൪. കോകിലവഗ്ഗോ
൩൩൧. കോകിലജാതകം (൪-൪-൧)
൧൨൧. യോ വേ കാലേ അസമ്പത്തേ, അതിവേലം പഭാസതി;
ഏവം സോ നിഹതോ സേതി, കോകിലായിവ അത്രജോ.
൧൨൨. ന ഹി സത്ഥം സുനിസിതം, വിസം ഹലാഹലാമിവ [ഹലാഹലം ഇവ (പീ.)];
ഏവം നികട്ഠേ [നിക്കഡ്ഢേ (സ്യാ.), നികഡ്ഢേ (ക.)] പാതേതി, വാചാ ദുബ്ഭാസിതാ യഥാ.
൧൨൩. തസ്മാ കാലേ അകാലേ വാ [അകാലേ ച (സീ. സ്യാ.)], വാചം രക്ഖേയ്യ പണ്ഡിതോ;
നാതിവേലം പഭാസേയ്യ, അപി അത്തസമമ്ഹി വാ.
൧൨൪. യോ ച കാലേ മിതം ഭാസേ, മതിപുബ്ബോ വിചക്ഖണോ;
സബ്ബേ അമിത്തേ ആദേതി, സുപണ്ണോ ഉരഗാമിവാതി.
കോകിലജാതകം [കോകാലികജാതകം (സബ്ബത്ഥ)] പഠമം.
൩൩൨. രഥലട്ഠിജാതകം (൪-൪-൨)
൧൨൫. അപി ഹന്ത്വാ ഹതോ ബ്രൂതി, ജേത്വാ ജിതോതി ഭാസതി;
പുബ്ബവക്ഖായിനോ [പുബ്ബമക്ഖായിനോ (സീ. സ്യാ.)] രാജ, അഞ്ഞദത്ഥു [ഏകദത്ഥു (സീ. പീ.)] ന സദ്ദഹേ.
൧൨൬. തസ്മാ പണ്ഡിതജാതിയോ, സുണേയ്യ ഇതരസ്സപി;
ഉഭിന്നം വചനം സുത്വാ, യഥാ ധമ്മോ തഥാ കരേ.
൧൨൭. അലസോ ഗിഹീ കാമഭോഗീ ന സാധു, അസഞ്ഞതോ പബ്ബജിതോ ന സാധു;
രാജാ ന സാധു അനിസമ്മകാരീ, യോ പണ്ഡിതോ കോധനോ തം ന സാധു.
൧൨൮. നിസമ്മ ഖത്തിയോ കയിരാ, നാനിസമ്മ ദിസമ്പതി;
നിസമ്മകാരിനോ രാജ [രഞ്ഞോ (സീ. സ്യാ.)], യസോ കിത്തി ച വഡ്ഢതീതി.
രഥലട്ഠിജാതകം ദുതിയം.
൩൩൩. പക്കഗോധജാതകം (൪-൪-൩)
൧൨൯. തദേവ മേ ത്വം വിദിതോ, വനമജ്ഝേ രഥേസഭ;
യസ്സ തേ ഖഗ്ഗബദ്ധസ്സ, സന്നദ്ധസ്സ തിരീടിനോ;
അസ്സത്ഥദുമസാഖായ, പക്കാ ഗോധാ പലായഥ.
൧൩൦. നമേ നമന്തസ്സ ഭജേ ഭജന്തം, കിച്ചാനുകുബ്ബസ്സ കരേയ്യ കിച്ചം;
നാനത്ഥകാമസ്സ കരേയ്യ അത്ഥം, അസമ്ഭജന്തമ്പി ന സമ്ഭജേയ്യ.
൧൩൧. ചജേ ചജന്തം വനഥം ന കയിരാ, അപേതചിത്തേന ന സമ്ഭജേയ്യ;
ദിജോ ദുമം ഖീണഫലന്തി [ഫലംവ (ക. സീ. സ്യാ. ക.), ദുകനിപാതേ പുടഭത്തജാതകേന സംസന്ദേതബ്ബം] ഞത്വാ, അഞ്ഞം സമേക്ഖേയ്യ മഹാ ഹി ലോകോ.
൧൩൨. സോ തേ കരിസ്സാമി യഥാനുഭാവം, കതഞ്ഞുതം ഖത്തിയേ [ഖത്തിയോ (സ്യാ. ക.)] പേക്ഖമാനോ;
സബ്ബഞ്ച തേ ഇസ്സരിയം ദദാമി, യസ്സിച്ഛസീ തസ്സ തുവം ദദാമീതി.
പക്കഗോധജാതകം [ഗോധജാതകം (സീ. സ്യാ. പീ.)] തതിയം.
