൪൫൨. ഭൂരിപഞ്ഞജാതകം (൧൪)

൧൪൫. സച്ചം കിര ത്വം അപി [ത്വമ്പി (സീ.), തുവമ്പി (സ്യാ.), ത്വം അസി (ക.)] ഭൂരിപഞ്ഞ, യാ താദിസീ സീരി ധിതീ മതീ ച;

ന തായതേഭാവവസൂപനിതം, യോ യവകം ഭുഞ്ജസി അപ്പസൂപം.

൧൪൬. സുഖം ദുക്ഖേന പരിപാചയന്തോ, കാലാ കാലം വിചിനം ഛന്ദഛന്നോ;

അത്ഥസ്സ ദ്വാരാനി അവാപുരന്തോ, തേനാഹം തുസ്സാമി യവോദനേന.

൧൪൭. കാലഞ്ച ഞത്വാ അഭിജീഹനായ, മന്തേഹി അത്ഥം പരിപാചയിത്വാ;

വിജമ്ഭിസ്സം സീഹവിജമ്ഭിതാനി, തായിദ്ധിയാ ദക്ഖസി മം പുനാപി.

൧൪൮. സുഖീപി ഹേകേ [സുഖീ ഹി ഏകേ (സീ.), സുഖീതി ഹേകേ (?)] ന കരോന്തി പാപം, അവണ്ണസംസഗ്ഗഭയാ പുനേകേ;

പഹൂ സമാനോ വിപുലത്ഥചിന്തീ, കിംകാരണാ മേ ന കരോസി ദുക്ഖം.

൧൪൯. ന പണ്ഡിതാ അത്തസുഖസ്സ ഹേതു, പാപാനി കമ്മാനി സമാചരന്തി;

ദുക്ഖേന ഫുട്ഠാ ഖലിതാപി സന്താ, ഛന്ദാ ച ദോസാ ന ജഹന്തി ധമ്മം.

൧൫൦. യേന കേനചി വണ്ണേന, മുദുനാ ദാരുണേന വാ;

ഉദ്ധരേ ദീനമത്താനം, പച്ഛാ ധമ്മം സമാചരേ.

൧൫൧. യസ്സ രുക്ഖസ്സ ഛായായ, നിസീദേയ്യ സയേയ്യ വാ;

ന തസ്സ സാഖം ഭഞ്ജേയ്യ, മിത്തദുബ്ഭോ ഹി പാപകോ.

൧൫൨. യസ്സാപി [യസ്സ ഹി (സീ. ക.)] ധമ്മം പുരിസോ [മനുജോ (സീ.)] വിജഞ്ഞാ, യേ ചസ്സ കങ്ഖം വിനയന്തി സന്തോ;

തം ഹിസ്സ ദീപഞ്ച പരായനഞ്ച, ന തേന മേത്തിം ജരയേഥ പഞ്ഞോ.

൧൫൩. അലസോ ഗിഹീ കാമഭോഗീ ന സാധു, അസഞ്ഞതോ പബ്ബജിതോ ന സാധു;

രാജാ ന സാധു അനിസമ്മകാരീ, യോ പണ്ഡിതോ കോധനോ തം ന സാധു.

൧൫൪. നിസമ്മ ഖത്തിയോ കയിരാ, നാനിസമ്മ ദിസമ്പതി;

നിസമ്മകാരിനോ രാജ, യസോ കിത്തി ച വഡ്ഢതീതി.

ഭൂരിപഞ്ഞജാതകം ചുദ്ദസമം.