൩. ഉദപാനവഗ്ഗോ
൨൭൧. ഉദപാനദൂസകജാതകം (൩-൩-൧)
൬൧. ആരഞ്ഞികസ്സ ഇസിനോ, ചിരരത്തം തപസ്സിനോ;
കിച്ഛാകതം ഉദപാനം, കഥം സമ്മ അവാഹസി [അവാഹയി (സീ. പീ.), അപാഹസി (സ്യാ.)].
൬൨. ഏസ ധമ്മോ സിങ്ഗാലാനം, യം പിത്വാ ഓഹദാമസേ;
പിതുപിതാമഹം ധമ്മോ, ന തം [ന നം (സീ. പീ.)] ഉജ്ഝാതുമരഹസി.
൬൩. യേസം വോ ഏദിസോ ധമ്മോ, അധമ്മോ പന കീദിസോ;
മാ വോ ധമ്മം അധമ്മം വാ, അദ്ദസാമ കുദാചനന്തി.
ഉദപാനദൂസകജാതകം പഠമം.
൨൭൨. ബ്യഗ്ഘജാതകം (൩-൩-൨)
൬൪. യേന മിത്തേന സംസഗ്ഗാ, യോഗക്ഖേമോ വിഹിയ്യതി;
പുബ്ബേവജ്ഝാഭവം തസ്സ, രുക്ഖേ അക്ഖീവ പണ്ഡിതോ.
൬൫. യേന മിത്തേന സംസഗ്ഗാ, യോഗക്ഖേമോ പവഡ്ഢതി;
കരേയ്യത്തസമം വുത്തിം, സബ്ബകിച്ചേസു പണ്ഡിതോ.
൬൬. ഏഥ ബ്യഗ്ഘാ നിവത്തവ്ഹോ, പച്ചുപേഥ [പച്ചമേഥ (സീ. പീ.)] മഹാവനം;
മാ വനം ഛിന്ദി നിബ്യഗ്ഘം, ബ്യഗ്ഘാ മാഹേസു നിബ്ബനാതി.
ബ്യഗ്ഘജാതകം ദുതിയം.
൨൭൩. കച്ഛപജാതകം (൩-൩-൩)
൬൭. കോ നു ഉദ്ധിതഭത്തോവ [ഉദ്ദിതഭത്തോവ (സീ.), വഡ്ഢിതഭത്തോവ (സ്യാ.)], പൂരഹത്ഥോവ ബ്രാഹ്മണോ;
കഹം നു ഭിക്ഖം അചരി, കം സദ്ധം ഉപസങ്കമി.
൬൮. അഹം കപിസ്മി ദുമ്മേധോ, അനാമാസാനി ആമസിം;
ത്വം മം മോചയ ഭദ്ദന്തേ, മുത്തോ ഗച്ഛേയ്യ പബ്ബതം.
൬൯. കച്ഛപാ കസ്സപാ ഹോന്തി, കോണ്ഡഞ്ഞാ ഹോന്തി മക്കടാ;
മുഞ്ച കസ്സപ കോണ്ഡഞ്ഞം, കതം മേഥുനകം തയാതി.
കച്ഛപജാതകം തതിയം.
൨൭൪. ലോലജാതകം (൩-൩-൪)
൭൦. കായം ബലാകാ സിഖിനീ, ചോരീ ലങ്ഘിപിതാമഹാ;
ഓരം ബലാകേ ആഗച്ഛ, ചണ്ഡോ മേ വായസോ സഖാ.
൭൧. നാഹം ബലാകാ സിഖിനീ, അഹം ലോലോസ്മി വായസോ;
അകത്വാ വചനം തുയ്ഹം, പസ്സ ലൂനോസ്മി ആഗതോ.
൭൨. പുനപാപജ്ജസീ സമ്മ, സീലഞ്ഹി തവ താദിസം;
ന ഹി മാനുസകാ ഭോഗാ, സുഭുഞ്ജാ ഹോന്തി പക്ഖിനാതി.
ലോലജാതകം ചതുത്ഥം.
൨൭൫. രുചിരജാതകം (൩-൩-൫)
൭൩. കായം ബലാകാ രുചിരാ, കാകനീളസ്മിമച്ഛതി;
ചണ്ഡോ കാകോ സഖാ മയ്ഹം, യസ്സ [തസ്സ (സീ. പീ.)] ചേതം കുലാവകം.
൭൪. നനു മം സമ്മ ജാനാസി, ദിജ സാമാകഭോജന;
അകത്വാ വചനം തുയ്ഹം, പസ്സ ലൂനോസ്മി ആഗതോ.
൭൫. പുനപാപജ്ജസീ സമ്മ, സീലഞ്ഹി തവ താദിസം;
ന ഹി മാനുസകാ ഭോഗാ, സുഭുഞ്ജാ ഹോന്തി പക്ഖിനാതി.
രുചിരജാതകം പഞ്ചമം.
൨൭൬. കുരുധമ്മജാതകം (൩-൩-൬)
൭൬. തവ സദ്ധഞ്ച സീലഞ്ച, വിദിത്വാന ജനാധിപ;
വണ്ണം അഞ്ജനവണ്ണേന, കാലിങ്ഗസ്മിം നിമിമ്ഹസേ [വിനിമ്ഹസേ (സ്യാ.), വനിമ്ഹസേ (ക.)].
൭൭. അന്നഭച്ചാ ചഭച്ചാ ച, യോധ ഉദ്ദിസ്സ ഗച്ഛതി;
സബ്ബേ തേ അപ്പടിക്ഖിപ്പാ, പുബ്ബാചരിയവചോ ഇദം.
