൧൮. പണ്ണാസനിപാതോ

൫൨൬. നിളിനികാജാതകം (൧)

൧. ‘‘ഉദ്ദയ്ഹതേ [ഉഡ്ഡയ്ഹതേ (സീ. പീ.)] ജനപദോ, രട്ഠഞ്ചാപി വിനസ്സതി;

ഏഹി നിളിനികേ [നിളികേ (സീ. സ്യാ. പീ.), ഏവമുപരിപി] ഗച്ഛ, തം മേ ബ്രാഹ്മണമാനയ’’.

൨. ‘‘നാഹം ദുക്ഖക്ഖമാ രാജ, നാഹം അദ്ധാനകോവിദാ;

കഥം അഹം ഗമിസ്സാമി, വനം കുഞ്ജരസേവിതം’’.

൩. ‘‘ഫീതം ജനപദം ഗന്ത്വാ, ഹത്ഥിനാ ച രഥേന ച;

ദാരുസങ്ഘാടയാനേന, ഏവം ഗച്ഛ നിളിനികേ.

൪. ‘‘ഹത്ഥിഅസ്സരഥേ പത്തീ, ഗച്ഛേവാദായ ഖത്തിയേ;

തവേവ വണ്ണരൂപേന, വസം തമാനയിസ്സസി’’.

൫. ‘‘കദലീധജപഞ്ഞാണോ, ആഭുജീപരിവാരിതോ;

ഏസോ പദിസ്സതി രമ്മോ, ഇസിസിങ്ഗസ്സ അസ്സമോ.

൬. ‘‘ഏസോ അഗ്ഗിസ്സ സങ്ഖാതോ, ഏസോ ധൂമോ പദിസ്സതി;

മഞ്ഞേ നോ അഗ്ഗിം ഹാപേതി, ഇസിസിങ്ഗോ മഹിദ്ധികോ’’.

൭. ‘‘തഞ്ച ദിസ്വാന ആയന്തിം, ആമുത്തമണികുണ്ഡലം;

ഇസിസിങ്ഗോ പാവിസി ഭീതോ, അസ്സമം പണ്ണഛാദനം.

൮. ‘‘അസ്സമസ്സ ച സാ ദ്വാരേ, ഗേണ്ഡുകേനസ്സ [ഭേണ്ഡുകേനസ്സ (സീ. പീ.)] കീളതി;

വിദംസയന്തീ അങ്ഗാനി, ഗുയ്ഹം പകാസിതാനി ച.

൯. ‘‘തഞ്ച ദിസ്വാന കീളന്തിം, പണ്ണസാലഗതോ ജടീ;

അസ്സമാ നിക്ഖമിത്വാന, ഇദം വചനമബ്രവി.

൧൦. ‘‘അമ്ഭോ കോ നാമ സോ രുക്ഖോ, യസ്സ തേവംഗതം ഫലം;

ദൂരേപി ഖിത്തം പച്ചേതി, ന തം ഓഹായ ഗച്ഛതി’’.

൧൧. ‘‘അസ്സമസ്സ മമ [മം (സീ.)] ബ്രഹ്മേ, സമീപേ ഗന്ധമാദനേ;

ബഹവോ [പബ്ബതേ (സീ.)] താദിസാ രുക്ഖാ, യസ്സ തേവംഗതം ഫലം;

ദൂരേപി ഖിത്തം പച്ചേതി, ന മം ഓഹായ ഗച്ഛതി’’.

൧൨. ‘‘ഏതൂ [ഏതു (സീ. സ്യാ. ക.)] ഭവം അസ്സമിമം അദേതു, പജ്ജഞ്ച ഭക്ഖഞ്ച പടിച്ഛ ദമ്മി;

ഇദമാസനം അത്ര ഭവം നിസീദതു, ഇതോ ഭവം മൂലഫലാനി ഭുഞ്ജതു’’ [ഖാദതു (സീ.)].

