൫. ചൂളകുണാലവഗ്ഗോ
൩൪൧. കണ്ഡരീജാതകം (൪-൫-൧)
൧൬൧. നരാനമാരാമകരാസു നാരിസു, അനേകചിത്താസു അനിഗ്ഗഹാസു ച;
സബ്ബത്ഥ നാപീതികരാപി [സബ്ബ’ത്തനാ’പീതികരാപി (സീ. സ്യാ.)] ചേ സിയാ [സിയും (സ്യാ.)], ന വിസ്സസേ തിത്ഥസമാ ഹി നാരിയോ.
൧൬൨. യം വേ [യഞ്ച (സ്യാ. ക.)] ദിസ്വാ കണ്ഡരീകിന്നരാനം [കിന്നരകിന്നരീനം (സ്യാ.), കിന്നരീകിന്നരാനം (ക.)], സബ്ബിത്ഥിയോ ന രമന്തി അഗാരേ;
തം താദിസം മച്ചം ചജിത്വാ ഭരിയാ, അഞ്ഞം ദിസ്വാ പുരിസം പീഠസപ്പിം.
൧൬൩. ബകസ്സ ച ബാവരികസ്സ [പാവാരികസ്സ (സീ.)] രഞ്ഞോ, അച്ചന്തകാമാനുഗതസ്സ ഭരിയാ;
അവാചരീ [അച്ചാചരി (സ്യാ.), അനാചരി (ക.)] പട്ഠവസാനുഗസ്സ [ബദ്ധവസാനുഗസ്സ (സീ. സ്യാ.), പത്തവസാനുഗതസ്സ (ക.)], കം വാപി ഇത്ഥീ നാതിചരേ തദഞ്ഞം.
൧൬൪. പിങ്ഗിയാനീ സബ്ബലോകിസ്സരസ്സ, രഞ്ഞോ പിയാ ബ്രഹ്മദത്തസ്സ ഭരിയാ;
അവാചരീ പട്ഠവസാനുഗസ്സ, തം വാപി സാ നാജ്ഝഗാ കാമകാമിനീതി.
കണ്ഡരീജാതകം [കിന്നരീജാതകം (ക. സീ. ക.), കുണ്ഡലികജാതകം (സ്യാ.)] പഠമം.
൩൪൨. വാനരജാതകം (൪-൫-൨)
൧൬൫. അസക്ഖിം വത അത്താനം, ഉദ്ധാതും ഉദകാ ഥലം;
ന ദാനാഹം പുന തുയ്ഹം, വസം ഗച്ഛാമി വാരിജ.
൧൬൬. അലമേതേഹി അമ്ബേഹി, ജമ്ബൂഹി പനസേഹി ച;
യാനി പാരം സമുദ്ദസ്സ, വരം മയ്ഹം ഉദുമ്ബരോ.
൧൬൭. യോ ച ഉപ്പതിതം അത്ഥം, ന ഖിപ്പമനുബുജ്ഝതി;
അമിത്തവസമന്വേതി, പച്ഛാ ച അനുതപ്പതി.
൧൬൮. യോ ച ഉപ്പതിതം അത്ഥം, ഖിപ്പമേവ നിബോധതി;
മുച്ചതേ സത്തുസമ്ബാധാ, ന ച പച്ഛാനുതപ്പതീതി.
വാനരജാതകം ദുതിയം.
൩൪൩. കുന്തിനീജാതകം (൪-൫-൩)
൧൬൯. അവസിമ്ഹ തവാഗാരേ, നിച്ചം സക്കതപൂജിതാ;
ത്വമേവ ദാനിമകരി, ഹന്ദ രാജ വജാമഹം.
൧൭൦. യോ വേ കതേ പടികതേ, കിബ്ബിസേ പടികിബ്ബിസേ;
ഏവം തം സമ്മതീ വേരം, വസ കുന്തിനി മാഗമാ.
൧൭൧. ന കതസ്സ ച കത്താ ച, മേത്തി [മേത്തീ (പീ.), മിത്തീ (ക.)] സന്ധീയതേ പുന;
ഹദയം നാനുജാനാതി, ഗച്ഛഞ്ഞേവ രഥേസഭ.
൧൭൨. കതസ്സ ചേവ കത്താ ച, മേത്തി സന്ധീയതേ പുന;
ധീരാനം നോ ച ബാലാനം, വസ കുന്തിനി മാഗമാതി.
കുന്തിനീജാതകം തതിയം.
൩൪൪. അമ്ബജാതകം (൪-൫-൪)
൧൭൩. യോ നീലിയം മണ്ഡയതി, സണ്ഡാസേന വിഹഞ്ഞതി;
തസ്സ സാ വസമന്വേതു, യാ തേ അമ്ബേ അവാഹരി.
