൨. പദുമവഗ്ഗോ
൨൬൧. പദുമജാതകം (൩-൨-൧)
൩൧. യഥാ കേസാ ച മസ്സൂ ച, ഛിന്നം ഛിന്നം വിരൂഹതി;
ഏവം രൂഹതു തേ നാസാ, പദുമം ദേഹി യാചിതോ.
൩൨. യഥാ സാരദികം ബീജം, ഖേത്തേ വുത്തം വിരൂഹതി;
ഏവം രൂഹതു തേ നാസാ, പദുമം ദേഹി യാചിതോ.
൩൩. ഉഭോപി പലപന്തേതേ [വിലപന്തേതേ (സ്യാ. ക.)], അപി പദ്മാനി ദസ്സതി;
വജ്ജും വാ തേ ന വാ വജ്ജും, നത്ഥി നാസായ രൂഹനാ;
ദേഹി സമ്മ പദുമാനി, അഹം യാചാമി യാചിതോതി.
പദുമജാതകം പഠമം.
൨൬൨. മുദുപാണിജാതകം (൩-൨-൨)
൩൪. പാണി ചേ മുദുകോ ചസ്സ, നാഗോ ചസ്സ സുകാരിതോ;
അന്ധകാരോ ച വസ്സേയ്യ, അഥ നൂന തദാ സിയാ.
൩൫. അനലാ മുദുസമ്ഭാസാ, ദുപ്പൂരാ താ [ദുപ്പൂരത്താ (ക.)] നദീസമാ;
സീദന്തി നം വിദിത്വാന, ആരകാ പരിവജ്ജയേ.
൩൬. യം ഏതാ ഉപസേവന്തി, ഛന്ദസാ വാ ധനേന വാ;
ജാതവേദോവ സം ഠാനം, ഖിപ്പം അനുദഹന്തി നന്തി.
മുദുപാണിജാതകം ദുതിയം.
൨൬൩. ചൂളപലോഭനജാതകം (൩-൨-൩)
൩൭. അഭിജ്ജമാനേ വാരിസ്മിം, സയം [അയം (ക.)] ആഗമ്മ ഇദ്ധിയാ;
മിസ്സീഭാവിത്ഥിയാ ഗന്ത്വാ, സംസീദസി [സംസീദതി (ക.)] മഹണ്ണവേ.
൩൮. ആവട്ടനീ മഹാമായാ, ബ്രഹ്മചരിയവികോപനാ;
സീദന്തി നം വിദിത്വാന, ആരകാ പരിവജ്ജയേ.
൩൯. യം ഏതാ ഉപസേവന്തി, ഛന്ദസാ വാ ധനേന വാ;
ജാതവേദോവ സം ഠാനം, ഖിപ്പം അനുദഹന്തി നന്തി.
ചൂളപലോഭന [ചുല്ലപലോഭന (സീ. സ്യാ. പീ.)] ജാതകം തതിയം.
൨൬൪. മഹാപനാദജാതകം (൩-൨-൪)
൪൦. പനാദോ നാമ സോ രാജാ, യസ്സ യൂപോ സുവണ്ണയോ;
തിരിയം സോളസുബ്ബേധോ [സോളസപബ്ബേധോ (സീ. പീ.)], ഉദ്ധമാഹു [ഉച്ചമാഹു (സീ. സ്യാ. പീ.)] സഹസ്സധാ.
൪൧. സഹസ്സകണ്ഡോ സതഗേണ്ഡു [സതഭേദോ (സീ. പീ.), സതഭേണ്ഡു (സീ. നിസ്സയ)], ധജാസു ഹരിതാമയോ;
അനച്ചും തത്ഥ ഗന്ധബ്ബാ, ഛ സഹസ്സാനി സത്തധാ.
൪൨. ഏവമേതം [ഏവമേവ (ക.)] തദാ ആസി, യഥാ ഭാസസി ഭദ്ദജി;
സക്കോ അഹം തദാ ആസിം, വേയ്യാവച്ചകരോ തവാതി.
മഹാപനാദജാതകം ചതുത്ഥം.
൨൬൫. ഖുരപ്പജാതകം (൩-൨-൫)
൪൩. ദിസ്വാ ഖുരപ്പേ ധനുവേഗനുന്നേ, ഖഗ്ഗേ ഗഹീതേ തിഖിണേ തേലധോതേ;
തസ്മിം ഭയസ്മിം മരണേ വിയൂള്ഹേ, കസ്മാ നു തേ നാഹു ഛമ്ഭിതത്തം.
൪൪. ദിസ്വാ ഖുരപ്പേ ധനുവേഗനുന്നേ, ഖഗ്ഗേ ഗഹീതേ തിഖിണേ തേലധോതേ;
തസ്മിം ഭയസ്മിം മരണേ വിയൂള്ഹേ, വേദം അലത്ഥം വിപുലം ഉളാരം.
൪൫. സോ വേദജാതോ അജ്ഝഭവിം അമിത്തേ, പുബ്ബേവ മേ ജീവിതമാസി ചത്തം;
ന ഹി ജീവിതേ ആലയം കുബ്ബമാനോ, സൂരോ കയിരാ സൂരകിച്ചം കദാചീതി.
ഖുരപ്പജാതകം പഞ്ചമം.
