൧. യമകവഗ്ഗോ

൧. മനോപുബ്ബങ്ഗമാ ധമ്മാ, മനോസേട്ഠാ മനോമയാ;

മനസാ ചേ പദുട്ഠേന, ഭാസതി വാ കരോതി വാ;

തതോ നം ദുക്ഖമന്വേതി, ചക്കംവ വഹതോ പദം.

൨. മനോപുബ്ബങ്ഗമാ ധമ്മാ, മനോസേട്ഠാ മനോമയാ;

മനസാ ചേ പസന്നേന, ഭാസതി വാ കരോതി വാ;

തതോ നം സുഖമന്വേതി, ഛായാവ അനപായിനീ [അനുപായിനീ (ക.)].

൩. അക്കോച്ഛി മം അവധി മം, അജിനി [അജിനീ (?)] മം അഹാസി മേ;

യേ ച തം ഉപനയ്ഹന്തി, വേരം തേസം ന സമ്മതി.

൪. അക്കോച്ഛി മം അവധി മം, അജിനി മം അഹാസി മേ;

യേ ച തം നുപനയ്ഹന്തി, വേരം തേസൂപസമ്മതി.

൫. ന ഹി വേരേന വേരാനി, സമ്മന്തീധ കുദാചനം;

അവേരേന ച സമ്മന്തി, ഏസ ധമ്മോ സനന്തനോ.

൬. പരേ ച ന വിജാനന്തി, മയമേത്ഥ യമാമസേ;

യേ ച തത്ഥ വിജാനന്തി, തതോ സമ്മന്തി മേധഗാ.

൭. സുഭാനുപസ്സിം വിഹരന്തം, ഇന്ദ്രിയേസു അസംവുതം;

ഭോജനമ്ഹി ചാമത്തഞ്ഞും, കുസീതം ഹീനവീരിയം;

തം വേ പസഹതി മാരോ, വാതോ രുക്ഖംവ ദുബ്ബലം.

൮. അസുഭാനുപസ്സിം വിഹരന്തം, ഇന്ദ്രിയേസു സുസംവുതം;

ഭോജനമ്ഹി ച മത്തഞ്ഞും, സദ്ധം ആരദ്ധവീരിയം;

തം വേ നപ്പസഹതി മാരോ, വാതോ സേലംവ പബ്ബതം.

൯. അനിക്കസാവോ കാസാവം, യോ വത്ഥം പരിദഹിസ്സതി;

അപേതോ ദമസച്ചേന, ന സോ കാസാവമരഹതി.

൧൦. യോ ച വന്തകസാവസ്സ, സീലേസു സുസമാഹിതോ;

ഉപേതോ ദമസച്ചേന, സ വേ കാസാവമരഹതി.

൧൧. അസാരേ സാരമതിനോ, സാരേ ചാസാരദസ്സിനോ;

തേ സാരം നാധിഗച്ഛന്തി, മിച്ഛാസങ്കപ്പഗോചരാ.

൧൨. സാരഞ്ച സാരതോ ഞത്വാ, അസാരഞ്ച അസാരതോ;

തേ സാരം അധിഗച്ഛന്തി, സമ്മാസങ്കപ്പഗോചരാ.

൧൩. യഥാ അഗാരം ദുച്ഛന്നം, വുട്ഠീ സമതിവിജ്ഝതി;

ഏവം അഭാവിതം ചിത്തം, രാഗോ സമതിവിജ്ഝതി.

൧൪. യഥാ അഗാരം സുഛന്നം, വുട്ഠീ ന സമതിവിജ്ഝതി;

ഏവം സുഭാവിതം ചിത്തം, രാഗോ ന സമതിവിജ്ഝതി.

൧൫. ഇധ സോചതി പേച്ച സോചതി, പാപകാരീ ഉഭയത്ഥ സോചതി;

സോ സോചതി സോ വിഹഞ്ഞതി, ദിസ്വാ കമ്മകിലിട്ഠമത്തനോ.

൧൬. ഇധ മോദതി പേച്ച മോദതി, കതപുഞ്ഞോ ഉഭയത്ഥ മോദതി;

സോ മോദതി സോ പമോദതി, ദിസ്വാ കമ്മവിസുദ്ധിമത്തനോ.

൧൭. ഇധ തപ്പതി പേച്ച തപ്പതി, പാപകാരീ [പാപകാരി (?)] ഉഭയത്ഥ തപ്പതി;

‘‘പാപം മേ കത’’ന്തി തപ്പതി, ഭിയ്യോ [ഭീയോ (സീ.)] തപ്പതി ദുഗ്ഗതിം ഗതോ.

൧൮. ഇധ നന്ദതി പേച്ച നന്ദതി, കതപുഞ്ഞോ ഉഭയത്ഥ നന്ദതി;

‘‘പുഞ്ഞം മേ കത’’ന്തി നന്ദതി, ഭിയ്യോ നന്ദതി സുഗ്ഗതിം ഗതോ.

൧൯. ബഹുമ്പി ചേ സംഹിത [സഹിതം (സീ. സ്യാ. കം. പീ.)] ഭാസമാനോ, ന തക്കരോ ഹോതി നരോ പമത്തോ;

ഗോപോവ ഗാവോ ഗണയം പരേസം, ന ഭാഗവാ സാമഞ്ഞസ്സ ഹോതി.

൨൦. അപ്പമ്പി ചേ സംഹിത ഭാസമാനോ, ധമ്മസ്സ ഹോതി [ഹോതീ (സീ. പീ.)] അനുധമ്മചാരീ;

രാഗഞ്ച ദോസഞ്ച പഹായ മോഹം, സമ്മപ്പജാനോ സുവിമുത്തചിത്തോ;

അനുപാദിയാനോ ഇധ വാ ഹുരം വാ, സ ഭാഗവാ സാമഞ്ഞസ്സ ഹോതി.

യമകവഗ്ഗോ പഠമോ നിട്ഠിതോ.