൫. സീലസമ്പന്നസുത്തം

൧൦൪. വുത്തഞ്ഹേതം ഭഗവതാ, വുത്തമരഹതാതി മേ സുതം –

‘‘യേ തേ, ഭിക്ഖവേ, ഭിക്ഖൂ സീലസമ്പന്നാ സമാധിസമ്പന്നാ പഞ്ഞാസമ്പന്നാ വിമുത്തിസമ്പന്നാ വിമുത്തിഞാണദസ്സനസമ്പന്നാ ഓവാദകാ വിഞ്ഞാപകാ സന്ദസ്സകാ സമാദപകാ സമുത്തേജകാ സമ്പഹംസകാ അലംസമക്ഖാതാരോ സദ്ധമ്മസ്സ ദസ്സനമ്പഹം, ഭിക്ഖവേ, തേസം ഭിക്ഖൂനം ബഹൂപകാരം വദാമി; സവനമ്പഹം, ഭിക്ഖവേ, തേസം ഭിക്ഖൂനം ബഹൂപകാരം വദാമി; ഉപസങ്കമനമ്പഹം, ഭിക്ഖവേ, തേസം ഭിക്ഖൂനം ബഹൂപകാരം വദാമി; പയിരുപാസനമ്പഹം, ഭിക്ഖവേ, തേസം ഭിക്ഖൂനം ബഹൂപകാരം വദാമി; അനുസ്സരണമ്പഹം, ഭിക്ഖവേ, തേസം ഭിക്ഖൂനം ബഹൂപകാരം വദാമി; അനുപബ്ബജ്ജമ്പഹം [അനുസ്സതിമ്പഹം (സ്യാ.)], ഭിക്ഖവേ, തേസം ഭിക്ഖൂനം ബഹൂപകാരം വദാമി. തം കിസ്സ ഹേതു? തഥാരൂപേ, ഭിക്ഖവേ, ഭിക്ഖൂ സേവതോ ഭജതോ പയിരുപാസതോ അപരിപൂരോപി സീലക്ഖന്ധോ ഭാവനാപാരിപൂരിം ഗച്ഛതി, അപരിപൂരോപി സമാധിക്ഖന്ധോ ഭാവനാപാരിപൂരിം ഗച്ഛതി, അപരിപൂരോപി പഞ്ഞാക്ഖന്ധോ ഭാവനാപാരിപൂരിം ഗച്ഛതി, അപരിപൂരോപി വിമുത്തിക്ഖന്ധോ ഭാവനാപാരിപൂരിം ഗച്ഛതി, അപരിപൂരോപി വിമുത്തിഞാണദസ്സനക്ഖന്ധോ ഭാവനാപാരിപൂരിം ഗച്ഛതി. ഏവരൂപാ ച തേ, ഭിക്ഖവേ, ഭിക്ഖൂ സത്ഥാരോതിപി വുച്ചന്തി, സത്ഥവാഹാതിപി വുച്ചന്തി, രണഞ്ജഹാതിപി വുച്ചന്തി, തമോനുദാതിപി വുച്ചന്തി, ആലോകകരാതിപി വുച്ചന്തി, ഓഭാസകരാതിപി വുച്ചന്തി, പജ്ജോതകരാതിപി വുച്ചന്തി, ഉക്കാധാരാതിപി വുച്ചന്തി, പഭങ്കരാതിപി വുച്ചന്തി, അരിയാതിപി വുച്ചന്തി, ചക്ഖുമന്തോതിപി വുച്ചന്തീ’’തി. ഏതമത്ഥം ഭഗവാ അവോച. തത്ഥേതം ഇതി വുച്ചതി –

‘‘പാമോജ്ജകരണം ഠാനം [… കരണഠാനം (സീ. സ്യാ.)], ഏതം ഹോതി വിജാനതം;

യദിദം ഭാവിതത്താനം, അരിയാനം ധമ്മജീവിനം.

‘‘തേ ജോതയന്തി സദ്ധമ്മം, ഭാസയന്തി പഭങ്കരാ;

ആലോകകരണാ ധീരാ, ചക്ഖുമന്തോ രണഞ്ജഹാ.

‘‘യേസം വേ സാസനം സുത്വാ, സമ്മദഞ്ഞായ പണ്ഡിതാ;

ജാതിക്ഖയമഭിഞ്ഞായ, നാഗച്ഛന്തി പുനബ്ഭവ’’ന്തി.

അയമ്പി അത്ഥോ വുത്തോ ഭഗവതാ, ഇതി മേ സുതന്തി. പഞ്ചമം.