൧൧. ജരാവഗ്ഗോ

൧൪൬. കോ നു ഹാസോ [കിന്നു ഹാസോ (ക.)] കിമാനന്ദോ, നിച്ചം പജ്ജലിതേ സതി;

അന്ധകാരേന ഓനദ്ധാ, പദീപം ന ഗവേസഥ.

൧൪൭. പസ്സ ചിത്തകതം ബിമ്ബം, അരുകായം സമുസ്സിതം;

ആതുരം ബഹുസങ്കപ്പം, യസ്സ നത്ഥി ധുവം ഠിതി.

൧൪൮. പരിജിണ്ണമിദം രൂപം, രോഗനീളം [രോഗനിഡ്ഢം (സീ. പീ.), രോഗനിദ്ധം (സ്യാ.)] പഭങ്ഗുരം;

ഭിജ്ജതി പൂതിസന്ദേഹോ, മരണന്തഞ്ഹി ജീവിതം.

൧൪൯. യാനിമാനി അപത്ഥാനി [യാനിമാനി അപത്ഥാനി (സീ. സ്യാ. പീ.), യാനിമാനി’പവിദ്ധാനി (?)], അലാബൂനേവ [അലാപൂനേവ (സീ. സ്യാ. പീ.)] സാരദേ;

കാപോതകാനി അട്ഠീനി, താനി ദിസ്വാന കാ രതി.

൧൫൦. അട്ഠീനം നഗരം കതം, മംസലോഹിതലേപനം;

യത്ഥ ജരാ ച മച്ചു ച, മാനോ മക്ഖോ ച ഓഹിതോ.

൧൫൧. ജീരന്തി വേ രാജരഥാ സുചിത്താ, അഥോ സരീരമ്പി ജരം ഉപേതി;

സതഞ്ച ധമ്മോ ന ജരം ഉപേതി, സന്തോ ഹവേ സബ്ഭി പവേദയന്തി.

൧൫൨. അപ്പസ്സുതായം പുരിസോ, ബലിബദ്ധോവ [ബലിവദ്ദോവ (സീ. സ്യാ. പീ.)] ജീരതി;

മംസാനി തസ്സ വഡ്ഢന്തി, പഞ്ഞാ തസ്സ ന വഡ്ഢതി.

൧൫൩. അനേകജാതിസംസാരം, സന്ധാവിസ്സം അനിബ്ബിസം;

ഗഹകാരം [ഗഹകാരകം (സീ. സ്യാ. പീ.)] ഗവേസന്തോ, ദുക്ഖാ ജാതി പുനപ്പുനം.

൧൫൪. ഗഹകാരക ദിട്ഠോസി, പുന ഗേഹം ന കാഹസി;

സബ്ബാ തേ ഫാസുകാ ഭഗ്ഗാ, ഗഹകൂടം വിസങ്ഖതം;

വിസങ്ഖാരഗതം ചിത്തം, തണ്ഹാനം ഖയമജ്ഝഗാ.

൧൫൫. അചരിത്വാ ബ്രഹ്മചരിയം, അലദ്ധാ യോബ്ബനേ ധനം;

ജിണ്ണകോഞ്ചാവ ഝായന്തി, ഖീണമച്ഛേവ പല്ലലേ.

൧൫൬. അചരിത്വാ ബ്രഹ്മചരിയം, അലദ്ധാ യോബ്ബനേ ധനം;

സേന്തി ചാപാതിഖീണാവ, പുരാണാനി അനുത്ഥുനം.

ജരാവഗ്ഗോ ഏകാദസമോ നിട്ഠിതോ.