൪. അബ്ഭന്തരവഗ്ഗോ
൨൮൧. അബ്ഭന്തരജാതകം (൩-൪-൧)
൯൧. അബ്ഭന്തരോ നാമ ദുമോ, യസ്സ ദിബ്യമിദം ഫലം;
ഭുത്വാ ദോഹളിനീ നാരീ, ചക്കവത്തിം വിജായതി.
൯൨. ത്വമ്പി [ത്വഞ്ച (സീ. പീ.), ത്വം ഹി (ക.)] ഭദ്ദേ മഹേസീസി, സാ ചാപി [ചാസി (സീ. പീ.)] പതിനോ പിയാ;
ആഹരിസ്സതി തേ രാജാ, ഇദം അബ്ഭന്തരം ഫലം.
൯൩. ഭത്തുരത്ഥേ പരക്കന്തോ, യം ഠാനമധിഗച്ഛതി;
സൂരോ അത്തപരിച്ചാഗീ, ലഭമാനോ ഭവാമഹന്തി.
അബ്ഭന്തരജാതകം പഠമം.
൨൮൨. സേയ്യജാതകം (൩-൪-൨)
൯൪. സേയ്യംസോ സേയ്യസോ ഹോതി, യോ സേയ്യമുപസേവതി;
ഏകേന സന്ധിം കത്വാന, സതം വജ്ഝേ [മച്ചേ (ക.), ബജ്ഝേ (ക. അട്ഠ.)] അമോചയിം.
൯൫. [കസ്മാ…പേ… സഗ്ഗം ന ഗച്ഛേയ്യ (കത്ഥചി)] തസ്മാ സബ്ബേന ലോകേന, സന്ധിം കത്വാന ഏകതോ [ഏകകോ (സീ. സ്യാ. പീ.)];
പേച്ച സഗ്ഗം നിഗച്ഛേയ്യ [കസ്മാ…പേ… സഗ്ഗം ന ഗച്ഛേയ്യ (കത്ഥചി)], ഇദം സുണാഥ കാസിയാ [കാസയോ (സീ. പീ.)].
൯൬. ഇദം വത്വാ മഹാരാജാ, കംസോ ബാരാണസിഗ്ഗഹോ;
ധനും കണ്ഡഞ്ച [തൂണിഞ്ച (സീ. പീ.)] നിക്ഖിപ്പ, സംയമം അജ്ഝുപാഗമീതി.
സേയ്യജാതകം ദുതിയം.
൨൮൩. വഡ്ഢകീസൂകരജാതകം (൩-൪-൩)
൯൭. വരം വരം ത്വം നിഹനം പുരേ ചരി, അസ്മിം പദേസേ അഭിഭുയ്യ സൂകരേ;
സോ ദാനി ഏകോ ബ്യപഗമ്മ ഝായസി, ബലം നു തേ ബ്യഗ്ഘ ന ചജ്ജ വിജ്ജതി.
൯൮. ഇമേ സുദം [ഇമസ്സു താ (സ്യാ. ക.)] യന്തി ദിസോദിസം പുരേ, ഭയട്ടിതാ ലേണഗവേസിനോ പുഥു;
തേ ദാനി സങ്ഗമ്മ വസന്തി ഏകതോ, യത്ഥട്ഠിതാ ദുപ്പസഹജ്ജമേ [ദുപ്പസഹജ്ജിമേ (സ്യാ.)] മയാ.
൯൯. നമത്ഥു സങ്ഘാന സമാഗതാനം, ദിസ്വാ സയം സഖ്യ വദാമി അബ്ഭുതം;
ബ്യഗ്ഘം മിഗാ യത്ഥ ജിനിംസു ദാഠിനോ, സാമഗ്ഗിയാ ദാഠബലേസു മുച്ചരേതി.
വഡ്ഢകീസൂകരജാതകം തതിയം.
൨൮൪. സിരിജാതകം (൩-൪-൪)
൧൦൦. യം ഉസ്സുകാ സങ്ഘരന്തി, അലക്ഖികാ ബഹും ധനം;
സിപ്പവന്തോ അസിപ്പാ ച, ലക്ഖിവാ താനി ഭുഞ്ജതി.
൧൦൧. സബ്ബത്ഥ കതപുഞ്ഞസ്സ, അതിച്ചഞ്ഞേവ പാണിനോ;
ഉപ്പജ്ജന്തി ബഹൂ ഭോഗാ, അപ്പനായതനേസുപി.
൧൦൨. കുക്കുടോ [കുക്കുട (സീ. പീ.), കുക്കുടാ (സീ. നിസ്സയ, സദ്ദനീതി)] മണയോ ദണ്ഡോ, ഥിയോ ച പുഞ്ഞലക്ഖണാ;
ഉപ്പജ്ജന്തി അപാപസ്സ, കതപുഞ്ഞസ്സ ജന്തുനോതി.
സിരിജാതകം ചതുത്ഥം.
൨൮൫. മണിസൂകരജാതകം (൩-൪-൫)
൧൦൩. ദരിയാ സത്ത വസ്സാനി, തിംസമത്താ വസാമസേ;
ഹഞ്ഞാമ [ഹഞ്ഛേമ (സീ. പീ.), ഹഞ്ഛാമ (?)] മണിനോ ആഭം, ഇതി നോ മന്തനം അഹു.
൧൦൪. യാവതാ മണിം ഘംസാമ [യാവ യാവ നിഘംസാമ (സീ. പീ.)], ഭിയ്യോ വോദായതേ മണി;
ഇദഞ്ച ദാനി പുച്ഛാമ, കിം കിച്ചം ഇധ മഞ്ഞസി.
