൫. കുമ്ഭവഗ്ഗോ
൨൯൧. സുരാഘടജാതകം (൨-൫-൧)
൧൨൧. സബ്ബകാമദദം കുമ്ഭം, കുടം ലദ്ധാന ധുത്തകോ;
യാവ നം അനുപാലേതി, താവ സോ സുഖമേധതി.
൧൨൨. യദാ മത്തോ ച ദിത്തോ ച, പമാദാ കുമ്ഭമബ്ഭിദാ;
തദാ നഗ്ഗോ ച പോത്ഥോ ച, പച്ഛാ ബാലോ വിഹഞ്ഞതി.
൧൨൩. ഏവമേവ യോ ധനം ലദ്ധാ, പമത്തോ [അമത്താ (സീ.), അമത്തോ (പീ.)] പരിഭുഞ്ജതി;
പച്ഛാ തപ്പതി ദുമ്മേധോ, കുടം ഭിത്വാവ [കുടം ഭിന്നോവ (സീ. പീ.), കുടഭിന്നോവ (?)] ധുത്തകോതി.
സുരാഘട [ഭദ്രഘട (സീ. പീ.), ഭദ്രഘടഭേദക (സ്യാ.)] ജാതകം പഠമം.
൨൯൨. സുപത്തജാതകം (൩-൫-൨)
൧൨൪. ബാരാണസ്യം [ബാരാണസ്സം (സീ. പീ.)] മഹാരാജ, കാകരാജാ നിവാസകോ [നിവാസികോ (സീ. പീ.)];
അസീതിയാ സഹസ്സേഹി, സുപത്തോ പരിവാരിതോ.
൧൨൫. തസ്സ ദോഹളിനീ ഭരിയാ, സുഫസ്സാ ഭക്ഖിതുമിച്ഛതി [മച്ഛമിച്ഛതി (സീ. പീ.)];
രഞ്ഞോ മഹാനസേ പക്കം, പച്ചഗ്ഘം രാജഭോജനം.
൧൨൬. തേസാഹം പഹിതോ ദൂതോ, രഞ്ഞോ ചമ്ഹി ഇധാഗതോ;
ഭത്തു അപചിതിം കുമ്മി, നാസായമകരം [മകരിം (സീ. നിസ്സയ)] വണന്തി.
സുപത്തജാതകം ദുതിയം.
൨൯൩. കായനിബ്ബിന്ദജാതകം (൩-൫-൩)
൧൨൭. ഫുട്ഠസ്സ മേ അഞ്ഞതരേന ബ്യാധിനാ, രോഗേന ബാള്ഹം ദുഖിതസ്സ രുപ്പതോ;
പരിസുസ്സതി ഖിപ്പമിദം കളേവരം, പുപ്ഫം യഥാ പംസുനി ആതപേ കതം.
൧൨൮. അജഞ്ഞം ജഞ്ഞസങ്ഖാതം, അസുചിം സുചിസമ്മതം;
നാനാകുണപപരിപൂരം, ജഞ്ഞരൂപം അപസ്സതോ.
൧൨൯. ധിരത്ഥുമം ആതുരം പൂതികായം, ജേഗുച്ഛിയം അസ്സുചിം ബ്യാധിധമ്മം;
യത്ഥപ്പമത്താ അധിമുച്ഛിതാ പജാ, ഹാപേന്തി മഗ്ഗം സുഗതൂപപത്തിയാതി.
കായനിബ്ബിന്ദ [കായവിച്ഛന്ദ (സീ.), കായവിച്ഛിന്ദ (പീ.)] ജാതകം തതിയം.
൨൯൪. ജമ്ബുഖാദകജാതകം (൩-൫-൪)
൧൩൦. കോയം ബിന്ദുസ്സരോ വഗ്ഗു, സരവന്താന [പവദന്താന (സീ. പീ.)] മുത്തമോ;
അച്ചുതോ ജമ്ബുസാഖായ, മോരച്ഛാപോവ കൂജതി.
