൪൫൩. മഹാമങ്ഗലജാതകം (൧൫)

൧൫൫. കിംസു നരോ ജപ്പമധിച്ചകാലേ, കം വാ വിജ്ജം കതമം വാ സുതാനം;

സോ മച്ചോ അസ്മിഞ്ച [അസ്മിംവ (പീ.)] പരമ്ഹി ലോകേ, കഥം കരോ സോത്ഥാനേന ഗുത്തോ.

൧൫൬. യസ്സ ദേവാ പിതരോ ച സബ്ബേ, സരീസപാ [സിരിംസപാ (സീ. സ്യാ. പീ.)] സബ്ബഭൂതാനി ചാപി;

മേത്തായ നിച്ചം അപചിതാനി ഹോന്തി, ഭൂതേസു വേ സോത്ഥാനം തദാഹു.

൧൫൭. യോ സബ്ബലോകസ്സ നിവാതവുത്തി, ഇത്ഥീപുമാനം സഹദാരകാനം;

ഖന്താ ദുരുത്താനമപ്പടികൂലവാദീ, അധിവാസനം സോത്ഥാനം തദാഹു.

൧൫൮. യോ നാവജാനാതി സഹായമിത്തേ [സഹായമത്തേ (സീ. പീ.)], സിപ്പേന കുല്യാഹി ധനേന ജച്ചാ;

രുചിപഞ്ഞോ അത്ഥകാലേ മതീമാ [മുതീമാ (സീ. പീ.)], സഹായേസു വേ സോത്ഥാനം തദാഹു.

൧൫൯. മിത്താനി വേ യസ്സ ഭവന്തി സന്തോ, സംവിസ്സത്ഥാ അവിസംവാദകസ്സ;

ന മിത്തദുബ്ഭീ സംവിഭാഗീ ധനേന, മിത്തേസു വേ സോത്ഥാനം തദാഹു.

൧൬൦. യസ്സ ഭരിയാ തുല്യവയാ സമഗ്ഗാ, അനുബ്ബതാ ധമ്മകാമാ പജാതാ [സജാതാ (ക.)];

കോലിനിയാ സീലവതീ പതിബ്ബതാ, ദാരേസു വേ സോത്ഥാനം തദാഹു.

൧൬൧. യസ്സ രാജാ ഭൂതപതി [ഭൂതപതീ (സീ. സ്യാ. പീ.)] യസസ്സീ, ജാനാതി സോചേയ്യം പരക്കമഞ്ച;

അദ്വേജ്ഝതാ സുഹദയം മമന്തി, രാജൂസു വേ സോത്ഥാനം തദാഹു.

൧൬൨. അന്നഞ്ച പാനഞ്ച ദദാതി സദ്ധോ, മാലഞ്ച ഗന്ധഞ്ച വിലേപനഞ്ച;

പസന്നചിത്തോ അനുമോദമാനോ, സഗ്ഗേസു വേ സോത്ഥാനം തദാഹു.

൧൬൩. യമരിയധമ്മേന പുനന്തി വുദ്ധാ, ആരാധിതാ സമചരിയായ സന്തോ;

ബഹുസ്സുതാ ഇസയോ സീലവന്തോ, അരഹന്തമജ്ഝേ സോത്ഥാനം തദാഹു.

൧൬൪. ഏതാനി ഖോ സോത്ഥാനാനി ലോകേ, വിഞ്ഞുപ്പസത്ഥാനി സുഖുദ്രയാനി [സുഖിന്ദ്രിയാനി (പീ.)];

താനീധ സേവേഥ നരോ സപഞ്ഞോ, ന ഹി മങ്ഗലേ കിഞ്ചനമത്ഥി സച്ചന്തി.

മഹാമങ്ഗലജാതകം പന്നരസമം.