൧൫. സുഖവഗ്ഗോ

൧൯൭. സുസുഖം വത ജീവാമ, വേരിനേസു അവേരിനോ;

വേരിനേസു മനുസ്സേസു, വിഹരാമ അവേരിനോ.

൧൯൮. സുസുഖം വത ജീവാമ, ആതുരേസു അനാതുരാ;

ആതുരേസു മനുസ്സേസു, വിഹരാമ അനാതുരാ.

൧൯൯. സുസുഖം വത ജീവാമ, ഉസ്സുകേസു അനുസ്സുകാ;

ഉസ്സുകേസു മനസ്സേസു, വിഹരാമ അനുസ്സുകാ.

൨൦൦. സുസുഖം വത ജീവാമ, യേസം നോ നത്ഥി കിഞ്ചനം;

പീതിഭക്ഖാ ഭവിസ്സാമ, ദേവാ ആഭസ്സരാ യഥാ.

൨൦൧. ജയം വേരം പസവതി, ദുക്ഖം സേതി പരാജിതോ;

ഉപസന്തോ സുഖം സേതി, ഹിത്വാ ജയപരാജയം.

൨൦൨. നത്ഥി രാഗസമോ അഗ്ഗി, നത്ഥി ദോസസമോ കലി;

നത്ഥി ഖന്ധസമാ [ഖന്ധാദിസാ (സീ. സ്യാ. പീ. രൂപസിദ്ധിയാ സമേതി)] ദുക്ഖാ, നത്ഥി സന്തിപരം സുഖം.

൨൦൩. ജിഘച്ഛാപരമാ രോഗാ, സങ്ഖാരപരമാ [സങ്കാരാ പരമാ (ബഹൂസു)] ദുഖാ;

ഏതം ഞത്വാ യഥാഭൂതം, നിബ്ബാനം പരമം സുഖം.

൨൦൪. ആരോഗ്യപരമാ ലാഭാ, സന്തുട്ഠിപരമം ധനം;

വിസ്സാസപരമാ ഞാതി [വിസ്സാസപരമോ ഞാതി (ക. സീ.), വിസ്സാസപരമാ ഞാതീ (സീ. അട്ഠ.), വിസ്സാസാ പരമാ ഞാതി (ക.)], നിബ്ബാനം പരമം [നിബ്ബാണപരമം (ക. സീ.)] സുഖം.

൨൦൫. പവിവേകരസം പിത്വാ [പീത്വാ (സീ. സ്യാ. കം. പീ.)], രസം ഉപസമസ്സ ച;

നിദ്ദരോ ഹോതി നിപ്പാപോ, ധമ്മപീതിരസം പിവം.

൨൦൬. സാഹു ദസ്സനമരിയാനം, സന്നിവാസോ സദാ സുഖോ;

അദസ്സനേന ബാലാനം, നിച്ചമേവ സുഖീ സിയാ.

൨൦൭. ബാലസങ്ഗതചാരീ [ബാലസങ്ഗതിചാരീ (ക.)] ഹി, ദീഘമദ്ധാന സോചതി;

ദുക്ഖോ ബാലേഹി സംവാസോ, അമിത്തേനേവ സബ്ബദാ;

ധീരോ ച സുഖസംവാസോ, ഞാതീനംവ സമാഗമോ.

൨൦൮. തസ്മാ ഹി –

ധീരഞ്ച പഞ്ഞഞ്ച ബഹുസ്സുതഞ്ച, ധോരയ്ഹസീലം വതവന്തമരിയം;

തം താദിസം സപ്പുരിസം സുമേധം, ഭജേഥ നക്ഖത്തപഥംവ ചന്ദിമാ [തസ്മാ ഹി ധീരം പഞ്ഞഞ്ച, ബഹുസ്സുതഞ്ച ധോരയ്ഹം; സീലം ധുതവതമരിയം, തം താദിസം സപ്പുരിസം; സുമേധം ഭജേഥ നക്ഖത്തപഥംവ ചന്ദിമാ; (ക.)].

സുഖവഗ്ഗോ പന്നരസമോ നിട്ഠിതോ.