൧൩. ‘‘കിം തേ ഇദം ഊരൂനമന്തരസ്മിം, സുപിച്ഛിതം കണ്ഹരിവപ്പകാസതി;

അക്ഖാഹി മേ പുച്ഛിതോ ഏതമത്ഥം, കോസേ നു തേ ഉത്തമങ്ഗം പവിട്ഠം’’.

൧൪. ‘‘അഹം വനേ മൂലഫലേസനം ചരം, ആസാദയിം [അസ്സാദയിം (ക.)] അച്ഛം സുഘോരരൂപം;

സോ മം പതിത്വാ സഹസാജ്ഝപത്തോ, പനുജ്ജ മം അബ്ബഹി [അബ്ബുഹി (സ്യാ. ക.)] ഉത്തമങ്ഗം.

൧൫. ‘‘സ്വായം വണോ ഖജ്ജതി കണ്ഡുവായതി, സബ്ബഞ്ച കാലം ന ലഭാമി സാതം;

പഹോ ഭവം കണ്ഡുമിമം വിനേതും, കുരുതം ഭവം യാചിതോ ബ്രാഹ്മണത്ഥം’’.

൧൬. ‘‘ഗമ്ഭീരരൂപോ തേ വണോ സലോഹിതോ, അപൂതികോ വണഗന്ധോ [പക്കഗന്ധോ (സീ.), പന്നഗന്ധോ (സ്യാ. പീ.)] മഹാ ച;

കരോമി തേ കിഞ്ചി കസായയോഗം, യഥാ ഭവം പരമസുഖീ ഭവേയ്യ’’.

൧൭. ‘‘ന മന്തയോഗാ ന കസായയോഗാ, ന ഓസധാ ബ്രഹ്മചാരി [ബ്രഹ്മചാരീ (സീ. സ്യാ. പീ.)] കമന്തി;

ഘട്ടേ മുദുകേന [യം തേ മുദു തേന (സീ.), യം തേ മുദൂ തേന (പീ.)] വിനേഹി കണ്ഡും [കണ്ഡുകം (പീ.)], യഥാ അഹം പരമസുഖീ ഭവേയ്യം’’.

൧൮. ‘‘ഇതോ നു ഭോതോ കതമേന അസ്സമോ, കച്ചി ഭവം അഭിരമസി [അഭിരമസീ (പീ.)] അരഞ്ഞേ;

കച്ചി നു തേ [കച്ചി തേ (പീ.)] മൂലഫലം പഹൂതം, കച്ചി ഭവന്തം ന വിഹിംസന്തി വാളാ’’.

൧൯. ‘‘ഇതോ ഉജും ഉത്തരായം ദിസായം, ഖേമാനദീ ഹിമവതാ പഭാവീ [പഭാതി (സീ. പീ.)];

തസ്സാ തീരേ അസ്സമോ മയ്ഹ രമ്മോ, അഹോ ഭവം അസ്സമം മയ്ഹം പസ്സേ.

൨൦. ‘‘അമ്ബാ ച സാലാ തിലകാ ച ജമ്ബുയോ, ഉദ്ദാലകാ പാടലിയോ ച ഫുല്ലാ;

സമന്തതോ കിമ്പുരിസാഭിഗീതം, അഹോ ഭവം അസ്സമം മയ്ഹം പസ്സേ.

൨൧. ‘‘താലാ ച മൂലാ ച ഫലാ ച മേത്ഥ, വണ്ണേന ഗന്ധേന ഉപേതരൂപം;

തം ഭൂമിഭാഗേഹി ഉപേതരൂപം, അഹോ ഭവം അസ്സമം മയ്ഹം പസ്സേ.

൨൧. ‘‘ഫലാ ച മൂലാ ച പഹൂതമേത്ഥ, വണ്ണേന ഗന്ധേന രസേനുപേതാ;

ആയന്തി ച ലുദ്ദകാ തം പദേസം, മാ മേ തതോ മൂലഫലം അഹാസും’’.

൨൩. ‘‘പിതാ മമം മൂലഫലേസനം ഗതോ, ഇദാനി ആഗച്ഛതി സായകാലേ;

ഉഭോവ ഗച്ഛാമസേ അസ്സമം തം, യാവ പിതാ മൂലഫലതോ ഏതു’’.