൧൭൪. വീസം വാ പഞ്ചവീസം [പണ്ണുവീസം (ക. സീ. പീ.)] വാ, ഊനതിംസം വ ജാതിയാ;
താദിസാ പതി മാ ലദ്ധാ [പതിം മാ ലദ്ധാ (പീ.), പതി മാ’ലത്ഥ (?)], യാ തേ അമ്ബേ അവാഹരി.
൧൭൫. ദീഘം ഗച്ഛതു അദ്ധാനം, ഏകികാ അഭിസാരികാ;
സങ്കേതേ പതി മാ അദ്ദ [മാ അദ്ദസ (സീ. പീ.)], യാ തേ അമ്ബേ അവാഹരി.
൧൭൬. അലങ്കതാ സുവസനാ, മാലിനീ ചന്ദനുസ്സദാ;
ഏകികാ സയനേ സേതു, യാ തേ അമ്ബേ അവാഹരീതി.
അമ്ബജാതകം [അമ്ബചോരജാതകം (ക. സീ. പീ.)] ചതുത്ഥം.
൩൪൫. ഗജകുമ്ഭജാതകം (൪-൫-൫)
൧൭൭. വനം യദഗ്ഗി ദഹതി, പാവകോ കണ്ഹവത്തനീ;
കഥം കരോസി പചലക, ഏവം ദന്ധപരക്കമോ.
൧൭൮. ബഹൂനി രുക്ഖഛിദ്ദാനി, പഥബ്യാ വിവരാനി ച;
താനി ചേ നാഭിസമ്ഭോമ, ഹോതി നോ കാലപരിയായോ.
൧൭൯. യോ ദന്ധകാലേ തരതി, തരണീയേ ച ദന്ധതി;
സുക്ഖപണ്ണംവ അക്കമ്മ, അത്ഥം ഭഞ്ജതി അത്തനോ.
൧൮൦. യോ ദന്ധകാലേ ദന്ധേതി, തരണീയേ ച താരയി;
സസീവ രത്തിം വിഭജം, തസ്സത്ഥോ പരിപൂരതീതി.
ഗജകുമ്ഭജാതകം പഞ്ചമം.
൩൪൬. കേസവജാതകം (൪-൫-൬)
൧൮൧. മനുസ്സിന്ദം ജഹിത്വാന, സബ്ബകാമസമിദ്ധിനം;
കഥം നു ഭഗവാ കേസീ, കപ്പസ്സ രമതി അസ്സമേ [രമതസ്സമേ (ക.)].
൧൮൨. സാദൂനീ [സാധൂനി (ക. സീ. സ്യാ. ക.)] രമണീയാനി, സന്തി വക്ഖാ മനോരമാ;
സുഭാസിതാനി കപ്പസ്സ, നാരദ രമയന്തി മം.
൧൮൩. സാലീനം ഓദനം ഭുഞ്ജേ, സുചിം മംസൂപസേചനം;
കഥം സാമാകനീവാരം, അലോണം ഛാദയന്തി തം.
൧൮൪. സാദും വാ [അസാദും (പീ.)] യദി വാസാദും, അപ്പം വാ യദി വാ ബഹും;
വിസ്സത്ഥോ യത്ഥ ഭുഞ്ജേയ്യ, വിസ്സാസപരമാ രസാതി.
കേസവജാതകം [കേസീജാതകം (ക.)] ഛട്ഠം.
൩൪൭. അയകൂടജാതകം (൪-൫-൭)
൧൮൫. സബ്ബായസം കൂടമതിപ്പമാണം, പഗ്ഗയ്ഹ യോ [സോ (പീ.)] തിട്ഠസി അന്തലിക്ഖേ;
രക്ഖായ മേ [മം (സീ.)] ത്വം വിഹിതോ നുസജ്ജ, ഉദാഹു മേ ചേതയസേ [വായമസേ (സീ. സ്യാ.)] വധായ.
൧൮൬. ദൂതോ അഹം രാജിധ രക്ഖസാനം, വധായ തുയ്ഹം പഹിതോഹമസ്മി;
ഇന്ദോ ച തം രക്ഖതി ദേവരാജാ, തേനുത്തമങ്ഗം ന തേ [ന ഹി (ക. സീ. പീ.), തേ ന (ക.)] ഫാലയാമി.
൧൮൭. സചേ ച മം രക്ഖതി ദേവരാജാ, ദേവാനമിന്ദോ മഘവാ സുജമ്പതി;
കാമം പിസാചാ വിനദന്തു സബ്ബേ, ന സന്തസേ രക്ഖസിയാ പജായ.
