൩൭൫. കപോതജാതകം (൫-൩-൫)

൧൩൫. ഇദാനി ഖോമ്ഹി സുഖിതോ അരോഗോ, നിക്കണ്ടകോ നിപ്പതിതോ കപോതോ;

കാഹാമി ദാനീ ഹദയസ്സ തുട്ഠിം, തഥാഹിമം മംസസാകം ബലേതി.

൧൩൬. കായം ബലാകാ സിഖിനോ, ചോരീ ലങ്ഘിപിതാമഹാ;

ഓരം ബലാകേ ആഗച്ഛ, ചണ്ഡോ മേ വായസോ സഖാ.

൧൩൭. അലഞ്ഹി തേ ജഗ്ഘിതായേ, മമം ദിസ്വാന ഏദിസം;

വിലൂനം സൂദപുത്തേന, പിട്ഠമണ്ഡേന [പിട്ഠമദ്ദേന (സീ. സ്യാ. പീ.)] മക്ഖിതം.

൧൩൮. സുന്ഹാതോ സുവിലിത്തോസി, അന്നപാനേന തപ്പിതോ;

കണ്ഠേ ച തേ വേളുരിയോ, അഗമാ നു കജങ്ഗലം.

൧൩൯. മാ തേ മിത്തോ അമിത്തോ വാ, അഗമാസി കജങ്ഗലം;

പിഞ്ഛാനി തത്ഥ ലായിത്വാ, കണ്ഠേ ബന്ധന്തി വട്ടനം.

൧൪൦. പുനപാപജ്ജസീ സമ്മ, സീലഞ്ഹി തവ താദിസം;

ന ഹി മാനുസകാ ഭോഗാ, സുഭുഞ്ജാ ഹോന്തി പക്ഖിനാതി.

കപോതജാതകം പഞ്ചമം.

അഡ്ഢവഗ്ഗോ തതിയോ.

തസ്സുദ്ദാനം –

അഥ വണ്ണ സസീല ഹിരി ലഭതേ, സുമുഖാ വിസ സാളിയമിത്തവരോ;

അഥ ചക്ക പലാസ സരാജ സതോ, യവ ബാല കപോതക പന്നരസാതി.

അഥ വഗ്ഗുദ്ദാനം –

ജീനഞ്ച വണ്ണം അസമംവഗുപ്പരി, സുദേസിതാ ജാതകന്തി സന്തി വീസതി [ജാതക പഞ്ചവീസതി (?)];

മഹേസിനോ ബ്രഹ്മചരിത്തമുത്ത-മവോച ഗാഥാ അത്ഥവതീ സുബ്യഞ്ജനാതി.

പഞ്ചകനിപാതം നിട്ഠിതം.