൨൪. ‘‘അഞ്ഞേ ബഹൂ ഇസയോ സാധുരൂപാ, രാജീസയോ അനുമഗ്ഗേ വസന്തി;

തേ യേവ പുച്ഛേസി മമസ്സമം തം, തേ തം നയിസ്സന്തി മമം സകാസേ’’.

൨൫. ‘‘ന തേ കട്ഠാനി ഭിന്നാനി, ന തേ ഉദകമാഭതം;

അഗ്ഗീപി തേ ന ഹാപിതോ [ഹാസിതോ (സീ. സ്യാ.)], കിം നു മന്ദോവ ഝായസി.

൨൬. ‘‘ഭിന്നാനി കട്ഠാനി ഹുതോ ച അഗ്ഗി, തപനീപി തേ സമിതാ ബ്രഹ്മചാരീ [ബ്രഹ്മചാരി (?)];

പീഠഞ്ച മയ്ഹം ഉദകഞ്ച ഹോതി, രമസി തുവം [ത്വം (സീ.)] ബ്രഹ്മഭൂതോ പുരത്ഥാ.

൨൭. ‘‘അഭിന്നകട്ഠോസി അനാഭതോദകോ, അഹാപിതഗ്ഗീസി [അഹാപിതഗ്ഗീപി (ക.)] അസിദ്ധഭോജനോ [അസിട്ഠഭോജനോ (ക.)];

ന മേ തുവം ആലപസീ മമജ്ജ, നട്ഠം നു കിം ചേതസികഞ്ച ദുക്ഖം’’.

൨൮. ‘‘ഇധാഗമാ ജടിലോ ബ്രഹ്മചാരീ, സുദസ്സനേയ്യോ സുതനൂ വിനേതി;

നേവാതിദീഘോ ന പനാതിരസ്സോ, സുകണ്ഹകണ്ഹച്ഛദനേഹി ഭോതോ.

൨൯. ‘‘അമസ്സുജാതോ അപുരാണവണ്ണീ, ആധാരരൂപഞ്ച പനസ്സ കണ്ഠേ;

ദ്വേ യമാ [ദ്വേ പസ്സ (സീ.), ദ്വാസ്സ (പീ.)] ഗണ്ഡാ ഉരേസു ജാതാ, സുവണ്ണതിന്ദുകനിഭാ [സുവണ്ണപിന്ദൂപനിഭാ (സീ.), സുവണ്ണതിണ്ഡുസന്നിഭാ (സ്യാ.), സോവന്നപിണ്ഡൂപനിഭാ (പീ.)] പഭസ്സരാ.

൩൦. ‘‘മുഖഞ്ച തസ്സ ഭുസദസ്സനേയ്യം, കണ്ണേസു ലമ്ബന്തി ച കുഞ്ചിതഗ്ഗാ;

തേ ജോതരേ ചരതോ മാണവസ്സ, സുത്തഞ്ച യം സംയമനം ജടാനം.

൩൧. ‘‘അഞ്ഞാ ച തസ്സ സംയമാനി [സംയമനീ (സീ. പീ.)] ചതസ്സോ, നീലാ പീതാ [നീലാപി താ (പീ.)] ലോഹിതികാ [ലോഹിതകാ (സ്യാ. പീ. ക.)] ച സേതാ;

താ പിംസരേ [സംസരേ (സീ. സ്യാ.)] ചരതോ മാണവസ്സ, തിരിടി [ചിരീടി (സീ. പീ.)] സങ്ഘാരിവ പാവുസമ്ഹി.

൩൨. ‘‘ന മിഖലം മുഞ്ജമയം ധാരേതി, ന സന്ഥരേ [സന്തചേ (സീ.), സന്തചം (പീ.), സന്തരേ (ക.)] നോ പന പബ്ബജസ്സ;

താ ജോതരേ ജഘനന്തരേ [ജഘനവരേ (സീ. പീ.)] വിലഗ്ഗാ, സതേരതാ വിജ്ജുരിവന്തലിക്ഖേ.