൧൮൮. കാമം കന്ദന്തു [കന്തന്തു (ക.), കണ്ഡന്തു (സ്യാ.)] കുമ്ഭണ്ഡാ, സബ്ബേ പംസുപിസാചകാ;
നാലം പിസാചാ യുദ്ധായ, മഹതീ സാ വിഭിംസികാതി [വിഭേസികാതി (സ്യാ.), വിഹേസികാതി (പീ.)].
അയകൂടജാതകം സത്തമം.
൩൪൮. അരഞ്ഞജാതകം (൪-൫-൮)
൧൮൯. അരഞ്ഞാ ഗാമമാഗമ്മ, കിംസീലം കിംവതം അഹം;
പുരിസം താത സേവേയ്യം, തം മേ അക്ഖാഹി പുച്ഛിതോ.
൧൯൦. യോ തം വിസ്സാസയേ താത, വിസ്സാസഞ്ച ഖമേയ്യ തേ;
സുസ്സൂസീ ച തിതിക്ഖീ ച, തം ഭജേഹി ഇതോ [തം ഭജേയ്യാസിതോ (ക.)] ഗതോ.
൧൯൧. യസ്സ കായേന വാചായ, മനസാ നത്ഥി ദുക്കടം;
ഉരസീവ പതിട്ഠായ, തം ഭജേഹി ഇതോ ഗതോ.
൧൯൨. ഹലിദ്ദിരാഗം കപിചിത്തം, പുരിസം രാഗവിരാഗിനം;
താദിസം താത മാ സേവി, നിമ്മനുസ്സമ്പി ചേ സിയാതി.
അരഞ്ഞജാതകം അട്ഠമം.
൩൪൯. സന്ധിഭേദജാതകം (൪-൫-൯)
൧൯൩. നേവ ഇത്ഥീസു സാമഞ്ഞം, നാപി ഭക്ഖേസു സാരഥി;
അഥസ്സ സന്ധിഭേദസ്സ, പസ്സ യാവ സുചിന്തിതം.
൧൯൪. അസി തിക്ഖോവ മംസമ്ഹി, പേസുഞ്ഞം പരിവത്തതി;
യത്ഥൂസഭഞ്ച സീഹഞ്ച, ഭക്ഖയന്തി മിഗാധമാ.
൧൯൫. ഇമം സോ സയനം സേതി, യമിമം [യയിമം (സീ. പീ.), യിമം (ക.)] പസ്സസി സാരഥി;
യോ വാചം സന്ധിഭേദസ്സ, പിസുണസ്സ നിബോധതി.
൧൯൬. തേ ജനാ സുഖമേധന്തി, നരാ സഗ്ഗഗതാരിവ;
യേ വാചം സന്ധിഭേദസ്സ, നാവബോധന്തി സാരഥീതി.
സന്ധിഭേദജാതകം നവമം.
൩൫൦. ദേവതാപഞ്ഹജാതകം (൪-൫-൧൦)
൧൯൭. ഹന്തി ഹത്ഥേഹി പാദേഹി, മുഖഞ്ച പരിസുമ്ഭതി;
സ വേ രാജ പിയോ ഹോതി, കം തേന ത്വാഭിപസ്സസി [മഭിപസ്സസി (സീ.)].
൧൯൮. അക്കോസതി യഥാകാമം, ആഗമഞ്ചസ്സ ഇച്ഛതി;
സ വേ രാജ പിയോ ഹോതി, കം തേന ത്വാഭിപസ്സസി.
൧൯൯. അബ്ഭക്ഖാതി അഭൂതേന, അലികേനാഭിസാരയേ;
സ വേ രാജ പിയോ ഹോതി, കം തേന ത്വാഭിപസ്സസി.
൨൦൦. ഹരം അന്നഞ്ച പാനഞ്ച, വത്ഥസേനാസനാനി ച;
അഞ്ഞദത്ഥുഹരാ സന്താ, തേ വേ രാജ പിയാ ഹോന്തി;
കം തേന ത്വാഭിപസ്സസീതി.
ദേവതാപഞ്ഹജാതകം ദസമം.
ചൂളകുണാലവഗ്ഗോ പഞ്ചമോ.
തസ്സുദ്ദാനം –
നരാനം അസക്ഖിവസിമ്ഹവരോ, നീലിയമഗ്ഗിവരഞ്ച പുന;
പുന രസായസകൂടവരോ, തഥാരഞ്ഞ സാരഥി ഹന്തി ദസാതി.
അഥ വഗ്ഗുദ്ദാനം –
കാലിങ്ഗം [വിവരം (ബഹൂസു)] പുചിമന്ദഞ്ച, കുടിദൂസക കോകിലാ [കുടിദൂസം ബഹുഭാണകം (ബഹൂസു)];
ചൂളകുണാലവഗ്ഗോ സോ, പഞ്ചമോ സുപ്പകാസിതോതി.
ചതുക്കനിപാതം നിട്ഠിതം.