൩. കുടിദൂസകവഗ്ഗോ
൩൨൧. കുടിദൂസകജാതകം (൪-൩-൧)
൮൧. മനുസ്സസ്സേവ തേ സീസം, ഹത്ഥപാദാ ച വാനര;
അഥ കേന നു വണ്ണേന, അഗാരം തേ ന വിജ്ജതി.
൮൨. മനുസ്സസ്സേവ മേ സീസം, ഹത്ഥപാദാ ച സിങ്ഗില [സിങ്ഗാല (ക.), പിങ്ഗല (ടീകാ)];
യാഹു സേട്ഠാ മനുസ്സേസു, സാ മേ പഞ്ഞാ ന വിജ്ജതി.
൮൩. അനവട്ഠിതചിത്തസ്സ, ലഹുചിത്തസ്സ ദുബ്ഭിനോ [ദൂഭിനോ (പീ.)];
നിച്ചം അദ്ധുവസീലസ്സ, സുഖഭാവോ [സുചിഭാവോ (സീ.), സുഖഭാഗോ (?)] ന വിജ്ജതി.
൮൪. സോ കരസ്സു ആനുഭാവം, വീതിവത്തസ്സു സീലിയം;
സീതവാതപരിത്താണം, കരസ്സു കുടവം [കുടികം (സീ. സ്യാ.)] കപീതി.
കുടിദൂസക [സിങ്ഗാലസകുണ (ക.)] ജാതകം പഠമം.
൩൨൨. ദുദ്ദുഭജാതകം (൪-൩-൨)
൮൫. ദുദ്ദുഭായതി [ദദ്ദഭായതി (സീ. പീ.)] ഭദ്ദന്തേ, യസ്മിം ദേസേ വസാമഹം;
അഹമ്പേതം ന ജാനാമി, കിമേതം ദുദ്ദുഭായതി.
൮൬. ബേലുവം പതിതം സുത്വാ, ദുദ്ദുഭന്തി [ദദ്ദഭന്തി (സീ.)] സസോ ജവി;
സസസ്സ വചനം സുത്വാ, സന്തത്താ മിഗവാഹിനീ.
൮൭. അപ്പത്വാ പദവിഞ്ഞാണം, പരഘോസാനുസാരിനോ;
പനാദപരമാ ബാലാ, തേ ഹോന്തി പരപത്തിയാ.
൮൮. യേ ച സീലേന സമ്പന്നാ, പഞ്ഞായൂപസമേ രതാ;
ആരകാ വിരതാ ധീരാ, ന ഹോന്തി പരപത്തിയാതി.
ദുദ്ദുഭജാതകം [ദദ്ദഭജാതകം (സീ. പീ.)] ദുതിയം.
൩൨൩. ബ്രഹ്മദത്തജാതകം (൪-൩-൩)
൮൯. ദ്വയം യാചനകോ രാജ, ബ്രഹ്മദത്ത നിഗച്ഛതി;
അലാഭം ധനലാഭം വാ, ഏവം ധമ്മാ ഹി യാചനാ.
൯൦. യാചനം രോദനം ആഹു, പഞ്ചാലാനം രഥേസഭ;
യോ യാചനം പച്ചക്ഖാതി, തമാഹു പടിരോദനം.
൯൧. മാ മദ്ദസംസു രോദന്തം, പഞ്ചാലാ സുസമാഗതാ;
തുവം വാ പടിരോദന്തം, തസ്മാ ഇച്ഛാമഹം രഹോ.
൯൨. ദദാമി തേ ബ്രാഹ്മണ രോഹിണീനം, ഗവം സഹസ്സം സഹ പുങ്ഗവേന;
അരിയോ ഹി അരിയസ്സ കഥം ന ദജ്ജാ [ദജ്ജേ (സീ.), ദജ്ജം (?)], സുത്വാന ഗാഥാ തവ ധമ്മയുത്താതി.
ബ്രഹ്മദത്തജാതകം തതിയം.
൩൨൪. ചമ്മസാടകജാതകം (൪-൩-൪)
൯൩. കല്യാണരൂപോ വതയം ചതുപ്പദോ, സുഭദ്ദകോ ചേവ സുപേസലോ ച;
യോ ബ്രാഹ്മണം ജാതിമന്തൂപപന്നം, അപചായതി മേണ്ഡവരോ യസസ്സീ.
൯൪. മാ ബ്രാഹ്മണ ഇത്തരദസ്സനേന, വിസ്സാസമാപജ്ജി ചതുപ്പദസ്സ;
ദള്ഹപ്പഹാരം അഭികങ്ഖമാനോ [അഭികത്തുകാമോ (സ്യാ.)], അവസക്കതീ ദസ്സതി സുപ്പഹാരം.
