൪൯൪. സാധിനജാതകം (൧൧)

൨൦൨. അബ്ഭുതോ വത ലോകസ്മിം, ഉപ്പജ്ജി ലോമഹംസനോ;

ദിബ്ബോ രഥോ പാതുരഹു, വേദേഹസ്സ യസസ്സിനോ.

൨൦൩. ദേവപുത്തോ മഹിദ്ധികോ, മാതലി [മാതലീ (സീ.)] ദേവസാരഥി;

നിമന്തയിത്ഥ രാജാനം, വേദേഹം മിഥിലഗ്ഗഹം.

൨൦൪. ഏഹിമം രഥമാരുയ്ഹ, രാജസേട്ഠ ദിസമ്പതി;

ദേവാ ദസ്സനകാമാ തേ, താവതിംസാ സഇന്ദകാ;

സരമാനാ ഹി തേ ദേവാ, സുധമ്മായം സമച്ഛരേ.

൨൦൫. തതോ ച രാജാ സാധിനോ [സാധീനോ (സീ. പീ.)], വേദേഹോ മിഥിലഗ്ഗഹോ [പമുഖോ രഥമാരുഹി (സീ. പീ.)];

സഹസ്സയുത്തമാരുയ്ഹ [യുത്തം അഭിരുയ്ഹ (സീ.)], അഗാ ദേവാന സന്തികേ;

തം ദേവാ പടിനന്ദിംസു, ദിസ്വാ രാജാനമാഗതം.

൨൦൬. സ്വാഗതം തേ മഹാരാജ, അഥോ തേ അദുരാഗതം;

നിസീദ ദാനി രാജീസി [രാജിസി (സീ. സ്യാ. പീ.)], ദേവരാജസ്സ സന്തികേ.

൨൦൭. സക്കോപി പടിനന്ദിത്ഥ, വേദേഹം മിഥിലഗ്ഗഹം;

നിമന്തയിത്ഥ [നിമന്തയീ ച (സീ. പീ.)] കാമേഹി, ആസനേന ച വാസവോ.

൨൦൮. സാധു ഖോസി അനുപ്പത്തോ, ആവാസം വസവത്തിനം;

വസ ദേവേസു രാജീസി, സബ്ബകാമസമിദ്ധിസു;

താവതിംസേസു ദേവേസു, ഭുഞ്ജ കാമേ അമാനുസേ.

൨൦൯. അഹം പുരേ സഗ്ഗഗതോ രമാമി, നച്ചേഹി ഗീതേഹി ച വാദിതേഹി;

സോ ദാനി അജ്ജ ന രമാമി സഗ്ഗേ, ആയും നു ഖീണോ [ഖീണം (സ്യാ.)] മരണം നു സന്തികേ;

ഉദാഹു മൂള്ഹോസ്മി ജനിന്ദസേട്ഠ.

൨൧൦. ന തായു [ന ചായു (സീ. പീ. ക.)] ഖീണം മരണഞ്ച [മരണം തേ (സീ. പീ.)] ദൂരേ, ന ചാപി മൂള്ഹോ നരവീരസേട്ഠ;

തുയ്ഹഞ്ച [തവഞ്ച (സീ. പീ.), തവ ച (ക.)] പുഞ്ഞാനി പരിത്തകാനി, യേസം വിപാകം ഇധ വേദയിത്ഥോ [വേദയതോ (പീ. ക.)].

൨൧൧. വസ ദേവാനുഭാവേന, രാജസേട്ഠ ദിസമ്പതി;

താവതിംസേസു ദേവേസു, ഭുഞ്ജ കാമേ അമാനുസേ.

൨൧൨. യഥാ യാചിതകം യാനം, യഥാ യാചിതകം ധനം;

ഏവം സമ്പദമേവേതം, യം പരതോ ദാനപച്ചയാ.

൨൧൩. ന ചാഹമേതമിച്ഛാമി, യം പരതോ ദാനപച്ചയാ;

സയംകതാനി പുഞ്ഞാനി, തം മേ ആവേണികം [ആവേണിയം (സീ. സ്യാ. പീ.), ആവേനികം (ക.)] ധനം.

൨൧൪. സോഹം ഗന്ത്വാ മനുസ്സേസു, കാഹാമി കുസലം ബഹും;

ദാനേന സമചരിയായ, സംയമേന ദമേന ച;

യം കത്വാ സുഖിതോ ഹോതി, ന ച പച്ഛാനുതപ്പതി.

൨൧൫. ഇമാനി താനി ഖേത്താനി, ഇമം നിക്ഖം സുകുണ്ഡലം;

ഇമാ താ ഹരിതാനൂപാ, ഇമാ നജ്ജോ സവന്തിയോ.

൨൧൬. ഇമാ താ പോക്ഖരണീ രമ്മാ, ചക്കവാകപകൂജിതാ [ചക്കവാകൂപകൂജിതാ (സീ. പീ.)];

മന്ദാലകേഹി സഞ്ഛന്നാ, പദുമുപ്പലകേഹി ച;

യസ്സിമാനി മമായിംസു, കിം നു തേ ദിസതം ഗതാ.

൨൧൭. താനീധ ഖേത്താനി സോ ഭൂമിഭാഗോ, തേയേവ ആരാമവനുപചാരാ [തേ ആരാമാ തേ വന’മേ പചാരാ (സീ. പീ.), തേ യേവ ആരാമവനാനി സഞ്ചരാ (ക.)];

തമേവ മയ്ഹം ജനതം അപസ്സതോ, സുഞ്ഞംവ മേ നാരദ ഖായതേ ദിസാ.

൨൧൮. ദിട്ഠാ മയാ വിമാനാനി, ഓഭാസേന്താ ചതുദ്ദിസാ;

സമ്മുഖാ ദേവരാജസ്സ, തിദസാനഞ്ച സമ്മുഖാ.

൨൧൯. വുത്ഥം മേ ഭവനം ദിബ്യം [ദിബ്ബം (സീ. പീ.)], ഭുത്താ കാമാ അമാനുസാ;

താവതിംസേസു ദേവേസു, സബ്ബകാമസമിദ്ധിസു.

൨൨൦. സോഹം ഏതാദിസം ഹിത്വാ, പുഞ്ഞായമ്ഹി ഇധാഗതോ;

ധമ്മമേവ ചരിസ്സാമി, നാഹം രജ്ജേന അത്ഥികോ.

൨൨൧. അദണ്ഡാവചരം മഗ്ഗം, സമ്മാസമ്ബുദ്ധദേസിതം;

തം മഗ്ഗം പടിപജ്ജിസ്സം, യേന ഗച്ഛന്തി സുബ്ബതാതി.

സാധിനജാതകം [സാധിനരാജജാതകം (സ്യാ.)] ഏകാദസമം.