൩൩൪. രാജോവാദജാതകം (൪-൪-൪)
൧൩൩. ഗവം ചേ തരമാനാനം, ജിമ്ഹം ഗച്ഛതി പുങ്ഗവോ;
സബ്ബാ താ ജിമ്ഹം ഗച്ഛന്തി [സബ്ബാ ഗാവീ ജിമ്ഹം യന്തി (സീ. സ്യാ.)], നേത്തേ ജിമ്ഹം ഗതേ സതി.
൧൩൪. ഏവമേവ മനുസ്സേസു, യോ ഹോതി സേട്ഠസമ്മതോ;
സോ ചേ അധമ്മം ചരതി, പഗേവ ഇതരാ പജാ;
സബ്ബം രട്ഠം ദുഖം സേതി, രാജാ ചേ ഹോതി അധമ്മികോ.
൧൩൫. ഗവം ചേ തരമാനാനം, ഉജും ഗച്ഛതി പുങ്ഗവോ;
സബ്ബാ ഗാവീ ഉജും യന്തി [സബ്ബാ താ ഉജും ഗച്ഛന്തി (പീ. അ. നി. ൪.൭൦)], നേത്തേ ഉജും ഗതേ സതി.
൧൩൬. ഏവമേവ മനുസ്സേസു, യോ ഹോതി സേട്ഠസമ്മതോ;
സോ സചേ ധമ്മം ചരതി, പഗേവ ഇതരാ പജാ;
സബ്ബം രട്ഠം സുഖം സേതി, രാജാ ചേ ഹോതി ധമ്മികോതി.
രാജോവാദജാതകം ചതുത്ഥം.
൩൩൫. ജമ്ബുകജാതകം (൪-൪-൫)
൧൩൭. ബ്രഹാ പവഡ്ഢകായോ സോ, ദീഘദാഠോ ച ജമ്ബുക;
ന ത്വം തത്ഥ കുലേ ജാതോ, യത്ഥ ഗണ്ഹന്തി കുഞ്ജരം.
൧൩൮. അസീഹോ സീഹമാനേന, യോ അത്താനം വികുബ്ബതി;
കോത്ഥൂവ [കുട്ഠൂവ (സീ.), കുത്ഥുവ (സ്യാ. പീ)] ഗജമാസജ്ജ, സേതി ഭൂമ്യാ അനുത്ഥുനം.
൧൩൯. യസസ്സിനോ ഉത്തമപുഗ്ഗലസ്സ, സഞ്ജാതഖന്ധസ്സ മഹബ്ബലസ്സ;
അസമേക്ഖിയ ഥാമബലൂപപത്തിം, സ സേതി നാഗേന ഹതോയം ജമ്ബുകോ.
൧൪൦. യോ ചീധ കമ്മം കുരുതേ പമായ, ഥാമബ്ബലം അത്തനി സംവിദിത്വാ;
ജപ്പേന മന്തേന സുഭാസിതേന, പരിക്ഖവാ സോ വിപുലം ജിനാതീതി.
ജമ്ബുകജാതകം പഞ്ചമം.
൩൩൬. ബ്രഹാഛത്തജാതകം (൪-൪-൬)
൧൪൧. തിണം തിണന്തി ലപസി, കോ നു തേ തിണമാഹരി;
കിം നു തേ തിണകിച്ചത്ഥി, തിണമേവ പഭാസസി.
൧൪൨. ഇധാഗമാ ബ്രഹ്മചാരീ, ബ്രഹാ ഛത്തോ ബഹുസ്സുതോ;
സോ മേ [സോ വേ (ക.)] സബ്ബം സമാദായ, തിണം നിക്ഖിപ്പ ഗച്ഛതി.
൧൪൩. ഏവേതം ഹോതി കത്തബ്ബം, അപ്പേന ബഹുമിച്ഛതാ;
സബ്ബം സകസ്സ ആദാനം, അനാദാനം തിണസ്സ ച. ( ) [(തിണസ്സ ചാടീസു ഗതോ, തത്ഥ കാ പരിദേവനാ) (സീ. സ്യാ.) (ചാടീസു പക്ഖിപിത്വാന, തത്ഥ കാ പരിദേവനാ) (ക.)]
൧൪൪. സീലവന്തോ ന കുബ്ബന്തി, ബാലോ സീലാനി കുബ്ബതി;
അനിച്ചസീലം ദുസ്സീല്യം [ദുസ്സീലം (പീ.)], കിം പണ്ഡിച്ചം കരിസ്സതീതി.
ബ്രഹാഛത്തജാതകം ഛട്ഠം.
൩൩൭. പീഠജാതകം (൪-൪-൭)
൧൪൫. ന തേ പീഠമദായിമ്ഹാ [മദാസിമ്ഹ (പീ. ക.)], ന പാനം നപി ഭോജനം;
ബ്രഹ്മചാരി ഖമസ്സു മേ, ഏതം പസ്സാമി അച്ചയം.