൯൫. ഊരുട്ഠി [ഊരട്ഠി (സീ.)] ഭഗ്ഗം പവട്ടിതോ [പതിതോ (സീ. സ്യാ.)] ഖാരിഭാരോ, സബ്ബഞ്ച ഭണ്ഡം ബ്രാഹ്മണസ്സ [ബ്രാഹ്മണസ്സീധ (ക. സീ. പീ.), ബ്രാഹ്മണസ്സേവ (ക. സീ. സ്യാ. ക.)] ഭിന്നം;
ഉഭോപി ബാഹാ പഗ്ഗയ്ഹ [പഗ്ഗയ്യേവ (സ്യാ.), പഗ്ഗഹീയ (?)] കന്ദതി [ബാഹാ പഗ്ഗയ്യ കന്ദതി (പീ. ക.)], അഭിധാവഥ ഹഞ്ഞതേ ബ്രഹ്മചാരീ.
൯൬. ഏവം സോ നിഹതോ സേതി, യോ അപൂജം പസംസതി [നമസ്സതി (പീ.)];
യഥാഹമജ്ജ പഹതോ, ഹതോ മേണ്ഡേന ദുമ്മതീതി.
ചമ്മസാടകജാതകം ചതുത്ഥം.
൩൨൫. ഗോധരാജജാതകം (൪-൩-൫)
൯൭. സമണം തം മഞ്ഞമാനോ, ഉപഗച്ഛിമസഞ്ഞതം;
സോ മം ദണ്ഡേന പാഹാസി, യഥാ അസ്സമണോ തഥാ.
൯൮. കിം തേ ജടാഹി ദുമ്മേധ, കിം തേ അജിനസാടിയാ;
അബ്ഭന്തരം തേ ഗഹനം, ബാഹിരം പരിമജ്ജസി.
൯൯. ഏഹി ഗോധ നിവത്തസ്സു, ഭുഞ്ജ സാലീനമോദനം;
തേലം ലോണഞ്ച മേ അത്ഥി, പഹൂതം മയ്ഹ പിപ്ഫലി.
൧൦൦. ഏസ ഭിയ്യോ പവേക്ഖാമി, വമ്മികം സതപോരിസം;
തേലം ലോണഞ്ച കിത്തേസി [കിന്തേസി (സ്യാ. പീ.)], അഹിതം മയ്ഹ പിപ്ഫലീതി.
ഗോധരാജജാതകം പഞ്ചമം.
൩൨൬. കക്കാരുജാതകം (൪-൩-൬)
൧൦൧. കായേന യോ നാവഹരേ, വാചായ ന മുസാ ഭണേ;
യസോ ലദ്ധാ ന മജ്ജേയ്യ, സ വേ കക്കാരുമരഹതി.
൧൦൨. ധമ്മേന വിത്തമേസേയ്യ, ന നികത്യാ ധനം ഹരേ;
ഭോഗേ ലദ്ധാ ന മജ്ജേയ്യ, സ വേ കക്കാരുമരഹതി.
൧൦൩. യസ്സ ചിത്തം അഹാലിദ്ദം, സദ്ധാ ച അവിരാഗിനീ;
ഏകോ സാദും ന ഭുഞ്ജേയ്യ, സ വേ കക്കാരുമരഹതി.
൧൦൪. സമ്മുഖാ വാ തിരോക്ഖാ വാ [പരോക്ഖാ വാ (പീ.), പരമ്മുഖാ (ക.)], യോ സന്തേ ന പരിഭാസതി;
യഥാവാദീ തഥാകാരീ, സ വേ കക്കാരുമരഹതീതി.
കക്കാരുജാതകം ഛട്ഠം.
൩൨൭. കാകവതീജാതകം (൪-൩-൭)
൧൦൫. വാതി ചായം [വായം (ക.)] തതോ ഗന്ധോ, യത്ഥ മേ വസതീ പിയാ;
ദൂരേ ഇതോ ഹി കാകവതീ [കാകാതീ (സീ.), കാകാതി (സ്യാ. പീ.)], യത്ഥ മേ നിരതോ മനോ.
൧൦൬. കഥം സമുദ്ദമതരീ, കഥം അതരി കേപുകം [കേബുകം (സീ. പീ.)];
കഥം സത്ത സമുദ്ദാനി, കഥം സിമ്ബലിമാരുഹി.
൧൦൭. തയാ സമുദ്ദമതരിം, തയാ അതരി കേപുകം [കേബുകം (സീ. പീ.)];
തയാ സത്ത സമുദ്ദാനി, തയാ സിമ്ബലിമാരുഹിം.
൧൦൮. ധിരത്ഥുമം മഹാകായം, ധിരത്ഥുമം അചേതനം;
യത്ഥ ജായായഹം ജാരം, ആവഹാമി വഹാമി ചാതി.
