൩. അഡ്ഢവഗ്ഗോ

൩൭൧. ദീഘീതികോസലജാതകം (൫-൩-൧)

൧൧൦. ഏവംഭൂതസ്സ തേ രാജ, ആഗതസ്സ വസേ [വസോ (പീ. ക.)] മമ;

അത്ഥി നു കോചി പരിയായോ, യോ തം ദുക്ഖാ പമോചയേ.

൧൧൧. ഏവംഭൂതസ്സ മേ താത, ആഗതസ്സ വസേ തവ;

നത്ഥി നോ കോചി പരിയായോ, യോ മം ദുക്ഖാ പമോചയേ.

൧൧൨. നാഞ്ഞം സുചരിതം രാജ, നാഞ്ഞം രാജ സുഭാസിതം;

തായതേ മരണകാലേ, ഏവമേവിതരം ധനം.

൧൧൩. അക്കോച്ഛി മം അവധി മം, അജിനി മം അഹാസി മേ;

യേ ച തം ഉപനയ്ഹന്തി, വേരം തേസം ന സമ്മതി.

൧൧൪. അക്കോച്ഛി മം അവധി മം, അജിനി മം അഹാസി മേ;

യേ ച തം നുപനയ്ഹന്തി, വേരം തേസൂപസമ്മതി.

൧൧൫. ന ഹി വേരേന വേരാനി, സമ്മന്തീധ കുദാചനം;

അവേരേന ച സമ്മന്തി, ഏസ ധമ്മോ സനന്തനോതി.

ദീഘീതികോസലജാതകം പഠമം.

൩൭൨. മിഗപോതകജാതകം (൫-൩-൨)

൧൧൬. അഗാരാ പച്ചുപേതസ്സ, അനഗാരസ്സ തേ സതോ;

സമണസ്സ ന തം സാധു, യം പേതമനുസോചസി.

൧൧൭. സംവാസേന ഹവേ സക്ക, മനുസ്സസ്സ മിഗസ്സ വാ;

ഹദയേ ജായതേ പേമം, ന തം സക്കാ അസോചിതും.

൧൧൮. മതം മരിസ്സം രോദന്തി, യേ രുദന്തി ലപന്തി ച;

തസ്മാ ത്വം ഇസി മാ രോദി, രോദിതം മോഘമാഹു സന്തോ.

൧൧൯. രോദിതേന ഹവേ ബ്രഹ്മേ, മതോ പേതോ സമുട്ഠഹേ;

സബ്ബേ സങ്ഗമ്മ രോദാമ, അഞ്ഞമഞ്ഞസ്സ ഞാതകേ.

൧൨൦. ആദിത്തം വത മം സന്തം, ഘതസിത്തംവ പാവകം;

വാരിനാ വിയ ഓസിഞ്ചം, സബ്ബം നിബ്ബാപയേ ദരം.

൧൨൧. അബ്ബഹി വത മേ സല്ലം, യമാസി ഹദയസ്സിതം;

യോ മേ സോകപരേതസ്സ, പുത്തസോകം അപാനുദി.

൧൨൨. സോഹം അബ്ബൂള്ഹസല്ലോസ്മി, വീതസോകോ അനാവിലോ;

ന സോചാമി ന രോദാമി, തവ സുത്വാന വാസവാതി.

മിഗപോതകജാതകം ദുതിയം.

൩൭൩. മൂസികജാതകം (൫-൩-൩)

൧൨൩. കുഹിം ഗതാ കത്ഥ ഗതാ, ഇതി ലാലപ്പതീ ജനോ;

അഹമേവേകോ ജാനാമി, ഉദപാനേ മൂസികാ ഹതാ.

൧൨൪. യഞ്ചേതം [യഥേതം (പീ.), യവേതം (ക.), യമേതം (കത്ഥചി)] ഇതി ചീതി ച, ഗദ്രഭോവ നിവത്തസി;

ഉദപാനേ മൂസികം ഹന്ത്വാ, യവം ഭക്ഖേതുമിച്ഛസി.

൧൨൫. ദഹരോ ചാസി ദുമ്മേധ, പഠമുപ്പത്തികോ [പഠമുപ്പത്തിതോ (സീ. പീ.)] സുസു;

ദീഘഞ്ചേതം [ദീഘമേതം (പീ.)] സമാസജ്ജ [സമാപജ്ജ (സ്യാ. ക.)], ന തേ ദസ്സാമി ജീവിതം.

൧൨൬. നാന്തലിക്ഖഭവനേന, നാങ്ഗപുത്തപിനേന [നാങ്ഗപുത്തസിരേന (സീ. സ്യാ. പീ.)] വാ;

പുത്തേന ഹി പത്ഥയിതോ, സിലോകേഹി പമോചിതോ.

൧൨൭. സബ്ബം സുതമധീയേഥ, ഹീനമുക്കട്ഠമജ്ഝിമം;

സബ്ബസ്സ അത്ഥം ജാനേയ്യ, ന ച സബ്ബം പയോജയേ;

ഹോതി താദിസകോ കാലോ, യത്ഥ അത്ഥാവഹം സുതന്തി.

മൂസികജാതകം തതിയം.

