോതി ഹി (സ്യാ.)] താവ കാകോ;

പുരിസഞ്ച ദിസ്വാന സുഖിം അരോഗം, കാകം പമോക്ഖാമി യഥേവ സപ്പം.

൧൦൧. കാകോ തദാ ദേവദത്തോ അഹോസി, മാരോ പന കണ്ഹസപ്പോ അഹോസി;

ആനന്ദഭദ്ദോ കക്കടകോ അഹോസി, അഹം തദാ ബ്രാഹ്മണോ ഹോമി സത്ഥാതി [തത്ഥാതി (സീ. പീ.)].

സുവണ്ണകക്കടജാതകം ചതുത്ഥം.

൩൯൦. മയ്ഹകജാതകം (൬-൨-൫)

൧൦൨. സകുണോ മയ്ഹകോ നാമ, ഗിരിസാനുദരീചരോ;

പക്കം പിപ്ഫലിമാരുയ്ഹ, മയ്ഹം മയ്ഹന്തി കന്ദതി.

൧൦൩. തസ്സേവം വിലപന്തസ്സ, ദിജസങ്ഘാ സമാഗതാ;

ഭുത്വാന പിപ്ഫലിം യന്തി, വിലപത്വേവ സോ ദിജോ.

൧൦൪. ഏവമേവ ഇധേകച്ചോ, സങ്ഘരിത്വാ ബഹും ധനം;

നേവത്തനോ ന ഞാതീനം, യഥോധിം പടിപജ്ജതി.

൧൦൫. ന സോ അച്ഛാദനം ഭത്തം, ന മാലം ന വിലേപനം;

അനുഭോതി [നാനുഭോതി (സ്യാ. ക.)] സകിം കിഞ്ചി, ന സങ്ഗണ്ഹാതി ഞാതകേ.

൧൦൬. തസ്സേവം വിലപന്തസ്സ, മയ്ഹം മയ്ഹന്തി രക്ഖതോ;

രാജാനോ അഥ വാ ചോരാ, ദായദാ യേ വ [യേ ച (സ്യാ. ക.)] അപ്പിയാ;

ധനമാദായ ഗച്ഛന്തി, വിലപത്വേവ സോ നരോ.

൧൦൭. ധീരോ [ധീരോ ച (സീ.)] ഭോഗേ അധിഗമ്മ, സങ്ഗണ്ഹാതി ച ഞാതകേ;

തേന സോ കിത്തിം പപ്പോതി, പേച്ച സഗ്ഗേ പമോദതീതി [സഗ്ഗേ ച മോദതീതി (സീ. പീ.)].

മയ്ഹകജാതകം പഞ്ചമം.

൩൯൧. വിജ്ജാധരജാതകം (൬-൨-൬)

൧൦൮. ദുബ്ബണ്ണരൂപം തുവമരിയവണ്ണീ, പുരക്ഖത്വാ [പുരക്ഖിത്വാ (സ്യാ. ക.)] പഞ്ജലികോ നമസ്സസി;

സേയ്യോ നു തേ സോ ഉദവാ [ഉദാഹു (സ്യാ. ക.)] സരിക്ഖോ, നാമം പരസ്സത്തനോ ചാപി ബ്രൂഹി.

൧൦൯. ന നാമഗോത്തം ഗണ്ഹന്തി രാജ, സമ്മഗ്ഗതാനുജ്ജുഗതാന [സമഗ്ഗതാനുജ്ജുഗതാന (സ്യാ.), സമുഗ്ഗതാനുജ്ജുഗതാന (ക.)] ദേവാ;

അഹഞ്ച തേ നാമധേയ്യം വദാമി, സക്കോഹമസ്മീ തിദസാനമിന്ദോ.

൧൧൦. യോ ദിസ്വാ ഭിക്ഖും ചരണൂപപന്നം, പുരക്ഖത്വാ പഞ്ജലികോ നമസ്സതി;

പുച്ഛാമി തം ദേവരാജേതമത്ഥം, ഇതോ ചുതോ കിം ലഭതേ സുഖം സോ.

൧൧൧. യോ ദിസ്വാ ഭിക്ഖും ചരണൂപപന്നം, പുരക്ഖത്വാ പഞ്ജലികോ നമസ്സതി;

ദിട്ഠേവ ധമ്മേ ലഭതേ പസംസം, സഗ്ഗഞ്ച സോ യാതി സരീരഭേദാ.

൧൧൨. ലക്ഖീ വത മേ ഉദപാദി അജ്ജ, യം വാസവം ഭൂതപതിദ്ദസാമ;

ഭിക്ഖുഞ്ച ദിസ്വാന തുവഞ്ച സക്ക, കാഹാമി പുഞ്ഞാനി അനപ്പകാനി.

