൧. അപണ്ണകവഗ്ഗോ

൧. അപണ്ണകജാതകം

൧. അപണ്ണകം ഠാനമേകേ, ദുതിയം ആഹു തക്കികാ;

ഏതദഞ്ഞായ മേധാവീ, തം ഗണ്ഹേ യദപണ്ണകന്തി [തം ഗണ്ഹേയ്യ അപണ്ണകം (ക.)].

അപണ്ണകജാതകം പഠമം.

൨. വണ്ണുപഥജാതകം

൨. അകിലാസുനോ വണ്ണുപഥേ [വണ്ണപഥേ (ക.)] ഖണന്താ, ഉദങ്ഗണേ തത്ഥ പപം അവിന്ദും;

ഏവം മുനീ വീരിയ [മുനി വിരിയ (പീ.), മുനി വീരിയ (സ്യാ. ക.)] ബലൂപപന്നോ, അകിലാസു വിന്ദേ ഹദയസ്സ സന്തിന്തി.

വണ്ണുപഥജാതകം ദുതിയം.

൩. സേരിവവാണിജജാതകം

൩. ഇധ ചേ നം [ഇധ ചേ ഹി നം (സീ. പീ.)] വിരാധേസി, സദ്ധമ്മസ്സ നിയാമതം [നിയാമകം (സ്യാ. ക.)];

ചിരം ത്വം അനുതപ്പേസി [അനുതപേസ്സസി (സീ. പീ.), അനുതപ്പിസ്സസി (?)], സേരിവായംവ വാണിജോതി.

സേരിവവാണിജജാതകം തതിയം.

൪. ചൂളസേട്ഠിജാതകം

൪. അപ്പകേനപി മേധാവീ, പാഭതേന വിചക്ഖണോ;

സമുട്ഠാപേതി അത്താനം, അണും അഗ്ഗിംവ സന്ധമന്തി.

ചൂള [ചുല്ല (സീ.), ചുല്ലക (സ്യാ. പീ.)] സേട്ഠിജാതകം ചതുത്ഥം.

൫. തണ്ഡുലനാളിജാതകം

൫. [കിമഗ്ഘതീ തണ്ഡുലനാളികാ ച, ബാരാണസീ അന്തരബാഹിരാനി; അസ്സപഞ്ചസതേ താനി, ഏകാ തണ്ഡുലനാളികാതി; (സ്യാ.)] കിമഗ്ഘതി തണ്ഡുലനാളികായ, അസ്സാന മൂലായ വദേഹി രാജ [നാളികാ ച (സീ.), നാളികായ (ക. സീ. അട്ഠ.)];

ബാരാണസിം സന്തരബാഹിരതോ [ബാഹിരന്തം (സീ.)], അയമഗ്ഘതി തണ്ഡുലനാളികാതി [കിമഗ്ഘതീ വണ്ഡുലനാളികാ ച, ബാരാണസീ അന്തരബാഹിരാനി; അസ്സപഞ്ചസതേ താനി, ഏകാ തണ്ഡുലനാളികാതി; (സ്യാ.)].

തണ്ഡുലനാളിജാതകം പഞ്ചമം.

൬. ദേവധമ്മജാതകം

൬. ഹിരിഓത്തപ്പസമ്പന്നാ, സുക്കധമ്മസമാഹിതാ;

സന്തോ സപ്പുരിസാ ലോകേ, ദേവധമ്മാതി വുച്ചരേതി.

ദേവധമ്മജാതകം ഛട്ഠം.

൭. കട്ഠഹാരിജാതകം

൭. പുത്തോ ത്യാഹം മഹാരാജ, ത്വം മം പോസ ജനാധിപ;

അഞ്ഞേപി ദേവോ പോസേതി, കിഞ്ച [കിഞ്ചി (ക.)] ദേവോ സകം പജന്തി.

കട്ഠഹാരി [കട്ഠവാഹന (ക.)] ജാതകം സത്തമം.

൮. ഗാമണിജാതകം

൮. അപി അതരമാനാനം, ഫലാസാവ സമിജ്ഝതി;

വിപക്കബ്രഹ്മചരിയോസ്മി, ഏവം ജാനാഹി ഗാമണീതി.

ഗാമണിജാതകം അട്ഠമം.

൯. മഘദേവജാതകം

൯. ഉത്തമങ്ഗരുഹാ മയ്ഹം, ഇമേ ജാതാ വയോഹരാ;

പാതുഭൂതാ ദേവദൂതാ, പബ്ബജ്ജാസമയോ മമാതി.

മഘദേവ [മഖാദേവ (സീ. പീ.), ദേവദൂത (ക.)] ജാതകം നവമം.

൧൦. സുഖവിഹാരിജാതകം

൧൦. യഞ്ച അഞ്ഞേ ന രക്ഖന്തി, യോ ച അഞ്ഞേ ന രക്ഖതി;

സ വേ രാജ സുഖം സേതി, കാമേസു അനപേക്ഖവാതി.

സുഖവിഹാരിജാതകം ദസമം.

അപണ്ണകവഗ്ഗോ പഠമോ.

തസ്സുദ്ദാനം –

വരാപണ്ണക വണ്ണുപഥ സേരിവരോ, സുവിചക്ഖണ തണ്ഡുലനാളികസ്സാ;

ഹിരി പുത്തവരുത്തഗാമണിനാ, യോ ച ന രക്ഖതി തേന ദസാതി.