൩൩. ‘‘അഖീലകാനി ച അവണ്ടകാനി, ഹേട്ഠാ നഭ്യാ കടിസമോഹിതാനി;

അഘട്ടിതാ നിച്ചകീളം കരോന്തി, ഹം താത കിംരുക്ഖഫലാനി താനി.

൩൪. ‘‘ജടാ ച തസ്സ ഭുസദസ്സനേയ്യാ, പരോസതം വേല്ലിതഗ്ഗാ സുഗന്ധാ;

ദ്വേധാ സിരോ സാധു വിഭത്തരൂപോ, അഹോ നു ഖോ മയ്ഹ തഥാ ജടാസ്സു.

൩൫. ‘‘യദാ ച സോ പകിരതി താ ജടായോ, വണ്ണേന ഗന്ധേന ഉപേതരൂപാ;

നീലുപ്പലം വാതസമേരിതംവ, തഥേവ സംവാതി പനസ്സമോ അയം.

൩൬. ‘‘പങ്കോ ച തസ്സ ഭുസദസ്സനേയ്യോ, നേതാദിസോ യാദിസോ മയ്ഹം കായേ [കായോ (സീ. സ്യാ. പീ.)];

സോ വായതീ ഏരിതോ മാലുതേന, വനം യഥാ അഗ്ഗഗിമ്ഹേ സുഫുല്ലം.

൩൭. ‘‘നിഹന്തി സോ രുക്ഖഫലം പഥബ്യാ, സുചിത്തരൂപം രുചിരം ദസ്സനേയ്യം;

ഖിത്തഞ്ച തസ്സ പുനരേതി ഹത്ഥം, ഹം താത കിംരുക്ഖഫലം നു ഖോ തം.

൩൮. ‘‘ദന്താ ച തസ്സ ഭുസദസ്സനേയ്യാ, സുദ്ധാ സമാ സങ്ഖവരൂപപന്നാ;

മനോ പസാദേന്തി വിവരിയമാനാ, ന ഹി [ന ഹ (സീ. പീ.)] നൂന സോ സാകമഖാദി തേഹി.

൩൯. ‘‘അകക്കസം അഗ്ഗളിതം മുഹും മുദും, ഉജും അനുദ്ധതം അചപലമസ്സ ഭാസിതം;

രുദം മനുഞ്ഞം കരവീകസുസ്സരം, ഹദയങ്ഗമം രഞ്ജയതേവ മേ മനോ.

൪൦. ‘‘ബിന്ദുസ്സരോ നാതിവിസട്ഠവാക്യോ [നാതിവിസ്സട്ഠവാക്യോ (സീ. സ്യാ. പീ.)], ന നൂന സജ്ഝായമതിപ്പയുത്തോ;

ഇച്ഛാമി ഭോ [ഖോ (സീ. സ്യാ. പീ.)] തം പുനദേവ ദട്ഠും, മിത്തോ ഹി [മിത്തം ഹി (സീ. സ്യാ. പീ.)] മേ മാണവോഹു [മാണവാഹു (സീ. സ്യാ.), മാണവാഹൂ (പീ.)] പുരത്ഥാ.

൪൧. ‘‘സുസന്ധി സബ്ബത്ഥ വിമട്ഠിമം വണം, പുഥൂ [പുഥും (പീ.), പുഥു (ക.)] സുജാതം ഖരപത്തസന്നിഭം;

തേനേവ മം ഉത്തരിയാന മാണവോ, വിവരിതം ഊരും ജഘനേന പീളയി.

൪൨. ‘‘തപന്തി ആഭന്തി വിരോചരേ ച, സതേരതാ വിജ്ജുരിവന്തലിക്ഖേ;

ബാഹാ മുദൂ അഞ്ജനലോമസാദിസാ, വിചിത്രവട്ടങ്ഗുലികാസ്സ സോഭരേ.

