൪൯൩. മഹാവാണിജജാതകം (൧൦)

൧൮൦. വാണിജാ സമിതിം കത്വാ, നാനാരട്ഠതോ ആഗതാ;

ധനാഹരാ പക്കമിംസു, ഏകം കത്വാന ഗാമണിം.

൧൮൧. തേ തം കന്താരമാഗമ്മ, അപ്പഭക്ഖം അനോദകം;

മഹാനിഗ്രോധമദ്ദക്ഖും, സീതച്ഛായം മനോരമം.

൧൮൨. തേ ച തത്ഥ നിസീദിത്വാ, തസ്സ രുക്ഖസ്സ ഛായയാ [ഛാദിയാ (സീ. സ്യാ. പീ.)];

വാണിജാ സമചിന്തേസും, ബാലാ മോഹേന പാരുതാ.

൧൮൩. അല്ലായതേ [അദ്ദായതേ (സീ. പീ.)] അയം രുക്ഖോ, അപി വാരീവ [വാരി ച (സീ. പീ.)] സന്ദതി;

ഇങ്ഘസ്സ പുരിമം സാഖം, മയം ഛിന്ദാമ വാണിജാ.

൧൮൪. സാ ച ഛിന്നാവ പഗ്ഘരി, അച്ഛം വാരിം അനാവിലം;

തേ തത്ഥ ന്ഹത്വാ പിവിത്വാ, യാവതിച്ഛിംസു വാണിജാ.

൧൮൫. ദുതിയം സമചിന്തേസും, ബാലാ മോഹേന പാരുതാ;

ഇങ്ഘസ്സ ദക്ഖിണം സാഖം, മയം ഛിന്ദാമ വാണിജാ.

൧൮൬. സാ ച ഛിന്നാവ പഗ്ഘരി, സാലിമംസോദനം ബഹും;

അപ്പോദവണ്ണേ കുമ്മാസേ, സിങ്ഗിം വിദലസൂപിയോ [സിങ്ഗിം ബിദലസൂപിയോ (സീ. പീ.), സിങ്ഗീവേരം ലസൂപിയോ (ക.) സിങ്ഗീന്തി സിങ്ഗീവേരാദികം ഉത്തരിഭങ്ഗം; വിദലസൂപിയോതി മുഗ്ഗസൂപാദയോ (അട്ഠ.) വിദലം കലായാദിമ്ഹി വത്തതീതി സക്കതാഭിധാനേ].

൧൮൭. തേ തത്ഥ ഭുത്വാ ഖാദിത്വാ [ഭുത്വാ ച പിവിത്വാ ച (പീ.)], യാവതിച്ഛിംസു വാണിജാ;

തതിയം സമചിന്തേസും, ബാലാ മോഹേന പാരുതാ;

ഇങ്ഘസ്സ പച്ഛിമം സാഖം, മയം ഛിന്ദാമ വാണിജാ.

൧൮൮. സാ ച ഛിന്നാവ പഗ്ഘരി, നാരിയോ സമലങ്കതാ;

വിചിത്രവത്ഥാഭരണാ, ആമുത്തമണികുണ്ഡലാ.

൧൮൯. അപി സു വാണിജാ ഏകാ, നാരിയോ പണ്ണവീസതി;

സമന്താ പരിവാരിംസു [പരികരിംസു (സീ. സ്യാ. പീ.)], തസ്സ രുക്ഖസ്സ ഛായയാ [ഛാദിയാ (സീ. സ്യാ. പീ.)].

൧൯൦. തേ താഹി പരിചാരേത്വാ [പരിവാരേത്വാ (സീ. സ്യാ. പീ.)], യാവതിച്ഛിംസു വാണിജാ;

ചതുത്ഥം സമചിന്തേസും, ബാലാ മോഹേന പാരുതാ;

ഇങ്ഘസ്സ ഉത്തരം സാഖം, മയം ഛിന്ദാമ വാണിജാ.

൧൯൧. സാ ച ഛിന്നാവ പഗ്ഘരി, മുത്താ വേളുരിയാ ബഹൂ;

രജതം ജാതരൂപഞ്ച, കുത്തിയോ പടിയാനി ച.

൧൯൨. കാസികാനി ച വത്ഥാനി, ഉദ്ദിയാനി ച കമ്ബലാ [ഉദ്ദിയാനേ ച കമ്ബലേ (സീ. പീ.)];

തേ തത്ഥ ഭാരേ ബന്ധിത്വാ, യാവതിച്ഛിംസു വാണിജാ.

൧൯൩. പഞ്ചമം സമചിന്തേസും, ബാലാ മോഹേന പാരുതാ;

ഇങ്ഘസ്സ മൂലേ [മൂലം (സീ. പീ. ക.)] ഛിന്ദാമ, അപി ഭിയ്യോ ലഭാമസേ.

൧൯൪. അഥുട്ഠഹി സത്ഥവാഹോ, യാചമാനോ കതഞ്ജലീ;

നിഗ്രോധോ കിം പരജ്ഝതി [അപരജ്ഝഥ (സീ.), അപരജ്ഝതി (സ്യാ. പീ.)], വാണിജാ ഭദ്ദമത്ഥു തേ.

൧൯൫. വാരിദാ പുരിമാ സാഖാ, അന്നപാനഞ്ച ദക്ഖിണാ;

നാരിദാ പച്ഛിമാ സാഖാ, സബ്ബകാമേ ച ഉത്തരാ;

നിഗ്രോധോ കിം പരജ്ഝതി, വാണിജാ ഭദ്ദമത്ഥു തേ.

൧൯൬. യസ്സ രുക്ഖസ്സ ഛായായ, നിസീദേയ്യ സയേയ്യ വാ;

ന തസ്സ സാഖം ഭഞ്ജേയ്യ, മിത്തദുബ്ഭോ ഹി പാപകോ.

൧൯൭. തേ ച തസ്സാനാദിയിത്വാ [തസ്സ അനാദിത്വാ (സീ. സ്യാ.)], ഏകസ്സ വചനം ബഹൂ;

നിസിതാഹി കുഠാരീഹി [കുധാരീഹി (ക.)], മൂലതോ നം ഉപക്കമും.

൧൯൮. തതോ നാഗാ നിക്ഖമിംസു, സന്നദ്ധാ പണ്ണവീസതി;

ധനുഗ്ഗഹാനം തിസതാ, ഛസഹസ്സാ ച വമ്മിനോ.

൧൯൯. ഏതേ ഹനഥ ബന്ധഥ, മാ വോ മുഞ്ചിത്ഥ [മുച്ചിത്ഥ (പീ.)] ജീവിതം;

ഠപേത്വാ സത്ഥവാഹംവ, സബ്ബേ ഭസ്മം [ഭസ്മീ (സീ.)] കരോഥ നേ.

൨൦൦. തസ്മാ ഹി പണ്ഡിതോ പോസോ, സമ്പസ്സം അത്ഥമത്തനോ;

ലോഭസ്സ ന വസം ഗച്ഛേ, ഹനേയ്യാരിസകം [ഹനേയ്യ ദിസതം (സീ.), ഹനേയ്യ ദിസകം (സ്യാ.)] മനം.

൨൦൧. ഏവ [ഏത (സീ. പീ.)] മാദീനവം ഞത്വാ, തണ്ഹാ ദുക്ഖസ്സ സമ്ഭവം;

വീതതണ്ഹോ അനാദാനോ, സതോ ഭിക്ഖു പരിബ്ബജേതി.

മഹാവാണിജജാതകം ദസമം.