൪൮൨. രുരുമിഗരാജജാതകം (൯)

൧൧൭. തസ്സ [കസ്സ (സീ. പീ.)] ഗാമവരം ദമ്മി, നാരിയോ ച അലങ്കതാ;

യോ [കോ (സീ. സ്യാ. പീ.)] മേതം മിഗമക്ഖാതി [മക്ഖാസി (സ്യാ. ക.)], മിഗാനം മിഗമുത്തമം.

൧൧൮. മയ്ഹം ഗാമവരം ദേഹി, നാരിയോ ച അലങ്കതാ;

അഹം തേ മിഗമക്ഖിസ്സം, മിഗാനം മിഗമുത്തമം.

൧൧൯. ഏതസ്മിം വനസണ്ഡസ്മിം, അമ്ബാ സാലാ ച പുപ്ഫിതാ;

ഇന്ദഗോപകസഞ്ഛന്നാ, ഏത്ഥേസോ തിട്ഠതേ മിഗോ.

൧൨൦. ധനും അദ്വേജ്ഝം [അദേജ്ഝം (സീ. പീ.), സരജ്ജം (ക.)] കത്വാന, ഉസും സന്നയ്ഹുപാഗമി [സന്ധായുപാഗമി (സീ. പീ.)];

മിഗോ ച ദിസ്വാ രാജാനം, ദൂരതോ അജ്ഝഭാസഥ.

൧൨൧. ആഗമേഹി മഹാരാജ, മാ മം വിജ്ഝി രഥേസഭ;

കോ നു തേ ഇദമക്ഖാസി, ഏത്ഥേസോ തിട്ഠതേ മിഗോ.

൧൨൨. ഏസ പാപചരോ പോസോ, സമ്മ തിട്ഠതി ആരകാ;

സോയം [സോ ഹി (സീ. സ്യാ. പീ.)] മേ ഇദമക്ഖാസി, ഏത്ഥേസോ തിട്ഠതേ മിഗോ.

൧൨൩. സച്ചം കിരേവ മാഹംസു, നരാ ഏകച്ചിയാ ഇധ;

കട്ഠം നിപ്ലവിതം സേയ്യോ, ന ത്വേവേകച്ചി യോ നരോ.

൧൨൪. കിം നു രുരു ഗരഹസി മിഗാനം, കിം പക്ഖീനം കിം പന മാനുസാനം;

ഭയഞ്ഹി മം വിന്ദതിനപ്പരൂപം, സുത്വാന തം മാനുസിം ഭാസമാനം.

൧൨൫. യമുദ്ധരിം വാഹനേ വുയ്ഹമാനം, മഹോദകേ സലിലേ സീഘസോതേ;

തതോനിദാനം ഭയമാഗതം മമ, ദുക്ഖോ ഹവേ രാജ അസബ്ഭി സങ്ഗമോ.

൧൨൬. സോഹം ചതുപ്പത്തമിമം വിഹങ്ഗമം, തനുച്ഛിദം ഹദയേ ഓസ്സജാമി;

ഹനാമി തം മിത്തദുബ്ഭിം അകിച്ചകാരിം [ഹനാമി മിത്തദ്ദു’മകിച്ചകാരിം (സീ. പീ.)], യോ താദിസം കമ്മകതം ന ജാനേ.

൧൨൭. ധീരസ്സ ബാലസ്സ ഹവേ ജനിന്ദ, സന്തോ വധം നപ്പസംസന്തി ജാതു;

കാമം ഘരം ഗച്ഛതു പാപധമ്മോ, യഞ്ചസ്സ ഭട്ഠം തദേതസ്സ ദേഹി;

അഹഞ്ച തേ കാമകരോ ഭവാമി.

൧൨൮. അദ്ധാ രുരു അഞ്ഞതരോ സതം സോ [സതം’സേ (സീ.)], യോ ദുബ്ഭതോ [ദുബ്ഭിനോ (സ്യാ.), ദൂഭതോ (പീ.)] മാനുസസ്സ ന ദുബ്ഭി;

കാമം ഘരം ഗച്ഛതു പാപധമ്മോ, യഞ്ചസ്സ ഭട്ഠം തദേതസ്സ ദമ്മി;

അഹഞ്ച തേ കാമചാരം ദദാമി.

൧൨൯. സുവിജാനം സിങ്ഗാലാനം, സകുണാനഞ്ചവസ്സിതം;

മനുസ്സവസ്സിതം രാജ, ദുബ്ബിജാനതരം തതോ.

൧൩൦. അപി ചേ മഞ്ഞതീ പോസോ, ഞാതി മിത്തോ സഖാതി വാ;

യോ പുബ്ബേ സുമനോ ഹുത്വാ, പച്ഛാ സമ്പജ്ജതേ ദിസോ.

൧൩൧. സമാഗതാ ജാനപദാ, നേഗമാ ച സമാഗതാ;

മിഗാ സസ്സാനി ഖാദന്തി, തം ദേവോ പടിസേധതു.

൧൩൨. കാമം ജനപദോ മാസി, രട്ഠഞ്ചാപി വിനസ്സതു;

ന ത്വേവാഹം രുരും ദുബ്ഭേ, ദത്വാ അഭയദക്ഖിണം.

൧൩൩. മാ മേ ജനപദോ ആസി [മാ മം ജനപദോ അഹു (സ്യാ.)], രട്ഠഞ്ചാപി വിനസ്സതു;

ന ത്വേവാഹം [ന ത്വേവ (ക. സീ. ക.)] മിഗരാജസ്സ, വരം ദത്വാ മുസാ ഭണേതി.

രുരുമിഗരാജജാതകം നവമം.