൩൭൪. ചൂളധനുഗ്ഗഹജാതകം (൫-൩-൪)

൧൨൮. സബ്ബം ഭണ്ഡം സമാദായ, പാരം തിണ്ണോസി ബ്രാഹ്മണ;

പച്ചാഗച്ഛ ലഹും ഖിപ്പം, മമ്പി താരേഹി ദാനിതോ [ദാനിഭോ (സ്യാ.)].

൧൨൯. അസന്ഥുതം മം ചിരസന്ഥുതേന, നിമീനി ഭോതീ അദ്ധുവം ധുവേന;

മയാപി ഭോതീ നിമിനേയ്യ അഞ്ഞം, ഇതോ അഹം ദൂരതരം ഗമിസ്സം.

൧൩൦. കായം ഏളഗലാഗുമ്ബേ [ഏളഗണഗുമ്ബേ (ക.)], കരോതി അഹുഹാസിയം;

നയീധ നച്ചഗീതം വാ [നയിധ നച്ചം വാ ഗീതം വാ (സീ. സ്യാ. പീ.)], താളം വാ സുസമാഹിതം;

അനമ്ഹികാലേ [അനമ്ഹകാലേ (പീ.)] സുസോണി [സുസ്സോണി (സീ. സ്യാ. പീ.)], കിം നു ജഗ്ഘസി സോഭനേ [സോഭണേ (പീ. ക.)].

൧൩൧. സിങ്ഗാല ബാല ദുമ്മേധ, അപ്പപഞ്ഞോസി ജമ്ബുക;

ജീനോ മച്ഛഞ്ച പേസിഞ്ച, കപണോ വിയ ഝായസി.

൧൩൨. സുദസ്സം വജ്ജമഞ്ഞേസം, അത്തനോ പന ദുദ്ദസം;

ജീനാ പതിഞ്ച ജാരഞ്ച, മഞ്ഞേ ത്വഞ്ഞേവ [മമ്പി ത്വഞ്ഞേവ (സീ. സ്യാ.), ത്വമ്പി മഞ്ഞേവ (പീ.)] ഝായസി.

൧൩൩. ഏവമേതം മിഗരാജ, യഥാ ഭാസസി ജമ്ബുക;

സാ നൂനാഹം ഇതോ ഗന്ത്വാ, ഭത്തു ഹേസ്സം വസാനുഗാ.

൧൩൪. യോ ഹരേ മത്തികം ഥാലം, കംസഥാലമ്പി സോ ഹരേ;

കതഞ്ചേവ [കതംയേവ (സീ. സ്യാ. പീ.)] തയാ പാപം, പുനപേവം കരിസ്സസീതി.

ചൂളധനുഗ്ഗഹജാതകം ചതുത്ഥം.

൩൭൫. കപോതജാതകം (൫-൩-൫)

൧൩൫. ഇദാനി ഖോമ്ഹി സുഖിതോ അരോഗോ, നിക്കണ്ടകോ നിപ്പതിതോ കപോതോ;

കാഹാമി ദാനീ ഹദയസ്സ തുട്ഠിം, തഥാഹിമം മംസസാകം ബലേതി.

൧൩൬. കായം ബലാകാ സിഖിനോ, ചോരീ ലങ്ഘിപിതാമഹാ;

ഓരം ബലാകേ ആഗച്ഛ, ചണ്ഡോ മേ വായസോ സഖാ.

൧൩൭. അലഞ്ഹി തേ ജഗ്ഘിതായേ, മമം ദിസ്വാന ഏദിസം;

വിലൂനം സൂദപുത്തേന, പിട്ഠമണ്ഡേന [പിട്ഠമദ്ദേന (സീ. സ്യാ. പീ.)] മക്ഖിതം.

൧൩൮. സുന്ഹാതോ സുവിലിത്തോസി, അന്നപാനേന തപ്പിതോ;

കണ്ഠേ ച തേ വേളുരിയോ, അഗമാ നു കജങ്ഗലം.

൧൩൯. മാ തേ മിത്തോ അമിത്തോ വാ, അഗമാസി കജങ്ഗലം;

പിഞ്ഛാനി തത്ഥ ലായിത്വാ, കണ്ഠേ ബന്ധന്തി വട്ടനം.

൧൪൦. പുനപാപജ്ജസീ സമ്മ, സീലഞ്ഹി തവ താദിസം;

ന ഹി മാനുസകാ ഭോഗാ, സുഭുഞ്ജാ ഹോന്തി പക്ഖിനാതി.

കപോതജാതകം പഞ്ചമം.

അഡ്ഢവഗ്ഗോ തതിയോ.

തസ്സുദ്ദാനം –

അഥ വണ്ണ സസീല ഹിരി ലഭതേ, സുമുഖാ വിസ സാളിയമിത്തവരോ;

അഥ ചക്ക പലാസ സരാജ സതോ, യവ ബാല കപോതക പന്നരസാതി.

അഥ വഗ്ഗുദ്ദാനം –

ജീനഞ്ച വണ്ണം അസമംവഗുപ്പരി, സുദേസിതാ ജാതകന്തി സന്തി വീസതി [ജാതക പഞ്ചവീസതി (?)];

മഹേസിനോ ബ്രഹ്മചരിത്തമുത്ത-മവോച ഗാഥാ അത്ഥവതീ സുബ്യഞ്ജനാതി.

പഞ്ചകനിപാതം നിട്ഠിതം.