൧. സങ്കപ്പവഗ്ഗോ
൨൫൧. സങ്കപ്പരാഗജാതകം (൩-൧-൧)
൧. സങ്കപ്പരാഗധോതേന, വിതക്കനിസിതേന ച;
നാലങ്കതേന ഭദ്രേന [നേവാലങ്കതഭദ്രേന (സ്യാ.)], ഉസുകാരാകതേന ച [ന ഉസുകാരകതേന ച (സീ. സ്യാ. പീ.)].
൨. ന കണ്ണായതമുത്തേന, നാപി മോരൂപസേവിനാ;
തേനമ്ഹി ഹദയേ വിദ്ധോ, സബ്ബങ്ഗപരിദാഹിനാ.
൩. ആവേധഞ്ച ന പസ്സാമി, യതോ രുഹിരമസ്സവേ;
യാവ അയോനിസോ ചിത്തം, സയം മേ ദുക്ഖമാഭതന്തി.
സങ്കപ്പരാഗജാതകം പഠമം.
൨൫൨. തിലമുട്ഠിജാതകം (൩-൧-൨)
൪. അജ്ജാപി മേ തം മനസി [സരസി (ക.)], യം മം ത്വം തിലമുട്ഠിയാ;
ബാഹായ മം ഗഹേത്വാന, ലട്ഠിയാ അനുതാളയി.
൫. നനു ജീവിതേ ന രമസി, യേനാസി ബ്രാഹ്മണാഗതോ;
യം മം ബാഹാ ഗഹേത്വാന, തിക്ഖത്തും അനുതാളയി.
൬. അരിയോ അനരിയം കുബ്ബന്തം [കുബ്ബാനം (സീ. പീ.), കുബ്ബം (സ്യാ.)], യോ ദണ്ഡേന നിസേധതി;
സാസനം തം ന തം വേരം, ഇതി നം പണ്ഡിതാ വിദൂതി.
തിലമുട്ഠിജാതകം ദുതിയം.
൨൫൩. മണികണ്ഠജാതകം (൩-൧-൩)
൭. മമന്നപാനം വിപുലം ഉളാരം, ഉപ്പജ്ജതീമസ്സ മണിസ്സ ഹേതു;
തം തേ ന ദസ്സം അതിയാചകോസി, ന ചാപി തേ അസ്സമമാഗമിസ്സം.
൮. സുസൂ യഥാ സക്ഖരധോതപാണീ, താസേസി മം സേലം യാചമാനോ;
തം തേ ന ദസ്സം അതിയാചകോസി, ന ചാപി തേ അസ്സമമാഗമിസ്സം.
൯. ന തം യാചേ യസ്സ പിയം ജിഗീസേ [ജിഗിംസേ (സീ. സ്യാ. പീ.)], ദേസ്സോ ഹോതി അതിയാചനായ;
നാഗോ മണിം യാചിതോ ബ്രാഹ്മണേന, അദസ്സനംയേവ തദജ്ഝഗമാതി.
മണികണ്ഠജാതകം തതിയം.
൨൫൪. കുണ്ഡകകുച്ഛിസിന്ധവജാതകം (൩-൧-൪)
൧൦. ഭുത്വാ തിണപരിഘാസം, ഭുത്വാ ആചാമകുണ്ഡകം;
ഏതം തേ ഭോജനം ആസി, കസ്മാ ദാനി ന ഭുഞ്ജസി.
൧൧. യത്ഥ പോസം ന ജാനന്തി, ജാതിയാ വിനയേന വാ;
ബഹും [പഹൂ (സീ. പീ.), പഹും (സ്യാ. ക.)] തത്ഥ മഹാബ്രമ്ഹേ, അപി ആചാമകുണ്ഡകം.
൧൨. ത്വഞ്ച ഖോ മം പജാനാസി, യാദിസായം ഹയുത്തമോ;
ജാനന്തോ ജാനമാഗമ്മ, ന തേ ഭക്ഖാമി കുണ്ഡകന്തി.
കുണ്ഡകകുച്ഛിസിന്ധവജാതകം ചതുത്ഥം.
൨൫൫. സുകജാതകം (൩-൧-൫)
൧൩. യാവ സോ മത്തമഞ്ഞാസി, ഭോജനസ്മിം വിഹങ്ഗമോ;
താവ അദ്ധാനമാപാദി, മാതരഞ്ച അപോസയി.
൧൪. യതോ ച ഖോ ബഹുതരം, ഭോജനം അജ്ഝവാഹരി [അജ്ഝുപാഹരി (സീ. പീ.)];
തതോ തത്ഥേവ സംസീദി, അമത്തഞ്ഞൂ ഹി സോ അഹു.
൧൫. തസ്മാ മത്തഞ്ഞുതാ സാധു, ഭോജനസ്മിം അഗിദ്ധതാ [അഗിദ്ധിതാ (സ്യാ. ക.)];
അമത്തഞ്ഞൂ ഹി സീദന്തി, മത്തഞ്ഞൂ ച ന സീദരേതി.
സുകജാതകം പഞ്ചമം.
൨൫൬. ജരൂദപാനജാതകം (൩-൧-൬)
൧൬. ജരൂദപാനം ഖണമാനാ, വാണിജാ ഉദകത്ഥികാ;
അജ്ഝഗമും അയസം ലോഹം [അജ്ഝഗംസു അയോലോഹം (സീ. സ്യാ. പീ.)], തിപുസീസഞ്ച വാണിജാ;
രജതം ജാതരൂപഞ്ച, മുത്താ വേളൂരിയാ ബഹൂ.