൧൧൩. അദ്ധാ ഹവേ സേവിതബ്ബാ സപഞ്ഞാ, ബഹുസ്സുതാ യേ ബഹുഠാനചിന്തിനോ;

ഭിക്ഖുഞ്ച ദിസ്വാന മമഞ്ച രാജ, കരോഹി പുഞ്ഞാനി അനപ്പകാനി.

൧൧൪. അക്കോധനോ നിച്ചപസന്നചിത്തോ, സബ്ബാതിഥീയാചയോഗോ ഭവിത്വാ;

നിഹച്ച മാനം അഭിവാദയിസ്സം, സുത്വാന ദേവിന്ദ സുഭാസിതാനീതി.

വിജ്ജാധര [ധജവിഹേഠക (സീ. പീ.), പബ്ബജിതവിഹേഠക (സ്യാ.)] ജാതകം ഛട്ഠം.

൩൯൨. സിങ്ഘപുപ്ഫജാതകം (൬-൨-൭)

൧൧൫. യമേതം [യമേകം (പീ.)] വാരിജം പുപ്ഫം, അദിന്നം ഉപസിങ്ഘസി;

ഏകങ്ഗമേതം ഥേയ്യാനം, ഗന്ധഥേനോസി മാരിസ.

൧൧൬. ന ഹരാമി ന ഭഞ്ജാമി, ആരാ സിങ്ഘാമി വാരിജം;

അഥ കേന നു വണ്ണേന, ഗന്ധഥേനോതി വുച്ചതി.

൧൧൭. യോയം ഭിസാനി ഖണതി, പുണ്ഡരീകാനി ഭഞ്ജതി;

ഏവം ആകിണ്ണകമ്മന്തോ, കസ്മാ ഏസോ ന വുച്ചതി.

൧൧൮. ആകിണ്ണലുദ്ദോ പുരിസോ, ധാതിചേലംവ മക്ഖിതോ;

തസ്മിം മേ വചനം നത്ഥി, തഞ്ചാരഹാമി വത്തവേ.

൧൧൯. അനങ്ഗണസ്സ പോസസ്സ, നിച്ചം സുചിഗവേസിനോ;

വാലഗ്ഗമത്തം പാപസ്സ, അബ്ഭാമത്തംവ ഖായതി.

൧൨൦. അദ്ധാ മം യക്ഖ ജാനാസി, അഥോ മം അനുകമ്പസി;

പുനപി യക്ഖ വജ്ജാസി, യദാ പസ്സസി ഏദിസം.

൧൨൧. നേവ തം ഉപജീവാമി, നപി തേ ഭതകാമ്ഹസേ [ഭതകമ്ഹസേ (സീ. പീ.), ഭതികമ്ഹസേ (സ്യാ.)];

ത്വമേവ ഭിക്ഖു ജാനേയ്യ, യേന ഗച്ഛേയ്യ സുഗ്ഗതിന്തി.

സിങ്ഘപുപ്ഫ [ഭിസപുപ്ഫ (സീ. പീ.), ഉപസിങ്ഘപുപ്ഫ (സ്യാ.)] ജാതകം സത്തമം.

൩൯൩. വിഘാസാദജാതകം (൬-൨-൮)

൧൨൨. സുസുഖം വത ജീവന്തി, യേ ജനാ വിഘാസാദിനോ;

ദിട്ഠേവ ധമ്മേ പാസംസാ, സമ്പരായേ ച സുഗ്ഗതീ.

൧൨൩. സുകസ്സ [സുവസ്സ (സീ. സ്യാ. പീ.)] ഭാസമാനസ്സ, ന നിസാമേഥ പണ്ഡിതാ;

ഇദം സുണാഥ സോദരിയാ, അമ്ഹേവായം പസംസതി.

൧൨൪. നാഹം തുമ്ഹേ പസംസാമി, കുണപാദാ സുണാഥ മേ;

ഉച്ഛിട്ഠഭോജിനോ [ഭോജനാ (ക.)] തുമ്ഹേ, ന തുമ്ഹേ വിഘാസാദിനോ.

൧൨൫. സത്തവസ്സാ പബ്ബജിതാ, മേജ്ഝാരഞ്ഞേ [മജ്ഝേരഞ്ഞേ (ക.)] സിഖണ്ഡിനോ;

വിഘാസേനേവ യാപേന്താ, മയം ചേ ഭോതോ ഗാരയ്ഹാ;

കേ നു ഭോതോ പസംസിയാ.