൭൮. ദദാമി വോ ബ്രാഹ്മണാ നാഗമേതം, രാജാരഹം രാജഭോഗ്ഗം യസസ്സിനം;
അലങ്കതം ഹേമജാലാഭിഛന്നം, സസാരഥിം ഗച്ഛഥ യേന കാമന്തി.
കുരുധമ്മജാതകം [കുരുധമ്മജാതകം (സീ. സ്യാ. പീ.)] ഛട്ഠം.
൨൭൭. രോമകജാതകം (൩-൩-൭)
൭൯. വസ്സാനി പഞ്ഞാസ സമാധികാനി, വസിമ്ഹ സേലസ്സ ഗുഹായ രോമക;
അസങ്കമാനാ അഭിനിബ്ബുതത്താ [അഭിനിബ്ബുതചിത്താ (സ്യാ. ക.)], ഹത്ഥത്ത [ഹത്ഥത്ഥ (സ്യാ.)] മായന്തി മമണ്ഡജാ പുരേ.
൮൦. തേ ദാനി വക്കങ്ഗ കിമത്ഥമുസ്സുകാ, ഭജന്തി അഞ്ഞം ഗിരികന്ദരം ദിജാ;
ന നൂന മഞ്ഞന്തി മമം യഥാ പുരേ, ചിരപ്പവുത്ഥാ അഥ വാ ന തേ ഇമേ.
൮൧. ജാനാമ തം ന മയം സമ്പമൂള്ഹാ [ന മയ’മസ്മ മൂള്ഹാ (സീ. പീ.)], സോയേവ ത്വം തേ മയമസ്മ നാഞ്ഞേ;
ചിത്തഞ്ച തേ അസ്മിം ജനേ പദുട്ഠം, ആജീവികാ [ആജീവക (സീ. സ്യാ.), ആജീവിക (പീ.)] തേന തമുത്തസാമാതി.
രോമകജാതകം സത്തമം.
൨൭൮. മഹിംസരാജജാതകം (൩-൩-൮)
൮൨. കിമത്ഥ [കമത്ഥ (സീ. പീ.)] മഭിസന്ധായ, ലഹുചിത്തസ്സ ദുബ്ഭിനോ [ദൂഭിനോ (സീ. പീ.)];
സബ്ബകാമദദസ്സേവ [ദുഹസ്സേവ (സീ. സ്യാ. പീ.), രഹസ്സേവ (ക.)], ഇമം ദുക്ഖം തിതിക്ഖസി.
൮൩. സിങ്ഗേന നിഹനാഹേതം, പദസാ ച അധിട്ഠഹ;
ഭിയ്യോ [ഭീയോ (സീ.)] ബാലാ പകുജ്ഝേയ്യും, നോ ചസ്സ പടിസേധകോ.
൮൪. മമേവായം മഞ്ഞമാനോ, അഞ്ഞേപേവം [അഞ്ഞമ്പേവം (സീ. സ്യാ. പീ.)] കരിസ്സതി;
തേ നം തത്ഥ വധിസ്സന്തി, സാ മേ മുത്തി ഭവിസ്സതീതി.
മഹിംസരാജജാതകം [മഹിസജാതകം (സീ. സ്യാ. പീ.)] അട്ഠമം.
൨൭൯. സതപത്തജാതകം (൩-൩-൯)
൮൫. യഥാ മാണവകോ പന്ഥേ, സിങ്ഗാലിം വനഗോചരിം;
അത്ഥകാമം പവേദേന്തിം [പവദന്തിം (പീ.)], അനത്ഥകാമാതി മഞ്ഞതി;
അനത്ഥകാമം സതപത്തം, അത്ഥകാമോതി മഞ്ഞതി.
൮൬. ഏവമേവ ഇധേകച്ചോ, പുഗ്ഗലോ ഹോതി താദിസോ;
ഹിതേഹി വചനം വുത്തോ, പടിഗണ്ഹാതി വാമതോ.
൮൭. യേ ച ഖോ നം പസംസന്തി, ഭയാ ഉക്കംസയന്തി വാ [ച (സീ. പീ.)];
തഞ്ഹി സോ മഞ്ഞതേ മിത്തം, സതപത്തംവ മാണവോതി.
സതപത്തജാതകം നവമം.
൨൮൦. പുടദൂസകജാതകം (൩-൩-൧൦)
൮൮. അദ്ധാ ഹി നൂന മിഗരാജാ, പുടകമ്മസ്സ കോവിദോ;
തഥാ ഹി പുടം ദൂസേതി, അഞ്ഞം നൂന കരിസ്സതി.
൮൯. ന മേ മാതാ വാ പിതാ വാ, പുടകമ്മസ്സ കോവിദോ;
കതം കതം ഖോ ദൂസേമ, ഏവം ധമ്മമിദം കുലം.
൯൦. യേസം വോ ഏദിസോ ധമ്മോ, അധമ്മോ പന കീദിസോ;
മാ വോ ധമ്മം അധമ്മം വാ, അദ്ദസാമ കുദാചനന്തി.
പുടദൂസകജാതകം ദസമം.
ഉദപാനവഗ്ഗോ [അരഞ്ഞവഗ്ഗോ (സീ. പീ. ക.)] തതിയോ.
തസ്സുദ്ദാനം –
ഉദപാനവരം വനബ്യഗ്ഘ കപി, സിഖിനീ ച ബലാക രുചിരവരോ;
സുജനാധിപരോമകദൂസ പുന, സതപത്തവരോ പുടകമ്മ ദസാതി.