൪൩. ‘‘അകക്കസങ്ഗോ ന ച ദീഘലോമോ, നഖാസ്സ ദീഘാ അപി ലോഹിതഗ്ഗാ;

മുദൂഹി ബാഹാഹി പലിസ്സജന്തോ, കല്യാണരൂപോ രമയം [രമയ്ഹം (ക.)] ഉപട്ഠഹി.

൪൪. ‘‘ദുമസ്സ തൂലൂപനിഭാ പഭസ്സരാ, സുവണ്ണകമ്ബുതലവട്ടസുച്ഛവീ;

ഹത്ഥാ മുദൂ തേഹി മം സംഫുസിത്വാ, ഇതോ ഗതോ തേന മം ദഹന്തി താത.

൪൫. ‘‘ന നൂന [ന ഹ നൂന (സീ. പീ.)] സോ ഖാരിവിധം അഹാസി, ന നൂന സോ കട്ഠാനി സയം അഭഞ്ജി;

ന നൂന സോ ഹന്തി ദുമേ കുഠാരിയാ [കുധാരിയാ (ക.)], ന ഹിസ്സ [ന പിസ്സ (സീ. സ്യാ. പീ.)] ഹത്ഥേസു ഖിലാനി അത്ഥി.

൪൬. ‘‘അച്ഛോ ച ഖോ തസ്സ വണം അകാസി, സോ മംബ്രവി സുഖിതം മം കരോഹി;

താഹം കരിം തേന മമാസി സോഖ്യം, സോ ചബ്രവി സുഖിതോസ്മീതി ബ്രഹ്മേ.

൪൭. ‘‘അയഞ്ച തേ മാലുവപണ്ണസന്ഥതാ, വികിണ്ണരൂപാവ മയാ ച തേന ച;

കിലന്തരൂപാ ഉദകേ രമിത്വാ, പുനപ്പുനം പണ്ണകുടിം വജാമ.

൪൮. ‘‘ന മജ്ജ മന്താ പടിഭന്തി താത, ന അഗ്ഗിഹുത്തം നപി യഞ്ഞതന്തം [യഞ്ഞതന്ത്രം (സീ.), യഞ്ഞം തത്ര (പീ. ക.), യഞ്ഞതത്ര (സ്യാ.)];

ന ചാപി തേ മൂലഫലാനി ഭുഞ്ജേ, യാവ ന പസ്സാമി തം ബ്രഹ്മചാരിം.

൪൯. ‘‘അദ്ധാ പജാനാസി തുവമ്പി താത, യസ്സം ദിസം [ദിസായം (സ്യാ. പീ. ക.)] വസതേ ബ്രഹ്മചാരീ;

തം മം ദിസം പാപയ താത ഖിപ്പം, മാ തേ അഹം അമരിമസ്സമമ്ഹി.

൫൦. ‘‘വിചിത്രഫുല്ലം [വിചിത്രപുപ്ഫം (സീ. പീ.)] ഹി വനം സുതം മയാ, ദിജാഭിഘുട്ഠം ദിജസങ്ഘസേവിതം;

തം മം വനം പാപയ താത ഖിപ്പം, പുരാ തേ പാണം വിജഹാമി അസ്സമേ’’.

൫൧. ‘‘ഇമസ്മാഹം ജോതിരസേ വനമ്ഹി, ഗന്ധബ്ബദേവച്ഛരസങ്ഘസേവിതേ;

ഇസീനമാവാസേ സനന്തനമ്ഹി, നേതാദിസം അരതിം പാപുണേഥ.

൫൨. ‘‘ഭവന്തി മിത്താനി അഥോ ന ഹോന്തി, ഞാതീസു മിത്തേസു കരോന്തി പേമം;

അയഞ്ച ജമ്മോ കിസ്സ വാ നിവിട്ഠോ, യോ നേവ ജാനാതി കുതോമ്ഹി ആഗതോ.

൫൩. ‘‘സംവാസേന ഹി മിത്താനി, സന്ധിയന്തി [സന്ധീയന്തി (സീ. പീ.)] പുനപ്പുനം;

സ്വേവ മിത്തോ [സാ ച മേത്തി (പീ.)] അസംഗന്തു, അസംവാസേന ജീരതി.

