൪൯൨. തച്ഛസൂകരജാതകം (൯)

൧൬൦. യദേസമാനാ വിചരിമ്ഹ, പബ്ബതാനി വനാനി ച;

അന്വേസം വിചരിം [വിപുലേ (സ്യാ. ക.)] ഞാതീ, തേമേ അധിഗതാ മയാ.

൧൬൧. ബഹുഞ്ചിദം മൂലഫലം, ഭക്ഖോ ചായം അനപ്പകോ;

രമ്മാ ചിമാ ഗിരീനജ്ജോ [ഗിരിനദിയോ (സീ. പീ.)], ഫാസുവാസോ ഭവിസ്സതി.

൧൬൨. ഇധേവാഹം വസിസ്സാമി, സഹ സബ്ബേഹി ഞാതിഭി;

അപ്പോസ്സുക്കോ നിരാസങ്കീ, അസോകോ അകുതോഭയോ.

൧൬൩. അഞ്ഞമ്പി [അഞ്ഞം ഹി (സീ. പീ.)] ലേണം പരിയേസ, സത്തു നോ ഇധ വിജ്ജതി;

സോ തച്ഛ സൂകരേ ഹന്തി, ഇധാഗന്ത്വാ വരം വരം.

൧൬൪. കോ നുമ്ഹാകം [കോ നമ്ഹാകം (സീ. പീ.)] ഇധ സത്തു, കോ ഞാതീ സുസമാഗതേ;

ദുപ്പധംസേ [അപ്പധംസേ (സീ. പീ.)] പധംസേതി, തം മേ അക്ഖാഥ പുച്ഛിതാ.

൧൬൫. ഉദ്ധഗ്ഗരാജീ മിഗരാജാ, ബലീ ദാഠാവുധോ മിഗോ;

സോ തച്ഛ സൂകരേ ഹന്തി, ഇധാഗന്ത്വാ വരം വരം.

൧൬൬. ന നോ ദാഠാ ന വിജ്ജന്തി [നു വിജ്ജന്തി (ക.)], ബലം കായേ സമോഹിതം;

സബ്ബേ സമഗ്ഗാ ഹുത്വാന, വസം കാഹാമ ഏകകം.

൧൬൭. ഹദയങ്ഗമം കണ്ണസുഖം, വാചം ഭാസസി തച്ഛക;

യോപി യുദ്ധേ പലായേയ്യ, തമ്പി പച്ഛാ ഹനാമസേ.

൧൬൮. പാണാതിപാതാ വിരതോ നു അജ്ജ, അഭയം നു തേ സബ്ബഭൂതേസു ദിന്നം;

ദാഠാ നു തേ മിഗവധായ [മിഗ വിരിയം (സീ. സ്യാ. പീ.)] ന സന്തി, യോ സങ്ഘപത്തോ കപണോവ ഝായസി.

൧൬൯. ന മേ ദാഠാ ന വിജ്ജന്തി, ബലം കായേ സമോഹിതം;

ഞാതീ ച ദിസ്വാന സാമഗ്ഗീ ഏകതോ, തസ്മാ ച ഝായാമി വനമ്ഹി ഏകകോ.

൧൭൦. ഇമസ്സുദം യന്തി ദിസോദിസം പുരേ, ഭയട്ടിതാ ലേണഗവേസിനോ പുഥു;

തേ ദാനി സങ്ഗമ്മ വസന്തി ഏകതോ, യത്ഥട്ഠിതാ ദുപ്പസഹജ്ജ തേ മയാ.

൧൭൧. പരിണായകസമ്പന്നാ, സഹിതാ ഏകവാദിനോ;

തേ മം സമഗ്ഗാ ഹിംസേയ്യും, തസ്മാ നേസം ന പത്ഥയേ [അപത്ഥവേ (പീ.)].

൧൭൨. ഏകോവ ഇന്ദോ അസുരേ ജിനാതി, ഏകോവ സേനോ ഹന്തി ദിജേ പസയ്ഹ;

ഏകോവ ബ്യഗ്ഘോ മിഗസങ്ഘപത്തോ, വരം വരം ഹന്തി ബലഞ്ഹി താദിസം.

൧൭൩. ന ഹേവ ഇന്ദോ ന സേനോ, നപി ബ്യഗ്ഘോ മിഗാധിപോ;

സമഗ്ഗേ സഹിതേ ഞാതീ, ന ബ്യഗ്ഘേ [ബ്യഗ്ഘേ ച (സീ. പീ.), ബ്യഗ്ഘോ ന (സ്യാ.)] കുരുതേ വസേ.

൧൭൪. കുമ്ഭീലകാ സകുണകാ, സങ്ഘിനോ ഗണചാരിനോ;

സമ്മോദമാനാ ഏകജ്ഝം, ഉപ്പതന്തി ഡയന്തി ച.

൧൭൫. തേസഞ്ച ഡയമാനാനം, ഏകേത്ഥ അപസക്കതി [അപവത്തതി (സീ. പീ.)];

തഞ്ച സേനോ നിതാളേതി, വേയ്യഗ്ഘിയേവ സാ ഗതി.

൧൭൬. ഉസ്സാഹിതോ ജടിലേന, ലുദ്ദേനാമിസചക്ഖുനാ;

ദാഠീ ദാഠീസു പക്ഖന്ദി, മഞ്ഞമാനോ യഥാ പുരേ.

൧൭൭. സാധു സമ്ബഹുലാ ഞാതീ, അപി രുക്ഖാ അരഞ്ഞജാ;

സൂകരേഹി സമഗ്ഗേഹി, ബ്യഗ്ഘോ ഏകായനേ ഹതോ.

൧൭൮. ബ്രാഹ്മണഞ്ചേവ ബ്യഗ്ഘഞ്ച, ഉഭോ ഹന്ത്വാന സൂകരാ.

ആനന്ദിനോ പമുദിതാ, മഹാനാദം പനാദിസും.

൧൭൯. തേ സു ഉദുമ്ബരമൂലസ്മിം, സൂകരാ സുസമാഗതാ;

തച്ഛകം അഭിസിഞ്ചിംസു, ‘‘ത്വം നോ രാജാസി ഇസ്സരോ’’തി.

തച്ഛസൂകരജാതകം നവമം.