൨൬൬. വാതഗ്ഗസിന്ധവജാതകം (൩-൨-൬)
൪൬. യേനാസി കിസിയാ പണ്ഡു, യേന ഭത്തം ന രുച്ചതി;
അയം സോ ആഗതോ ഭത്താ [താതോ (സീ. സ്യാ. പീ.)], കസ്മാ ദാനി പലായസി.
൪൭. സചേ [ന ഖോ (സ്യാ. ക.)] പനാദികേനേവ, സന്ഥവോ നാമ ജായതി;
യസോ ഹായതി ഇത്ഥീനം, തസ്മാ താത പലായഹം [പലായിഹം (സ്യാ.), പലായിതം (ക.)].
൪൮. യസ്സസ്സിനം കുലേ ജാതം, ആഗതം യാ ന ഇച്ഛതി;
സോചതി ചിരരത്തായ, വാതഗ്ഗമിവ ഭദ്ദലീതി [കുന്ദലീതി (സീ. പീ.), ഗദ്രഭീതി (സ്യാ.)].
വാതഗ്ഗസിന്ധവജാതകം ഛട്ഠം.
൨൬൭. കക്കടകജാതകം (൩-൨-൭)
൪൯. സിങ്ഗീമിഗോ ആയതചക്ഖുനേത്തോ, അട്ഠിത്തചോ വാരിസയോ അലോമോ;
തേനാഭിഭൂതോ കപണം രുദാമി, മാ ഹേവ മം പാണസമം ജഹേയ്യ [ജഹേയ്യാ (പീ.) ജഹാ’യ്യേ (?)].
൫൦. അയ്യ ന തം ജഹിസ്സാമി, കുഞ്ജരം സട്ഠിഹായനം [കുഞ്ജര സട്ഠിഹായന (സീ. പീ.)];
പഥബ്യാ ചാതുരന്തായ, സുപ്പിയോ ഹോസി മേ തുവം.
൫൧. യേ കുളീരാ സമുദ്ദസ്മിം, ഗങ്ഗായ യമുനായ [നമ്മദായ (സീ. പീ.)] ച;
തേസം ത്വം വാരിജോ സേട്ഠോ, മുഞ്ച രോദന്തിയാ പതിന്തി.
കക്കടക [കുളീര (ക.)] ജാതകം സത്തമം.
൨൬൮. ആരാമദൂസകജാതകം (൩-൨-൮)
൫൨. യോ വേ സബ്ബസമേതാനം, അഹുവാ സേട്ഠസമ്മതോ;
തസ്സായം ഏദിസീ പഞ്ഞാ, കിമേവ ഇതരാ പജാ.
൫൩. ഏവമേവ തുവം ബ്രഹ്മേ, അനഞ്ഞായ വിനിന്ദസി;
കഥം മൂലം അദിസ്വാന [കഥംഹി മൂലം അദിത്വാ (സ്യാ. പീ.)], രുക്ഖം ജഞ്ഞാ പതിട്ഠിതം.
൫൪. നാഹം തുമ്ഹേ വിനിന്ദാമി, യേ ചഞ്ഞേ വാനരാ വനേ;
വിസ്സസേനോവ ഗാരയ്ഹോ, യസ്സത്ഥാ രുക്ഖരോപകാതി.
ആരാമദൂസകജാതകം അട്ഠമം.
൨൬൯. സുജാതജാതകം (൩-൨-൯)
൫൫. ന ഹി വണ്ണേന സമ്പന്നാ, മഞ്ജുകാ പിയദസ്സനാ;
ഖരവാചാ പിയാ ഹോതി, അസ്മിം ലോകേ പരമ്ഹി ച.
൫൬. നനു പസ്സസിമം കാളിം, ദുബ്ബണ്ണം തിലകാഹതം;
കോകിലം സണ്ഹവാചേന, ബഹൂനം പാണിനം പിയം.
൫൭. തസ്മാ സഖിലവാചസ്സ, മന്തഭാണീ അനുദ്ധതോ;
അത്ഥം ധമ്മഞ്ച ദീപേതി, മധുരം തസ്സ ഭാസിതന്തി.
സുജാതജാതകം നവമം.
൨൭൦. ഉലൂകജാതകം (൩-൨-൧൦)
൫൮. സബ്ബേഹി കിര ഞാതീഹി, കോസിയോ ഇസ്സരോ കതോ;
സചേ ഞാതീഹി അനുഞ്ഞാതോ [ഞാതീഹനുഞ്ഞാതോ (സീ. പീ.)], ഭണേയ്യാഹം ഏകവാചികം.
൫൯. ഭണ സമ്മ അനുഞ്ഞാതോ, അത്ഥം ധമ്മഞ്ച കേവലം;
സന്തി ഹി ദഹരാ പക്ഖീ, പഞ്ഞവന്തോ ജുതിന്ധരാ.
൬൦. ന മേ രുച്ചതി ഭദ്ദം വോ [ഭദന്തേ (ക.)], ഉലൂകസ്സാഭിസേചനം;
അക്കുദ്ധസ്സ മുഖം പസ്സ, കഥം കുദ്ധോ കരിസ്സതീതി.
ഉലൂകജാതകം ദസമം.
പദുമവഗ്ഗോ ദുതിയോ.
തസ്സുദ്ദാനം –
പദുമുത്തമ നാഗസിരിവ്ഹയനോ, സ-മഹണ്ണവ യൂപ ഖുരപ്പവരോ;
അഥ ഭദ്ദലീ കുഞ്ജര രുക്ഖ പുന, ഖരവാച ഉലൂകവരേന ദസാതി.