കാകവതീജാതകം സത്തമം.
൩൨൮. അനനുസോചിയജാതകം (൪-൩-൮)
൧൦൯. ബഹൂനം വിജ്ജതീ ഭോതീ, തേഹി മേ കിം ഭവിസ്സതി;
തസ്മാ ഏതം ന സോചാമി, പിയം സമ്മില്ലഹാസിനിം.
൧൧൦. തം തം ചേ അനുസോചേയ്യ, യം യം തസ്സ ന വിജ്ജതി;
അത്താനമനുസോചേയ്യ, സദാ മച്ചുവസം പതം.
൧൧൧. ന ഹേവ ഠിതം നാസീനം, ന സയാനം ന പദ്ധഗും [പത്ഥഗും (സ്യാ.)];
യാവ ബ്യാതി നിമിസതി, തത്രാപി രസതീ [സരതീ (സീ. സ്യാ. പീ.)] വയോ.
൧൧൨. തത്ഥത്തനി വതപ്പദ്ധേ [വത പന്ഥേ (സ്യാ.), വത ബന്ധേ (ക.) വത + പ-അദ്ധേ = വതപ്പദ്ധേ], വിനാഭാവേ അസംസയേ;
ഭൂതം സേസം ദയിതബ്ബം, വീതം അനനുസോചിയന്തി [ചവിതം നാനുസോചിയന്തി (സ്യാ.), മതന്തം നാനുസോചിയം (ക.)].
അനനുസോചിയജാതകം അട്ഠമം.
൩൨൯. കാളബാഹുജാതകം (൪-൩-൯)
൧൧൩. യം അന്നപാനസ്സ പുരേ ലഭാമ, തം ദാനി സാഖമിഗമേവ ഗച്ഛതി;
ഗച്ഛാമ ദാനി വനമേവ രാധ, അസക്കതാ ചസ്മ ധനഞ്ജയായ [ധനഞ്ചയായ (ക.)].
൧൧൪. ലാഭോ അലാഭോ യസോ അയസോ ച, നിന്ദാ പസംസാ ച സുഖഞ്ച ദുക്ഖം;
ഏതേ അനിച്ചാ മനുജേസു ധമ്മാ, മാ സോചി കിം സോചസി പോട്ഠപാദ.
൧൧൫. അദ്ധാ തുവം പണ്ഡിതകോസി രാധ, ജാനാസി അത്ഥാനി അനാഗതാനി;
കഥം നു സാഖാമിഗം ദക്ഖിസാമ [ദക്ഖിയാമ (ക.), ദക്ഖാമ (സ്യാ.)], നിദ്ധാവിതം [നിദ്ധാപിതം (സീ. സ്യാ.), നിബ്ബാപിതം (പീ.), നിച്ഛദം (ക.)] രാജകുലതോവ ജമ്മം.
൧൧൬. ചാലേതി കണ്ണം ഭകുടിം കരോതി, മുഹും മുഹും ഭായയതേ [ഭായതേ (സ്യാ.), ഭായാപതേ (ക.)] കുമാരേ;
സയമേവ തം കാഹതി കാളബാഹു, യേനാരകാ ഠസ്സതി അന്നപാനാതി.
കാളബാഹുജാതകം നവമം.
൩൩൦. സീലവീമംസജാതകം (൪-൩-൧൦)
൧൧൭. സീലം കിരേവ കല്യാണം, സീലം ലോകേ അനുത്തരം;
പസ്സ ഘോരവിസോ നാഗോ, സീലവാതി ന ഹഞ്ഞതി.
൧൧൮. യാവദേവസ്സഹൂ കിഞ്ചി, താവദേവ അഖാദിസും;
സങ്ഗമ്മ കുലലാ ലോകേ, ന ഹിംസന്തി അകിഞ്ചനം.
൧൧൯. സുഖം നിരാസാ സുപതി, ആസാ ഫലവതീ സുഖാ;
ആസം നിരാസം കത്വാന, സുഖം സുപതി പിങ്ഗലാ.
൧൨൦. ന സമാധിപരോ അത്ഥി, അസ്മിം ലോകേ പരമ്ഹി ച;
ന പരം നാപി അത്താനം, വിഹിംസതി സമാഹിതോതി.
സീലവീമംസജാതകം ദസമം.
കുടിദൂസകവഗ്ഗോ തതിയോ.
തസ്സുദ്ദാനം –
സമനുസ്സ -സദുദ്ദുഭ-യാചനകോ, അഥ മേണ്ഡവരുത്തമ-ഗോധവരോ;
അഥ കായസകേപുക ഭോതീവരോ, അഥ രാധസുസീലവരേന ദസാതി.