൧൦൫. അയം മണി വേളൂരിയോ, അകാചോ വിമലോ [വിപുലോ (ക.)] സുഭോ;
നാസ്സ സക്കാ സിരിം ഹന്തും, അപക്കമഥ സൂകരാതി.
മണിസൂകര [മണിഘംസ (ക.)] ജാതകം പഞ്ചമം.
൨൮൬. സാലൂകജാതകം (൩-൪-൬)
൧൦൬. മാ സാലൂകസ്സ പിഹയി, ആതുരന്നാനി ഭുഞ്ജതി;
അപ്പോസ്സുക്കോ ഭുസം ഖാദ, ഏതം ദീഘായുലക്ഖണം.
൧൦൭. ഇദാനി സോ ഇധാഗന്ത്വാ, അതിഥീ യുത്തസേവകോ;
അഥ ദക്ഖസി സാലൂകം, സയന്തം മുസലുത്തരം.
൧൦൮. വികന്തം [വികത്തം (സീ.), വികന്തിയമാനം ഛിന്ദിയമാനംതി അത്ഥോ] സൂകരം ദിസ്വാ, സയന്തം മുസലുത്തരം;
ജരഗ്ഗവാ വിചിന്തേസും, വരമ്ഹാകം ഭുസാമിവാതി.
സാലൂകജാതകം ഛട്ഠം.
൨൮൭. ലാഭഗരഹജാതകം (൩-൪-൭)
൧൦൯. നാനുമ്മത്തോ നാപിസുണോ, നാനടോ നാകുതൂഹലോ;
മൂള്ഹേസു ലഭതേ ലാഭം, ഏസാ തേ അനുസാസനീ.
൧൧൦. ധിരത്ഥു തം യസലാഭം, ധനലാഭഞ്ച ബ്രാഹ്മണ;
യാ വുത്തി വിനിപാതേന, അധമ്മചരണേന [അധമ്മചരിയായ (സീ. സ്യാ.)] വാ.
൧൧൧. അപി ചേ പത്തമാദായ, അനഗാരോ പരിബ്ബജേ;
ഏസാവ ജീവികാ സേയ്യോ [സേയ്യാ (സീ. സ്യാ. പീ.)], യാ ചാധമ്മേന ഏസനാതി.
ലാഭഗരഹജാതകം സത്തമം.
൨൮൮. മച്ഛുദ്ദാനജാതകം (൩-൪-൮)
൧൧൨. അഗ്ഘന്തി മച്ഛാ അധികം സഹസ്സം, ന സോ അത്ഥി യോ ഇമം സദ്ദഹേയ്യ;
മയ്ഹഞ്ച അസ്സു ഇധ സത്ത മാസാ, അഹമ്പി തം മച്ഛുദ്ദാനം കിണേയ്യം.
൧൧൩. മച്ഛാനം ഭോജനം ദത്വാ, മമ ദക്ഖിണമാദിസി;
തം ദക്ഖിണം സരന്തിയാ, കതം അപചിതിം തയാ.
൧൧൪. പദുട്ഠചിത്തസ്സ ന ഫാതി ഹോതി, ന ചാപി തം [നം (സീ. സ്യാ.)] ദേവതാ പൂജയന്തി;
യോ ഭാതരം പേത്തികം സാപതേയ്യം, അവഞ്ചയീ ദുക്കടകമ്മകാരീതി.
മച്ഛുദ്ദാനജാതകം അട്ഠമം.
൨൮൯. നാനാഛന്ദജാതകം (൩-൪-൯)
൧൧൫. നാനാഛന്ദാ മഹാരാജ, ഏകാഗാരേ വസാമസേ;
അഹം ഗാമവരം ഇച്ഛേ, ബ്രാഹ്മണീ ച ഗവം സതം.
൧൧൬. പുത്തോ ച ആജഞ്ഞരഥം, കഞ്ഞാ ച മണികുണ്ഡലം;
യാ ചേസാ പുണ്ണികാ ജമ്മീ, ഉദുക്ഖലംഭികങ്ഖതി.
൧൧൭. ബ്രാഹ്മണസ്സ ഗാമവരം, ബ്രാഹ്മണിയാ ഗവം സതം;
പുത്തസ്സ ആജഞ്ഞരഥം, കഞ്ഞായ മണികുണ്ഡലം;
യഞ്ചേതം പുണ്ണികം ജമ്മിം, പടിപാദേഥുദുക്ഖലന്തി.
നാനാഛന്ദജാതകം നവമം.
൨൯൦. സീലവീമംസകജാതകം (൩-൪-൧൦)
൧൧൮. സീലം കിരേവ കല്യാണം, സീലം ലോകേ അനുത്തരം;
പസ്സ ഘോരവിസോ നാഗോ, സീലവാതി ന ഹഞ്ഞതി.
൧൧൯. സോഹം സീലം സമാദിസ്സം, ലോകേ അനുമതം സിവം;
അരിയവുത്തിസമാചാരോ, യേന വുച്ചതി സീലവാ.
൧൨൦. ഞാതീനഞ്ച പിയോ ഹോതി, മിത്തേസു ച വിരോചതി;
കായസ്സ ഭേദാ സുഗതിം, ഉപപജ്ജതി സീലവാതി.
സീലവീമംസകജാതകം ദസമം.
അബ്ഭന്തരവഗ്ഗോ ചതുത്ഥോ.
തസ്സുദ്ദാനം –
ദുമ കംസവരുത്തമബ്യഗ്ഘമിഗാ, മണയോ മണി സാലുകമവ്ഹയനോ;
അനുസാസനിയോപി ച മച്ഛവരോ, മണികുണ്ഡലകേന കിരേന ദസാതി.