൫൪. ‘‘സചേ തുവം ദക്ഖസി ബ്രഹ്മചാരിം, സചേ തുവം സല്ലപേ [സല്ലപി (സീ.)] ബ്രഹ്മചാരിനാ;

സമ്പന്നസസ്സംവ മഹോദകേന, തപോഗുണം ഖിപ്പമിമം പഹിസ്സസി [പഹസ്സസി (സീ. സ്യാ. പീ.)].

൫൫. ‘‘പുനപി [പുനപ്പി (പീ.)] ചേ ദക്ഖസി ബ്രഹ്മചാരിം, പുനപി [പുനപ്പി (പീ.)] ചേ സല്ലപേ ബ്രഹ്മചാരിനാ;

സമ്പന്നസസ്സംവ മഹോദകേന, ഉസ്മാഗതം ഖിപ്പമിമം പഹിസ്സസി.

൫൬. ‘‘ഭൂതാനി ഹേതാനി [ഏതാനി (പീ.)] ചരന്തി താത, വിരൂപരൂപേന മനുസ്സലോകേ;

ന താനി സേവേഥ നരോ സപഞ്ഞോ, ആസജ്ജ നം നസ്സതി ബ്രഹ്മചാരീ’’തി.

നിളിനികാജാതകം [നളിനീജാതകം (സീ.), നളിനിജാതകം (പീ.)] പഠമം.

൫൨൭. ഉമ്മാദന്തീജാതകം (൨)

൫൭. ‘‘നിവേസനം കസ്സ നുദം സുനന്ദ, പാകാരേന പണ്ഡുമയേന ഗുത്തം;

കാ ദിസ്സതി അഗ്ഗിസിഖാവ ദൂരേ, വേഹായസം [വേഹാസയം (സീ. പീ.)] പബ്ബതഗ്ഗേവ അച്ചി.

൫൮. ‘‘ധീതാ ന്വയം [നയം (സീ. പീ.), ന്വായം (സ്യാ.)] കസ്സ സുനന്ദ ഹോതി, സുണിസാ ന്വയം [നയം (സീ. പീ.), ന്വായം (സ്യാ.)] കസ്സ അഥോപി ഭരിയാ;

അക്ഖാഹി മേ ഖിപ്പമിധേവ പുട്ഠോ, അവാവടാ യദി വാ അത്ഥി ഭത്താ’’.

൫൯. ‘‘അഹഞ്ഹി ജാനാമി ജനിന്ദ ഏതം, മത്യാ ച പേത്യാ ച അഥോപി അസ്സാ;

തവേവ സോ പുരിസോ ഭൂമിപാല, രത്തിന്ദിവം അപ്പമത്തോ തവത്ഥേ.

൬൦. ‘‘ഇദ്ധോ ച ഫീതോ ച സുവഡ്ഢിതോ [സുബാള്ഹികോ (പീ.)] ച, അമച്ചോ ച തേ അഞ്ഞതരോ ജനിന്ദ;

തസ്സേസാ ഭരിയാഭിപാരകസ്സ [അഹിപാരകസ്സ (സീ. പീ.), അഭിപാദകസ്സ (ക.)], ഉമ്മാദന്തീ [ഉമ്മാദന്തീതി (ക.)] നാമധേയ്യേന രാജ’’.

൬൧. ‘‘അമ്ഭോ അമ്ഭോ നാമമിദം ഇമിസ്സാ, മത്യാ ച പേത്യാ ച കതം സുസാധു;

തദാ [തഥാ (സീ. സ്യാ. പീ.)] ഹി മയ്ഹം അവലോകയന്തീ, ഉമ്മത്തകം ഉമ്മദന്തീ അകാസി’’.

൬൨. ‘‘യാ പുണ്ണമാസേ [പുണ്ണമായേ (ക.)] മിഗമന്ദലോചനാ, ഉപാവിസി പുണ്ഡരീകത്തചങ്ഗീ;

ദ്വേ പുണ്ണമായോ തദഹൂ അമഞ്ഞഹം, ദിസ്വാന പാരാവതരത്തവാസിനിം.

