൪൮൩. സരഭമിഗജാതകം (൧൦)

൧൩൪. ആസീസേഥേവ [ആസിംസേഥേവ (സീ. സ്യാ. പീ.)] പുരിസോ, ന നിബ്ബിന്ദേയ്യ പണ്ഡിതോ;

പസ്സാമി വോഹം അത്താനം, യഥാ ഇച്ഛിം തഥാ അഹു.

൧൩൫. ആസീസേഥേവ പുരിസോ, ന നിബ്ബിന്ദേയ്യ പണ്ഡിതോ;

പസ്സാമി വോഹം അത്താനം, ഉദകാ ഥലമുബ്ഭതം.

൧൩൬. വായമേഥേവ പുരിസോ, ന നിബ്ബിന്ദേയ്യ പണ്ഡിതോ;

പസ്സാമി വോഹം അത്താനം, യഥാ ഇച്ഛിം തഥാ അഹു.

൧൩൭. വായമേഥേവ പുരിസോ, ന നിബ്ബിന്ദേയ്യ പണ്ഡിതോ;

പസ്സാമി വോഹം അത്താനം, ഉദകാ ഥലമുബ്ഭതം.

൧൩൮. ദുക്ഖൂപനീതോപി നരോ സപഞ്ഞോ, ആസം ന ഛിന്ദേയ്യ സുഖാഗമായ;

ബഹൂ ഹി ഫസ്സാ അഹിതാ ഹിതാ ച, അവിതക്കിതാ മച്ചമുപബ്ബജന്തി [മച്ചുമുപബ്ബജന്തി (ക. സീ. പീ.), മച്ചുമുപപജ്ജന്തി (സ്യാ. ക.) ഏത്ഥ ‘‘അവിതക്കിതാപി ഫസ്സോ മച്ചം ജനം ഉപഗച്ഛന്തീ’’തി അത്ഥോ].

൧൩൯. അചിന്തിതമ്പി ഭവതി, ചിന്തിതമ്പി വിനസ്സതി;

ന ഹി ചിന്താമയാ ഭോഗാ, ഇത്ഥിയാ പുരിസസ്സ വാ.

൧൪൦. സരഭം ഗിരിദുഗ്ഗസ്മിം, യം ത്വം അനുസരീ പുരേ;

അലീനചിത്തസ്സ തുവം, വിക്കന്തമനുജീവസി [തവ, വിക്കന്തം ജീവിതം ലഭി (ക.)].

൧൪൧. യോ തം വിദുഗ്ഗാ നരകാ സമുദ്ധരി, സിലായ യോഗ്ഗം സരഭോ കരിത്വാ;

ദുക്ഖൂപനീതം മച്ചുമുഖാ പമോചയി, അലീനചിത്തം തം മിഗം [തമേവ (സ്യാ. ക.)] വദേസി.

൧൪൨. കിം ത്വം നു [തുവന്നു (സീ. പീ.)] തത്ഥേവ തദാ അഹോസി, ഉദാഹു തേ കോചി നം [തം (ക.)] ഏതദക്ഖാ;

വിവട്ടച്ഛദ്ദോ നുസി സബ്ബദസ്സീ, ഞാണം നു തേ ബ്രാഹ്മണ ഭിംസരൂപം.

൧൪൩. ന ചേവഹം തത്ഥ തദാ അഹോസിം, ന ചാപി മേ കോചി നം [തം (ക.)] ഏതദക്ഖാ;

ഗാഥാപദാനഞ്ച സുഭാസിതാനം, അത്ഥം തദാനേന്തി ജനിന്ദ ധീരാ.

൧൪൪. ആദായ പത്തിം [പത്തം (സ്യാ.), പട്ടിം (ക.)] പരവിരിയഘാതിം, ചാപേ സരം കിം വിചികിച്ഛസേ തുവം;

നുന്നോ [നുണ്ണോ (ക. സീ. സ്യാ.), തുണ്ണോ (ക.)] സരോ സരഭം ഹന്തു ഖിപ്പം, അന്നഞ്ഹി ഏതം വരപഞ്ഞ രഞ്ഞോ.

൧൪൫. അദ്ധാ പജാനാമി അഹമ്പി ഏതം, അന്നം മിഗോ ബ്രാഹ്മണ ഖത്തിയസ്സ;

പുബ്ബേ കതഞ്ച [പുബ്ബേ ച കതം (ക.)] അപചായമാനോ, തസ്മാ മിഗം സരഭം നോ ഹനാമി.

൧൪൬. നേസോ മിഗോ മഹാരാജ, അസുരേസോ ദിസമ്പതി;

ഏതം ഹന്ത്വാ മനുസ്സിന്ദ, ഭവസ്സു അമരാധിപോ.

൧൪൭. സചേ ച രാജാ [രാജ (സീ. സ്യാ. പീ.)] വിചികിച്ഛസേ തുവം, ഹന്തും മിഗം സരഭം സഹായകം [സഹായകം മേ (സീ. പീ.)];

സപുത്തദാരോ നരവീരസേട്ഠ [നരവിരിയസേട്ഠ (സീ. പീ.)], ഗന്ത്വാ [ഗന്താ (സീ. പീ. അട്ഠ.)] തുവം വേതരണിം യമസ്സ.

൧൪൮. കാമം അഹം ജാനപദാ ച സബ്ബേ, പുത്താ ച ദാരാ ച സഹായസങ്ഘാ;

ഗച്ഛേമു തം വേതരണിം യമസ്സ, ന ത്വേവ ഹഞ്ഞോ മമ പാണദോ യോ [പാണദ’സ്സ (സീ. സ്യാ. പീ.)].

൧൪൯. അയം മിഗോ കിച്ഛഗതസ്സ മയ്ഹം, ഏകസ്സ കത്താ വിവനസ്മി ഘോരേ;

തം താദിസം പുബ്ബകിച്ചം സരന്തോ, ജാനം മഹാബ്രഹ്മേ കഥം ഹനേയ്യം.

൧൫൦. മിത്താഭിരാധീ ചിരമേവ ജീവ, രജ്ജം ഇമം ധമ്മഗുണേ [രജ്ജമ്പിമം ചസ്സ ഗണേ (ക.)] പസാസ;

നാരീഗണേഹി പരിചാരിയന്തോ, മോദസ്സു രട്ഠേ തിദിവേവ വാസവോ.

൧൫൧. അക്കോധനോ നിച്ചപസന്നചിത്തോ, സബ്ബാതിഥീ യാചയോഗോ ഭവിത്വാ [പാഹുനകേ കരിത്വാ (സ്യാ.), യാചയോഗോ വിദിത്വാ (ക.)];

ദത്വാ ച ഭുത്വാ ച യഥാനുഭാവം, അനിന്ദിതോ സഗ്ഗമുപേഹി ഠാനന്തി.

സരഭമിഗജാതകം ദസമം.

തേരസകനിപാതം നിട്ഠിതം.