൧൭. തേ ച തേന അസന്തുട്ഠാ, ഭിയ്യോ ഭിയ്യോ അഖാണിസും;
തേ തത്ഥാസീവിസോ [തത്ഥ ആസീവിസോ (ക.), തത്ഥപാസീവിസോ (സ്യാ.)] ഘോരോ, തേജസ്സീ തേജസാ ഹനി.
൧൮. തസ്മാ ഖണേ നാതിഖണേ, അതിഖാതം [അതിഖണം (ക.)] ഹി പാപകം;
ഖാതേന ച [ഖണേന ച (ക.), ഖണനേന (സ്യാ.)] ധനം ലദ്ധം, അതിഖാതേന [അതിഖണേന (ക.)] നാസിതന്തി.
ജരൂദപാനജാതകം ഛട്ഠം.
൨൫൭. ഗാമണിചന്ദജാതകം (൩-൧-൭)
൧൯. നായം ഘരാനം കുസലോ, ലോലോ അയം വലീമുഖോ;
കതം കതം ഖോ ദൂസേയ്യ, ഏവംധമ്മമിദം കുലം.
൨൦. നയിദം ചിത്തവതോ ലോമം, നായം അസ്സാസികോ മിഗോ;
സിട്ഠം [സത്ഥം (സീ. സ്യാ. പീ.)] മേ ജനസന്ധേന, നായം കിഞ്ചി വിജാനതി.
൨൧. ന മാതരം പിതരം വാ, ഭാതരം ഭഗിനിം സകം;
ഭരേയ്യ താദിസോ പോസോ, സിട്ഠം ദസരഥേന മേതി.
ഗാമണിചന്ദ [ഗാമണിചണ്ഡ (സീ. പീ.)] ജാതകം സത്തമം.
൨൫൮. മന്ധാതുജാതകം (൩-൧-൮)
൨൨. യാവതാ ചന്ദിമസൂരിയാ, പരിഹരന്തി ദിസാ ഭന്തി വിരോചനാ [വിരോചമാനാ (ക.)];
സബ്ബേവ ദാസാ മന്ധാതു, യേ പാണാ പഥവിസ്സിതാ [പഠവിനിസ്സിതാ (സീ. പീ.), പഠവിസ്സിതാ (സ്യാ.)].
൨൩. ന കഹാപണവസ്സേന, തിത്തി കാമേസു വിജ്ജതി;
അപ്പസ്സാദാ ദുഖാ കാമാ, ഇതി വിഞ്ഞായ പണ്ഡിതോ.
൨൪. അപി ദിബ്ബേസു കാമേസു, രതിം സോ നാധിഗച്ഛതി;
തണ്ഹക്ഖയരതോ ഹോതി, സമ്മാസമ്ബുദ്ധസാവകോതി.
മന്ധാതുജാതകം അട്ഠമം.
൨൫൯. തിരീടവച്ഛജാതകം (൩-൧-൯)
൨൫. നയിമസ്സ വിജ്ജാമയമത്ഥി കിഞ്ചി, ന ബന്ധവോ നോ പന തേ സഹായോ;
അഥ കേന വണ്ണേന തിരീടവച്ഛോ [തിരീടിവച്ഛോ (സ്യാ. ക.)], തേദണ്ഡികോ ഭുഞ്ജതി അഗ്ഗപിണ്ഡം.
൨൬. ആപാസു [ആവാസു (ക.)] മേ യുദ്ധപരാജിതസ്സ, ഏകസ്സ കത്വാ വിവനസ്മി ഘോരേ;
പസാരയീ കിച്ഛഗതസ്സ പാണിം, തേനൂദതാരിം ദുഖസംപരേതോ.
൨൭. ഏതസ്സ കിച്ചേന ഇധാനുപത്തോ, വേസായിനോ വിസയാ ജീവലോകേ;
ലാഭാരഹോ താത തിരീടവച്ഛോ, ദേഥസ്സ ഭോഗം യജഥഞ്ച [യജതഞ്ച (സീ. പീ.), യജിതഞ്ച (സ്യാ.)] യഞ്ഞന്തി.
തിരീടവച്ഛജാതകം നവമം.
൨൬൦. ദൂതജാതകം (൩-൧-൧൦)
൨൮. യസ്സത്ഥാ ദൂരമായന്തി, അമിത്തമപി യാചിതും;
തസ്സൂദരസ്സഹം ദൂതോ, മാ മേ കുജ്ഝ [കുജ്ഝി (സീ. പീ.)] രഥേസഭ.
൨൯. യസ്സ ദിവാ ച രത്തോ ച, വസമായന്തി മാണവാ;
തസ്സൂദരസ്സഹം ദൂതോ, മാ മേ കുജ്ഝ [കുജ്ഝി (സീ. പീ.)] രഥേസഭ.
൩൦. ദദാമി തേ ബ്രാഹ്മണ രോഹിണീനം, ഗവം സഹസ്സം സഹ പുങ്ഗവേന;
ദൂതോ ഹി ദൂതസ്സ കഥം ന ദജ്ജം, മയമ്പി തസ്സേവ ഭവാമ ദൂതാതി.
ദൂതജാതകം ദസമം.
സങ്കപ്പവഗ്ഗോ പഠമോ.
തസ്സുദ്ദാനം –
ഉസുകാരവരോ തിലമുട്ഠി മണി, ഹയരാജ വിഹങ്ഗമ ആസിവിസോ;
ജനസന്ധ കഹാപണവസ്സ പുന, തിരിടം പുന ദൂതവരേന ദസാതി.