൩. കുരുരാജചരിയാ

൨൦. ‘‘പുനാപരം യദാ ഹോമി, ഇന്ദപത്ഥേ [ഇന്ദപത്തേ (സീ. ക.)] പുരുത്തമേ;

രാജാ ധനഞ്ചയോ നാമ, കുസലേ ദസഹുപാഗതോ.

൨൧. ‘‘കലിങ്ഗരട്ഠവിസയാ, ബ്രാഹ്മണാ ഉപഗഞ്ഛു മം;

ആയാചും മം ഹത്ഥിനാഗം, ധഞ്ഞം മങ്ഗലസമ്മതം.

൨൨. ‘‘‘അവുട്ഠികോ ജനപദോ, ദുബ്ഭിക്ഖോ ഛാതകോ മഹാ;

ദദാഹി പവരം നാഗം, നീലം അഞ്ജനസവ്ഹയം.

൨൩. ‘‘‘ന മേ യാചകമനുപ്പത്തേ, പടിക്ഖേപോ അനുച്ഛവോ;

മാ മേ ഭിജ്ജി സമാദാനം, ദസ്സാമി വിപുലം ഗജം’.

൨൪. ‘‘നാഗം ഗഹേത്വാ സോണ്ഡായ, ഭിങ്ഗാരേ [ഭിങ്കാരേ (സീ.)] രതനാമയേ;

ജലം ഹത്ഥേ ആകിരിത്വാ, ബ്രാഹ്മണാനം അദം ഗജം.

൨൫. ‘‘തസ്സ നാഗേ പദിന്നമ്ഹി, അമച്ചാ ഏതദബ്രവും;

‘കിം നു തുയ്ഹം വരം നാഗം, യാചകാനം പദസ്സസി.

൨൬. ‘‘‘ധഞ്ഞം മങ്ഗലസമ്പന്നം, സങ്ഗാമവിജയുത്തമം;

തസ്മിം നാഗേ പദിന്നമ്ഹി, കിം തേ രജ്ജം കരിസ്സതി.

൨൭. ‘‘‘രജ്ജമ്പി മേ ദദേ സബ്ബം, സരീരം ദജ്ജമത്തനോ;

സബ്ബഞ്ഞുതം പിയം മയ്ഹം, തസ്മാ നാഗം അദാസഹ’’’ന്തി.

കുരുരാജചരിയം തതിയം.