൬. സുമനബുദ്ധവംസോ

൧. മങ്ഗലസ്സ അപരേന, സുമനോ നാമ നായകോ;

സബ്ബധമ്മേഹി അസമോ, സബ്ബസത്താനമുത്തമോ.

൨. തദാ അമതഭേരിം സോ, ആഹനീ മേഖലേ പുരേ;

ധമ്മസങ്ഖസമായുത്തം, നവങ്ഗം ജിനസാസനം.

൩. നിജ്ജിനിത്വാ കിലേസേ സോ, പത്വാ സമ്ബോധിമുത്തമം;

മാപേസി നഗരം സത്ഥാ, സദ്ധമ്മപുരവരുത്തമം.

൪. നിരന്തരം അകുടിലം, ഉജും വിപുലവിത്ഥതം;

മാപേസി സോ മഹാവീഥിം, സതിപട്ഠാനവരുത്തമം.

൫. ഫലേ ചത്താരി സാമഞ്ഞേ, ചതസ്സോ പടിസമ്ഭിദാ;

ഛളഭിഞ്ഞാട്ഠസമാപത്തീ, പസാരേസി തത്ഥ വീഥിയം.

൬. യേ അപ്പമത്താ അഖിലാ, ഹിരിവീരിയേഹുപാഗതാ;

തേ തേ ഇമേ ഗുണവരേ, ആദിയന്തി യഥാ സുഖം.

൭. ഏവമേതേന യോഗേന, ഉദ്ധരന്തോ മഹാജനം;

ബോധേസി പഠമം സത്ഥാ, കോടിസതസഹസ്സിയോ.

൮. യമ്ഹി കാലേ മഹാവീരോ, ഓവദീ തിത്ഥിയേ ഗണേ;

കോടിസഹസ്സാഭിസമിംസു [കോടിസതസഹസ്സാനി (സ്യാ. കം.), കോടിസതസഹസ്സാനം (ക.)], ദുതിയേ ധമ്മദേസനേ.

൯. യദാ ദേവാ മനുസ്സാ ച, സമഗ്ഗാ ഏകമാനസാ;

നിരോധപഞ്ഹം പുച്ഛിംസു, സംസയഞ്ചാപി മാനസം.

൧൦. തദാപി ധമ്മദേസനേ, നിരോധപരിദീപനേ;

നവുതികോടിസഹസ്സാനം, തതിയാഭിസമയോ അഹു.

൧൧. സന്നിപാതാ തയോ ആസും, സുമനസ്സ മഹേസിനോ;

ഖീണാസവാനം വിമലാനം, സന്തചിത്താന താദിനം.

൧൨. വസ്സംവുത്ഥസ്സ ഭഗവതോ, അഭിഘുട്ഠേ പവാരണേ;

കോടിസതസഹസ്സേഹി, പവാരേസി തഥാഗതോ.

൧൩. തതോപരം സന്നിപാതേ, വിമലേ കഞ്ചനപബ്ബതേ;

നവുതികോടിസഹസ്സാനം, ദുതിയോ ആസി സമാഗമോ.

൧൪. യദാ സക്കോ ദേവരാജാ, ബുദ്ധദസ്സനുപാഗമി;

അസീതികോടിസഹസ്സാനം, തതിയോ ആസി സമാഗമോ.

൧൫. അഹം തേന സമയേന, നാഗരാജാ മഹിദ്ധികോ;

അതുലോ നാമ നാമേന, ഉസ്സന്നകുസലസഞ്ചയോ.

൧൬. തദാഹം നാഗഭാവനാ, നിക്ഖമിത്വാ സഞാതിഭി;

നാഗാനം ദിബ്ബതുരിയേഹി, സസങ്ഘം ജിനമുപട്ഠഹിം.

൧൭. കോടിസതസഹസ്സാനം, അന്നപാനേന തപ്പയിം;

പച്ചേകദുസ്സയുഗം ദത്വാ, സരണം തമുപാഗമിം.