൧൩൧. കുലപുത്തോവ ജാനാതി [കുലപുത്തോ പജാനാതി (സ്യാ. ക.)], കുലപുത്തം [കുലപുത്തേ (സീ. പീ.)] പസംസിതും;
ബ്യഗ്ഘച്ഛാപസരീവണ്ണ, ഭുഞ്ജ സമ്മ ദദാമി തേ.
൧൩൨. ചിരസ്സം വത പസ്സാമി, മുസാവാദീ സമാഗതേ;
വന്താദം കുണപാദഞ്ച, അഞ്ഞമഞ്ഞം പസംസകേതി.
ജമ്ബുഖാദകജാതകം ചതുത്ഥം.
൨൯൫. അന്തജാതകം (൩-൫-൫)
൧൩൩. ഉസഭസ്സേവ തേ ഖന്ധോ, സീഹസ്സേവ വിജമ്ഭിതം;
മിഗരാജ നമോ ത്യത്ഥു, അപി കിഞ്ചി ലഭാമസേ.
൧൩൪. കുലപുത്തോവ ജാനാതി, കുലപുത്തം പസംസിതും;
മയൂരഗീവസങ്കാസ, ഇതോ പരിയാഹി വായസ.
൧൩൫. മിഗാനം സിങ്ഗാലോ [കോത്ഥുകോ (സീ. പീ.), കോട്ഠുകോ (സ്യാ.)] അന്തോ, പക്ഖീനം പന വായസോ;
ഏരണ്ഡോ അന്തോ രുക്ഖാനം, തയോ അന്താ സമാഗതാതി.
അന്തജാതകം പഞ്ചമം.
൨൯൬. സമുദ്ദജാതകം (൩-൫-൬)
൧൩൬. കോ നായം [കോ ന്വായം (സ്യാ.)] ലോണതോയസ്മിം, സമന്താ പരിധാവതി;
മച്ഛേ മകരേ ച വാരേതി, ഊമീസു ച വിഹഞ്ഞതി.
൧൩൭. അനന്തപായീ സകുണോ, അതിത്തോതി ദിസാസുതോ;
സമുദ്ദം പാതുമിച്ഛാമി, സാഗരം സരിതം പതിം.
൧൩൮. സോ അയം ഹായതി ചേവ, പൂരതേ ച മഹോദധി;
നാസ്സ നായതി പീതന്തോ, അപേയ്യോ കിര സാഗരോതി.
സമുദ്ദജാതകം ഛട്ഠം.
൨൯൭. കാമവിലാപജാതകം (൩-൫-൭)
൧൩൯. ഉച്ചേ സകുണ ഡേമാന, പത്തയാന വിഹങ്ഗമ;
വജ്ജാസി ഖോ ത്വം വാമൂരും, ചിരം ഖോ സാ കരിസ്സതി [സരിസ്സതി (ക.)].
൧൪൦. ഇദം ഖോ സാ ന ജാനാതി, അസിം സത്തിഞ്ച ഓഡ്ഡിതം;
സാ ചണ്ഡീ കാഹതി കോധം, തം മേ തപതി നോ ഇദം [നോ ഇധ (സീ. സ്യാ. പീ.)].
൧൪൧. ഏസ ഉപ്പലസന്നാഹോ, നിക്ഖഞ്ചുസ്സീസകോഹിതം [നിക്ഖമുസ്സീസകേ കതം (സീ. പീ.), നിക്ഖഞ്ചുസ്സീസകേ കതം (സ്യാ.)];
കാസികഞ്ച മുദും വത്ഥം, തപ്പേതു ധനികാ പിയാതി [ധനകാമിയാതി (സ്യാ. പീ.), ധനകാമികാതി (സീ.)].
കാമവിലാപജാതകം സത്തമം.
