൪൫൪. ഘടപണ്ഡിതജാതകം (൧൬)

൧൬൫. ഉട്ഠേഹി കണ്ഹ കിം സേസി, കോ അത്ഥോ സുപനേന തേ;

യോപി തുയ്ഹം [തായം (പീ.)] സകോ ഭാതാ, ഹദയം ചക്ഖു ച [ചക്ഖുംവ (പീ.)] ദക്ഖിണം;

തസ്സ വാതാ ബലീയന്തി, ഘടോ ജപ്പതി [സസം ജപ്പതി (?)] കേസവ.

൧൬൬. തസ്സ തം വചനം സുത്വാ, രോഹിണേയ്യസ്സ കേസവോ;

തരമാനരൂപോ വുട്ഠാസി, ഭാതുസോകേന അട്ടിതോ.

൧൬൭. കിം നു ഉമ്മത്തരൂപോവ, കേവലം ദ്വാരകം ഇമം;

സസോ സസോതി ലപസി, കോ നു തേ സസമാഹരി.

൧൬൮. സോവണ്ണമയം മണീമയം, ലോഹമയം അഥ രൂപിയാമയം;

സങ്ഖസിലാപവാളമയം, കാരയിസ്സാമി തേ സസം.

൧൬൯. സന്തി അഞ്ഞേപി സസകാ, അരഞ്ഞേ വനഗോചരാ;

തേപി തേ ആനയിസ്സാമി, കീദിസം സസമിച്ഛസി.

൧൭൦. ന ചാഹമേതേ [ന ചാഹമേതം (സീ.), ന വാഹമേതേ (സ്യാ.), ന വാഹമേതം (പീ.)] ഇച്ഛാമി, യേ സസാ പഥവിസ്സിതാ [പഠവിംസിതാ (സീ. സ്യാ. പീ.)];

ചന്ദതോ സസമിച്ഛാമി, തം മേ ഓഹര കേസവ.

൧൭൧. സോ നൂന മധുരം ഞാതി, ജീവിതം വിജഹിസ്സസി;

അപത്ഥിയം യോ പത്ഥയസി, ചന്ദതോ സസമിച്ഛസി.

൧൭൨. ഏവം ചേ കണ്ഹ ജാനാസി, യദഞ്ഞമനുസാസസി;

കസ്മാ പുരേ മതം പുത്തം, അജ്ജാപി മനുസോചസി.

൧൭൩. യം ന ലബ്ഭാ മനുസ്സേന, അമനുസ്സേന വാ പുന [പന (പേ. വ. ൨൧൫)];

ജാതോ മേ മാ മരീ പുത്തോ, കുതോ ലബ്ഭാ അലബ്ഭിയം.

൧൭൪. ന മന്താ മൂലഭേസജ്ജാ, ഓസധേഹി ധനേന വാ;

സക്കാ ആനയിതും കണ്ഹ, യം പേതമനുസോചസി.

൧൭൫. യസ്സ ഏതാദിസാ അസ്സു, അമച്ചാ പുരിസപണ്ഡിതാ;

യഥാ നിജ്ഝാപയേ അജ്ജ, ഘടോ പുരിസപണ്ഡിതോ.

൧൭൬. ആദിത്തം വത മം സന്തം, ഘതസിത്തംവ പാവകം;

വാരിനാ വിയ ഓസിഞ്ചം, സബ്ബം നിബ്ബാപയേ ദരം.

൧൭൭. അബ്ബഹീ വത മേ സല്ലം, യമാസി ഹദയസ്സിതം;

യോ മേ സോകപരേതസ്സ, പുത്തസോകം അപാനുദി.

൧൭൮. സോഹം അബ്ബൂള്ഹസല്ലോസ്മി, വീതസോകോ അനാവിലോ;

ന സോചാമി ന രോദാമി, തവ സുത്വാന മാണവ [ഭാതിക (പേ. വ. ൨൨൪)].

൧൭൯. ഏവം കരോന്തി സപ്പഞ്ഞാ, യേ ഹോന്തി അനുകമ്പകാ;

നിവത്തയന്തി സോകമ്ഹാ, ഘടോ ജേട്ഠംവ ഭാതരന്തി.

ഘടപണ്ഡിതജാതകം സോളസമം.

ദസകനിപാതം നിട്ഠിതം.