൧൮. സോപി മം ബുദ്ധോ ബ്യാകാസി, സുമനോ ലോകനായകോ;

‘‘അപരിമേയ്യിതോ കപ്പേ, അയം ബുദ്ധോ ഭവിസ്സതി.

൧൯. ‘‘പധാനം പദഹിത്വാന…പേ… ഹേസ്സാമ സമ്മുഖാ ഇമം’’.

൨൦. തസ്സാപി വചനം സുത്വാ, ഭിയ്യോ ചിത്തം പസാദയിം;

ഉത്തരിം വതമധിട്ഠാസിം, ദസപാരമിപൂരിയാ.

൨൧. നഗരം മേഖലം നാമ [മേഖലം നാമ നഗരം (സീ. സ്യാ.)], സുദത്തോ നാമ ഖത്തിയോ;

സിരിമാ നാമ ജനികാ, സുമനസ്സ മഹേസിനോ.

൨൨. നവവസ്സസഹസ്സാനി, അഗാരം അജ്ഝ സോ വസി;

ചന്ദോ സുചന്ദോ വടംസോ ച, തയോ പാസാദമുത്തമാ.

൨൩. തേസട്ഠിസതസഹസ്സാനി, നാരിയോ സമലങ്കതാ;

വടംസികാ നാമ നാരീ, അനൂപമോ നാമ അത്രജോ.

൨൪. നിമിത്തേ ചതുരോ ദിസ്വാ, ഹത്ഥിയാനേന നിക്ഖമി;

അനൂനദസമാസാനി, പധാനം പദഹീ ജിനോ.

൨൫. ബ്രഹ്മുനാ യാചിതോ സന്തോ, സുമനോ ലോകനായകോ;

വത്തി ചക്കം മഹാവീരോ, മേഖലേ പുരമുത്തമേ.

൨൬. സരണോ ഭാവിതത്തോ ച, അഹേസും അഗ്ഗസാവകാ;

ഉദേനോ നാമുപട്ഠാകോ, സുമനസ്സ മഹേസിനോ.

൨൭. സോണാ ച ഉപസോണാ ച, അഹേസും അഗ്ഗസാവികാ;

സോപി ബുദ്ധോ അമിതയസോ, നാഗമൂലേ അബുജ്ഝഥ.

൨൮. വരുണോ ചേവ സരണോ ച, അഹേസും അഗ്ഗുപട്ഠകാ;

ചാലാ ച ഉപചാലാ ച, അഹേസും അഗ്ഗുപട്ഠികാ.

൨൯. ഉച്ചത്തനേന [ഉച്ചതരേന (ക.)] സോ ബുദ്ധോ, നവുതിഹത്ഥമുഗ്ഗതോ;

കഞ്ചനഗ്ഘിയസങ്കാസോ, ദസസഹസ്സീ വിരോചതി.

൩൦. നവുതിവസ്സസഹസ്സാനി, ആയു വിജ്ജതി താവദേ;

താവതാ തിട്ഠമാനോ സോ, താരേസി ജനതം ബഹും.

൩൧. താരണീയേ താരയിത്വാ, ബോധനീയേ ച ബോധയി;

പരിനിബ്ബായി സമ്ബുദ്ധോ, ഉളുരാജാവ അത്ഥമി.

൩൨. തേ ച ഖീണാസവാ ഭിക്ഖൂ, സോ ച ബുദ്ധോ അസാദിസോ;

അതുലപ്പഭം ദസ്സയിത്വാ, നിബ്ബുതാ യേ മഹായസാ.

൩൩. തഞ്ച ഞാണം അതുലിയം, താനി ച അതുലാനി രതനാനി;

സബ്ബം തമന്തരഹിതം, നനു രിത്താ സബ്ബസങ്ഖാരാ.

൩൪. സുമനോ യസധരോ ബുദ്ധോ, അങ്ഗാരാമമ്ഹി നിബ്ബുതോ;

തത്ഥേവ തസ്സ ജിനഥൂപോ, ചതുയോജനമുഗ്ഗതോതി.

സുമനസ്സ ഭഗവതോ വംസോ ചതുത്ഥോ.