൯. പാപവഗ്ഗോ

൧൧൬. അഭിത്ഥരേഥ കല്യാണേ, പാപാ ചിത്തം നിവാരയേ;

ദന്ധഞ്ഹി കരോതോ പുഞ്ഞം, പാപസ്മിം രമതീ മനോ.

൧൧൭. പാപഞ്ചേ പുരിസോ കയിരാ, ന നം [ന തം (സീ. പീ.)] കയിരാ പുനപ്പുനം;

ന തമ്ഹി ഛന്ദം കയിരാഥ, ദുക്ഖോ പാപസ്സ ഉച്ചയോ.

൧൧൮. പുഞ്ഞഞ്ചേ പുരിസോ കയിരാ, കയിരാ നം [കയിരാഥേതം (സീ. സ്യാ.), കയിരാഥേനം (പീ.)] പുനപ്പുനം;

തമ്ഹി ഛന്ദം കയിരാഥ, സുഖോ പുഞ്ഞസ്സ ഉച്ചയോ.

൧൧൯. പാപോപി പസ്സതി ഭദ്രം, യാവ പാപം ന പച്ചതി;

യദാ ച പച്ചതി പാപം, അഥ പാപോ പാപാനി [അഥ പാപാനി (?)] പസ്സതി.

൧൨൦. ഭദ്രോപി പസ്സതി പാപം, യാവ ഭദ്രം ന പച്ചതി;

യദാ ച പച്ചതി ഭദ്രം, അഥ ഭദ്രോ ഭദ്രാനി [അഥ ഭദ്രാനി (?)] പസ്സതി.

൧൨൧. മാവമഞ്ഞേഥ [മാപ്പമഞ്ഞേഥ (സീ. സ്യാ. പീ.)] പാപസ്സ, ന മന്തം [ന മം തം (സീ. പീ.), ന മത്തം (സ്യാ.)] ആഗമിസ്സതി;

ഉദബിന്ദുനിപാതേന, ഉദകുമ്ഭോപി പൂരതി;

ബാലോ പൂരതി [പൂരതി ബാലോ (സീ. ക.), ആപൂരതി ബാലോ (സ്യാ.)] പാപസ്സ, ഥോകം ഥോകമ്പി [ഥോക ഥോകമ്പി (സീ. പീ.)] ആചിനം.

൧൨൨. മാവമഞ്ഞേഥ പുഞ്ഞസ്സ, ന മന്തം ആഗമിസ്സതി;

ഉദബിന്ദുനിപാതേന, ഉദകുമ്ഭോപി പൂരതി;

ധീരോ പൂരതി പുഞ്ഞസ്സ, ഥോകം ഥോകമ്പി ആചിനം.

൧൨൩. വാണിജോവ ഭയം മഗ്ഗം, അപ്പസത്ഥോ മഹദ്ധനോ;

വിസം ജീവിതുകാമോവ, പാപാനി പരിവജ്ജയേ.

൧൨൪. പാണിമ്ഹി ചേ വണോ നാസ്സ, ഹരേയ്യ പാണിനാ വിസം;

നാബ്ബണം വിസമന്വേതി, നത്ഥി പാപം അകുബ്ബതോ.

൧൨൫. യോ അപ്പദുട്ഠസ്സ നരസ്സ ദുസ്സതി, സുദ്ധസ്സ പോസസ്സ അനങ്ഗണസ്സ;

തമേവ ബാലം പച്ചേതി പാപം, സുഖുമോ രജോ പടിവാതംവ ഖിത്തോ.

൧൨൬. ഗബ്ഭമേകേ ഉപ്പജ്ജന്തി, നിരയം പാപകമ്മിനോ;

സഗ്ഗം സുഗതിനോ യന്തി, പരിനിബ്ബന്തി അനാസവാ.

൧൨൭. ന അന്തലിക്ഖേ ന സമുദ്ദമജ്ഝേ, ന പബ്ബതാനം വിവരം പവിസ്സ [പവിസം (സ്യാ.)];

ന വിജ്ജതീ [ന വിജ്ജതി (ക. സീ. പീ. ക.)] സോ ജഗതിപ്പദേസോ, യത്ഥട്ഠിതോ [യത്രട്ഠിതോ (സ്യാ.)] മുച്ചേയ്യ പാപകമ്മാ.

൧൨൮. ന അന്തലിക്ഖേ ന സമുദ്ദമജ്ഝേ, ന പബ്ബതാനം വിവരം പവിസ്സ;

ന വിജ്ജതീ സോ ജഗതിപ്പദേസോ, യത്ഥട്ഠിതം [യത്രട്ഠിതം (സ്യാ.)] നപ്പസഹേയ്യ മച്ചു.

പാപവഗ്ഗോ നവമോ നിട്ഠിതോ.