൨൯൮. ഉദുമ്ബരജാതകം (൩-൫-൮)
൧൪൨. ഉദുമ്ബരാ ചിമേ പക്കാ, നിഗ്രോധാ ച കപിത്ഥനാ;
ഏഹി നിക്ഖമ ഭുഞ്ജസ്സു, കിം ജിഘച്ഛായ മിയ്യസി.
൧൪൩. ഏവം സോ സുഹിതോ ഹോതി, യോ വുഡ്ഢമപചായതി;
യഥാഹമജ്ജ സുഹിതോ, ദുമപക്കാനി മാസിതോ.
൧൪൪. യം വനേജോ വനേജസ്സ, വഞ്ചേയ്യ കപിനോ കപി;
ദഹരോ കപി [ദഹരോപി തം ന (സീ. പീ.), ദഹരോപി ന (സ്യാ.)] സദ്ധേയ്യ, ന ഹി ജിണ്ണോ ജരാകപീതി.
ഉദുമ്ബരജാതകം അട്ഠമം.
൨൯൯. കോമാരപുത്തജാതകം (൩-൫-൯)
൧൪൫. പുരേ തുവം സീലവതം സകാസേ, ഓക്കന്തികം [ഓക്കന്ദികം (സീ. സ്യാ. പീ.)] കീളസി അസ്സമമ്ഹി;
കരോഹരേ [കരോഹി രേ (ക.)] മക്കടിയാനി മക്കട, ന തം മയം സീലവതം രമാമ.
൧൪൬. സുതാ ഹി മയ്ഹം പരമാ വിസുദ്ധി, കോമാരപുത്തസ്സ ബഹുസ്സുതസ്സ;
മാ ദാനി മം മഞ്ഞി തുവം യഥാ പുരേ, ഝാനാനുയുത്തോ വിഹരാമി [ഝാനാനുയുത്താ വിഹരാമ (സീ. പീ.)] ആവുസോ.
൧൪൭. സചേപി സേലസ്മി വപേയ്യ ബീജം, ദേവോ ച വസ്സേ ന ഹി തം വിരൂള്ഹേ [നേവ ഹി തം രുഹേയ്യ (സീ. പീ.), ന ഹി തം വിരൂഹേ (?)];
സുതാ ഹി തേ സാ പരമാ വിസുദ്ധി, ആരാ തുവം മക്കട ഝാനഭൂമിയാതി.
കോമാരപുത്തജാതകം നവമം.
൩൦൦. വകജാതകം (൩-൫-൧൦)
൧൪൮. പരപാണരോധാ [പരപാണഘാതേ (സ്യാ.), പരപാണരോചം (ക.)] ജീവന്തോ, മംസലോഹിതഭോജനോ;
വകോ വതം സമാദായ, ഉപപജ്ജി ഉപോസഥം.
൧൪൯. തസ്സ സക്കോ വതഞ്ഞായ, അജരൂപേനുപാഗമി;
വീതതപോ അജ്ഝപ്പത്തോ, ഭഞ്ജി ലോഹിതപോ തപം.
൧൫൦. ഏവമേവ ഇധേകച്ചേ, സമാദാനമ്ഹി ദുബ്ബലാ;
ലഹും കരോന്തി അത്താനം, വകോവ അജകാരണാതി.
വകജാതകം ദസമം.
കുമ്ഭവഗ്ഗോ പഞ്ചമോ.
തസ്സുദ്ദാനം –
വരകുമ്ഭ സുപത്തസിരിവ്ഹയനോ, സുചിസമ്മത ബിന്ദുസരോ ചുസഭോ;
സരിതംപതി ചണ്ഡി ജരാകപിനാ, അഥ മക്കടിയാ വകകേന ദസാതി.
അഥ വഗ്ഗുദ്ദാനം –
സങ്കപ്പോ പദുമോ ചേവ, ഉദപാനേന തതിയം;
അബ്ഭന്തരം ഘടഭേദം, തികനിപാതമ്ഹിലങ്കതന്തി.
തികനിപാതം നിട്ഠിതം.