൪൯൬. ഭിക്ഖാപരമ്പരജാതകം (൧൩)

൨൭൦. സുഖുമാലരൂപം ദിസ്വാ [ദിസ്വാന (ക. സീ. അട്ഠ.)], രട്ഠാ വിവനമാഗതം;

കൂടാഗാരവരൂപേതം, മഹാസയനമുപാസിതം [മുപോചിതം (ബഹൂസു)].

൨൭൧. തസ്സ തേ പേമകേനാഹം, അദാസിം വഡ്ഢമോദനം [ബദ്ധമോദനം (സീ. പീ.)];

സാലീനം വിചിതം ഭത്തം, സുചിം മംസൂപസേചനം.

൨൭൨. തം ത്വം ഭത്തം പടിഗ്ഗയ്ഹ, ബ്രാഹ്മണസ്സ അദാസയി [അദാപയി (സീ. സ്യാ. പീ.)];

അത്താനം [അത്തനാ (പീ. അട്ഠ. പാഠന്തരം)] അനസിത്വാന, കോയം ധമ്മോ നമത്ഥു തേ.

൨൭൩. ആചരിയോ ബ്രാഹ്മണോ മയ്ഹം, കിച്ചാകിച്ചേസു ബ്യാവടോ [വാവടോ (ക.)];

ഗരു ച ആമന്തനീയോ [ആമന്തണീയോ (സീ. പീ.)] ച, ദാതുമരഹാമി ഭോജനം.

൨൭൪. ബ്രാഹ്മണം ദാനി പുച്ഛാമി, ഗോതമം രാജപൂജിതം;

രാജാ തേ ഭത്തം പാദാസി, സുചിം മംസൂപസേചനം.

൨൭൫. തം ത്വം ഭത്തം പടിഗ്ഗയ്ഹ, ഇസിസ്സ ഭോജനം അദാ;

അഖേത്തഞ്ഞൂസി ദാനസ്സ, കോയം ധമ്മോ നമത്ഥു തേ.

൨൭൬. ഭരാമി പുത്ത [പുത്തേ (സീ. പീ.)] ദാരേ ച, ഘരേസു ഗധിതോ [ഗഥിതോ (സീ. പീ.)] അഹം;

ഭുഞ്ജേ മാനുസകേ കാമേ, അനുസാസാമി രാജിനോ.

൨൭൭. ആരഞ്ഞികസ്സ [ആരഞ്ഞകസ്സ (സീ. പീ.)] ഇസിനോ, ചിരരത്തം തപസ്സിനോ;

വുഡ്ഢസ്സ ഭാവിതത്തസ്സ, ദാതുമരഹാമി ഭോജനം.

൨൭൮. ഇസിഞ്ച ദാനി പുച്ഛാമി, കിസം ധമനിസന്ഥതം;

പരൂള്ഹകച്ഛനഖലോമം, പങ്കദന്തം രജസ്സിരം.

൨൭൯. ഏകോ അരഞ്ഞേ വിഹരസി [വിഹാസി (ക.)], നാവകങ്ഖസി ജീവിതം;

ഭിക്ഖു കേന തയാ സേയ്യോ, യസ്സ ത്വം ഭോജനം അദാ.

൨൮൦. ഖണന്താലുകലമ്ബാനി [ഖണമാലുകലമ്ബാനി (സ്യാ. ക.)], ബിലാലിതക്കലാനി ച [ബിളാലിതക്കളാനി ച (സീ. പീ.)];

ധുനം സാമാകനീവാരം, സങ്ഘാരിയം പസാരിയം [സംഹാരിയം പഹാരിയം (സ്യാ.), സംസാരിയം പസാരിയം (ക.)].

൨൮൧. സാകം ഭിസം മധും മംസം, ബദരാമലകാനി ച;

താനി ആഹരിത്വാ [ആഹത്വ (സീ. സ്യാ.)] ഭുഞ്ജാമി, അത്ഥി മേ സോ പരിഗ്ഗഹോ.

൨൮൨. പചന്തോ അപചന്തസ്സ, അമമസ്സ സകിഞ്ചനോ [അകിഞ്ചനോ (ക.)];

അനാദാനസ്സ സാദാനോ, ദാതുമരഹാമി ഭോജനം.

൨൮൩. ഭിക്ഖുഞ്ച ദാനി പുച്ഛാമി, തുണ്ഹീമാസീന സുബ്ബതം;

ഇസി തേ ഭത്തം പാദാസി, സുചിം മംസൂപസേചനം.

൨൮൪. തം ത്വം ഭത്തം പടിഗ്ഗയ്ഹ, തുണ്ഹീ ഭുഞ്ജസി ഏകകോ;

നാഞ്ഞം കഞ്ചി [കിഞ്ചി (ക.)] നിമന്തേസി, കോയം ധമ്മോ നമത്ഥു തേ.

൨൮൫. ന പചാമി ന പാചേമി, ന ഛിന്ദാമി ന ഛേദയേ;

തം മം അകിഞ്ചനം ഞത്വാ, സബ്ബപാപേഹി ആരതം.

൨൮൬. വാമേന ഭിക്ഖമാദായ, ദക്ഖിണേന കമണ്ഡലും;

ഇസി മേ ഭത്തം പാദാസി, സുചിം മംസൂപസേചനം.

൨൮൭. ഏതേ ഹി ദാതുമരഹന്തി, സമമാ സപരിഗ്ഗഹാ;

പച്ചനീകമഹം മഞ്ഞേ, യോ ദാതാരം നിമന്തയേ.

൨൮൮. അത്ഥായ വത മേ അജ്ജ, ഇധാഗച്ഛി രഥേസഭോ;

സോഹം അജ്ജ പജാനാമി [ഇതോ പുബ്ബേ ന ജാനാമി (സീ. പീ.)], യത്ഥ ദിന്നം മഹപ്ഫലം.

൨൮൯. രട്ഠേസു ഗിദ്ധാ രാജാനോ, കിച്ചാകിച്ചേസു ബ്രാഹ്മണാ;

ഇസീ മൂലഫലേ ഗിദ്ധാ, വിപ്പമുത്താ ച ഭിക്ഖവോതി.

ഭിക്ഖാപരമ്പരജാതകം തേരസമം.

തസ്സുദ്ദാനം –

സുവ കിന്നര മുക്ക ഖരാജിനസോ, ഭിസജാത മഹേസി കപോതവരോ;

അഥ മോര സതച്ഛക വാണിജകോ, അഥ രാജ സബ്രാഹ്മണ ഭിക്ഖപരന്തി.

പകിണ്ണകനിപാതം നിട്ഠിതം.