൧൪൬. നേവാഭിസജ്ജാമി ന ചാപി കുപ്പേ, ന ചാപി മേ അപ്പിയമാസി കിഞ്ചി;
അഥോപി മേ ആസി മനോവിതക്കോ, ഏതാദിസോ നൂന കുലസ്സ ധമ്മോ.
൧൪൭. ഏസസ്മാകം കുലേ ധമ്മോ, പിതുപിതാമഹോ സദാ;
ആസനം ഉദകം പജ്ജം, സബ്ബേതം നിപദാമസേ.
൧൪൮. ഏസസ്മാകം കുലേ ധമ്മോ, പിതുപിതാമഹോ സദാ;
സക്കച്ചം ഉപതിട്ഠാമ, ഉത്തമം വിയ ഞാതകന്തി.
പീഠജാതകം സത്തമം.
൩൩൮. ഥുസജാതകം (൪-൪-൮)
൧൪൯. വിദിതം ഥുസം ഉന്ദുരാനം [ഉന്ദൂരാനം (ക.)], വിദിതം പന തണ്ഡുലം;
ഥുസം ഥുസം [ഥുസം ഥൂലം (സീ.)] വിവജ്ജേത്വാ, തണ്ഡുലം പന ഖാദരേ.
൧൫൦. യാ മന്തനാ അരഞ്ഞസ്മിം, യാ ച ഗാമേ നികണ്ണികാ;
യഞ്ചേതം ഇതി ചീതി ച, ഏതമ്പി വിദിതം മയാ.
൧൫൧. ധമ്മേന കിര ജാതസ്സ, പിതാ പുത്തസ്സ മക്കടോ;
ദഹരസ്സേവ സന്തസ്സ, ദന്തേഹി ഫലമച്ഛിദാ.
൧൫൨. യമേതം പരിസപ്പസി [പരിസബ്ബേസി (ക.)], അജകാണോവ സാസപേ;
യോപായം ഹേട്ഠതോ സേതി [സേസി (സീ.)], ഏതമ്പി വിദിതം മയാതി.
ഥുസജാതകം അട്ഠമം.
൩൩൯. ബാവേരുജാതകം (൪-൪-൯)
൧൫൩. അദസ്സനേന മോരസ്സ, സിഖിനോ മഞ്ജുഭാണിനോ;
കാകം തത്ഥ അപൂജേസും, മംസേന ച ഫലേന ച.
൧൫൪. യദാ ച സരസമ്പന്നോ, മോരോ ബാവേരുമാഗമാ;
അഥ ലാഭോ ച സക്കാരോ, വായസസ്സ അഹായഥ.
൧൫൫. യാവ നുപ്പജ്ജതീ ബുദ്ധോ, ധമ്മരാജാ പഭങ്കരോ;
താവ അഞ്ഞേ അപൂജേസും, പുഥൂ സമണബ്രാഹ്മണേ.
൧൫൬. യദാ ച സരസമ്പന്നോ, ബുദ്ധോ ധമ്മം അദേസയി;
അഥ ലാഭോ ച സക്കാരോ, തിത്ഥിയാനം അഹായഥാതി.
ബാവേരുജാതകം നവമം.
൩൪൦. വിസയ്ഹജാതകം (൪-൪-൧൦)
൧൫൭. അദാസി ദാനാനി പുരേ വിസയ്ഹ, ദദതോ ച തേ ഖയധമ്മോ അഹോസി;
ഇതോ പരം ചേ ന ദദേയ്യ ദാനം, തിട്ഠേയ്യും തേ സംയമന്തസ്സ ഭോഗാ.
൧൫൮. അനരിയമരിയേന സഹസ്സനേത്ത, സുദുഗ്ഗതേനാപി അകിച്ചമാഹു;
മാ വോ ധനം തം അഹു ദേവരാജ [അഹുവാ ജനിന്ദ (ക. സീ. സ്യാ. പീ.)], യം ഭോഗഹേതു വിജഹേമു സദ്ധം.
൧൫൯. യേന ഏകോ രഥോ യാതി, യാതി തേനാപരോ രഥോ;
പോരാണം നിഹിതം വത്തം, വത്തതഞ്ഞേവ [വദ്ധം, വദ്ധതഞ്ഞേവ (ക. സീ. പീ.)] വാസവ.
൧൬൦. യദി ഹേസ്സതി ദസ്സാമ, അസന്തേ കിം ദദാമസേ;
ഏവംഭൂതാപി ദസ്സാമ, മാ ദാനം പമദമ്ഹസേതി.
വിസയ്ഹജാതകം ദസമം.
കോകിലവഗ്ഗോ [കോകാലികവഗ്ഗോ (ക.)] ചതുത്ഥോ.
തസ്സുദ്ദാനം –
അതിവേലപഭാസതി ജീതവരോ, വനമജ്ഝ രഥേസഭ ജിമ്ഹഗമോ;
അഥ ജമ്ബു തിണാസനപീഠവരം, അഥ തണ്ഡുല മോര വിസയ്ഹ ദസാതി.