൬൩. ‘‘അളാരപമ്ഹേഹി സുഭേഹി വഗ്ഗുഭി, പലോഭയന്തീ മം യദാ ഉദിക്ഖതി;

വിജമ്ഭമാനാ ഹരതേവ മേ മനോ, ജാതാ വനേ കിമ്പുരിസീവ പബ്ബതേ.

൬൪. ‘‘തദാ ഹി ബ്രഹതീ സാമാ, ആമുത്തമണികുണ്ഡലാ;

ഏകച്ചവസനാ നാരീ, മിഗീ ഭന്താവുദിക്ഖതി.

൬൫. ‘‘കദാസ്സു മം തമ്ബനഖാ സുലോമാ, ബാഹാമുദൂ ചന്ദനസാരലിത്താ;

വട്ടങ്ഗുലീ സന്നതധീരകുത്തിയാ, നാരീ ഉപഞ്ഞിസ്സതി സീസതോ സുഭാ.

൬൬. ‘‘കദാസ്സു മം കഞ്ചനജാലുരച്ഛദാ, ധീതാ തിരീടിസ്സ വിലഗ്ഗമജ്ഝാ;

മുദൂഹി ബാഹാഹി പലിസ്സജിസ്സതി, ബ്രഹാവനേ ജാതദുമംവ മാലുവാ.

൬൭. ‘‘കദാസ്സു [കദാസ്സു മം (സ്യാ. ക.)] ലാഖാരസരത്തസുച്ഛവീ, ബിന്ദുത്ഥനീ പുണ്ഡരീകത്തചങ്ഗീ;

മുഖം മുഖേന ഉപനാമയിസ്സതി, സോണ്ഡോവ സോണ്ഡസ്സ സുരായ ഥാലം.

൬൮. ‘‘യദാദ്ദസം [യഥാദ്ദസം (പീ.)] തം തിട്ഠന്തിം, സബ്ബഭദ്ദം [സബ്ബഗത്തം (സീ. സ്യാ. പീ.)] മനോരമം;

തതോ സകസ്സ ചിത്തസ്സ, നാവബോധാമി കഞ്ചിനം [കിഞ്ചിനം (ക.), കിഞ്ചനം (പീ.)].

൬൯. ‘‘ഉമ്മാദന്തിമഹം ദട്ഠാ [ദിട്ഠാ (സീ. സ്യാ. പീ. ക.)], ആമുത്തമണികുണ്ഡലം;

ന സുപാമി ദിവാരത്തിം, സഹസ്സംവ പരാജിതോ.

൭൦. ‘‘സക്കോ ചേ [ച (സീ. പീ.)] മേ വരം ദജ്ജാ, സോ ച ലബ്ഭേഥ മേ വരോ;

ഏകരത്തം ദ്വിരത്തം [ദിരത്തം (പീ.)] വാ, ഭവേയ്യം അഭിപാരകോ;

ഉമ്മാദന്ത്യാ രമിത്വാന, സിവിരാജാ തതോ സിയം’’ [സിയാ (സ്യാ. പീ.)].

൭൧. ‘‘ഭൂതാനി മേ ഭൂതപതീ നമസ്സതോ, ആഗമ്മ യക്ഖോ ഇദമേതദബ്രവി;

രഞ്ഞോ മനോ ഉമ്മദന്ത്യാ നിവിട്ഠോ, ദദാമി തേ തം പരിചാരയസ്സു’’.

൭൨. ‘‘പുഞ്ഞാ വിധംസേ അമരോ ന ചമ്ഹി, ജനോ ച മേ പാപമിദഞ്ച [പാപമിദന്തി (സീ. പീ.)] ജഞ്ഞാ;

ഭുസോ ച ത്യസ്സ മനസോ വിഘാതോ, ദത്വാ പിയം ഉമ്മദന്തിം അദട്ഠാ’’.