൧൨൬. തുമ്ഹേ സീഹാനം ബ്യഗ്ഘാനം, വാളാനഞ്ചാവസിട്ഠകം;

ഉച്ഛിട്ഠേനേവ യാപേന്താ, മഞ്ഞിവ്ഹോ വിഘാസാദിനോ.

൧൨൭. യേ ബ്രാഹ്മണസ്സ സമണസ്സ, അഞ്ഞസ്സ വാ [അഞ്ഞസ്സ ച (സീ. സ്യാ.), അഞ്ഞസ്സേവ (പീ.)] വനിബ്ബിനോ [വണിബ്ബിനോ (സീ. സ്യാ.)];

ദത്വാവ [ദത്വാന (പീ. ക.)] സേസം ഭുഞ്ജന്തി, തേ ജനാ വിഘാസാദിനോതി.

വിഘാസാദജാതകം അട്ഠമം.

൩൯൪. വട്ടകജാതകം (൬-൨-൯)

൧൨൮. പണീതം ഭുഞ്ജസേ ഭത്തം, സപ്പിതേലഞ്ച മാതുല;

അഥ കേന നു വണ്ണേന, കിസോ ത്വമസി വായസ.

൧൨൯. അമിത്തമജ്ഝേ വസതോ, തേസു ആമിസമേസതോ;

നിച്ചം ഉബ്ബിഗ്ഗഹദയസ്സ, കുതോ കാകസ്സ ദള്ഹിയം.

൧൩൦. നിച്ചം ഉബ്ബേഗിനോ [ഉബ്ബിഗ്ഗിനോ (സ്യാ. ക.), ഉബ്ബേധിനോ (സീ.)] കാകാ, ധങ്കാ പാപേന കമ്മുനാ;

ലദ്ധോ പിണ്ഡോ ന പീണേതി, കിസോ തേനസ്മി വട്ടക.

൧൩൧. ലൂഖാനി തിണബീജാനി, അപ്പസ്നേഹാനി ഭുഞ്ജസി;

അഥ കേന നു വണ്ണേന, ഥൂലോ ത്വമസി വട്ടക.

൧൩൨. അപ്പിച്ഛാ അപ്പചിന്തായ, അദൂരഗമനേന ച;

ലദ്ധാലദ്ധേന യാപേന്തോ, ഥൂലോ തേനസ്മി വായസ.

൧൩൩. അപ്പിച്ഛസ്സ ഹി പോസസ്സ, അപ്പചിന്തസുഖസ്സ [അപ്പചിന്തിസുഖസ്സ (സീ. സ്യാ. പീ.)] ച;

സുസങ്ഗഹിതമാനസ്സ [സുസങ്ഗഹിതപമാണസ്സ (സീ. സ്യാ. പീ.)], വുത്തീ സുസമുദാനയാതി.

വട്ടകജാതകം നവമം.

൩൯൫. പാരാവതജാതകം (൬-൨-൧൦)

൧൩൪. ചിരസ്സം വത പസ്സാമി, സഹായം മണിധാരിനം;

സുകതാ [സുകതായ (സീ. പീ.)] മസ്സുകുത്തിയാ, സോഭതേ വത മേ സഖാ.

൧൩൫. പരൂള്ഹകച്ഛനഖലോമോ, അഹം കമ്മേസു ബ്യാവടോ;

ചിരസ്സം ന്ഹാപിതം ലദ്ധാ, ലോമം തം അജ്ജം ഹാരയിം [അപഹാരയിം (സീ. പീ.)].

൧൩൬. യം നു ലോമം അഹാരേസി, ദുല്ലഭം ലദ്ധ കപ്പകം;

അഥ കിഞ്ചരഹി തേ സമ്മ, കണ്ഠേ കിണികിണായതി [ഇദം കണ്ഠേ കിണായതി (ക.), കണ്ഠേ കിംനികിലായതി (സ്യാ.)].

൧൩൭. മനുസ്സസുഖുമാലാനം, മണി കണ്ഠേസു ലമ്ബതി;

തേസാഹം അനുസിക്ഖാമി, മാ ത്വം മഞ്ഞി ദവാ കതം.

൧൩൮. സചേപിമം പിഹയസി, മസ്സുകുത്തിം സുകാരിതം;

കാരയിസ്സാമി തേ സമ്മ, മണിഞ്ചാപി ദദാമി തേ.

൧൩൯. ത്വഞ്ഞേവ മണിനാ ഛന്നോ, സുകതായ ച മസ്സുയാ;

ആമന്ത ഖോ തം ഗച്ഛാമി, പിയം മേ തവ ദസ്സനന്തി.