൭. രേവതബുദ്ധവംസോ

൧. സുമനസ്സ അപരേന, രേവതോ നാമ നായകോ;

അനൂപമോ അസദിസോ, അതുലോ ഉത്തമോ ജിനോ.

൨. സോപി ധമ്മം പകാസേസി, ബ്രഹ്മുനാ അഭിയാചിതോ;

ഖന്ധധാതുവവത്ഥാനം, അപ്പവത്തം ഭവാഭവേ.

൩. തസ്സാഭിസമയാ തീണി, അഹേസും ധമ്മദേസനേ;

ഗണനായ ന വത്തബ്ബോ, പഠമാഭിസമയോ അഹു.

൪. യദാ അരിന്ദമം രാജം [രാജാനം (ക.)], വിനേസി രേവതോ മുനി;

തദാ കോടിസഹസ്സാനം, ദുതിയാഭിസമയോ അഹു.

൫. സത്താഹം പടിസല്ലാനാ, വുട്ഠഹിത്വാ നരാസഭോ;

കോടിസതം നരമരൂനം, വിനേസി ഉത്തമേ ഫലേ.

൬. സന്നിപാതാ തയോ ആസും, രേവതസ്സ മഹേസിനോ;

ഖീണാസവാനം വിമലാനം, സുവിമുത്താന താദിനം.

൭. അതിക്കന്താ ഗണനപഥം, പഠമം യേ സമാഗതാ;

കോടിസതസഹസ്സാനം, ദുതിയോ ആസി സമാഗമോ.

൮. യോപി [യോ സോ (സ്യാ. കം. ക.)] പഞ്ഞായ അസമോ, തസ്സ ചക്കാനുവത്തകോ;

സോ തദാ ബ്യാധിതോ ആസി, പത്തോ ജീവിതസംസയം.

൯. തസ്സ ഗിലാനപുച്ഛായ, യേ തദാ ഉപഗതാ മുനീ;

കോടിസഹസ്സാ അരഹന്തോ, തതിയോ ആസി സമാഗമോ.

൧൦. അഹം തേന സമയേന, അതിദേവോ നാമ ബ്രാഹ്മണോ;

ഉപഗന്ത്വാ രേവതം ബുദ്ധം, സരണം തസ്സ ഗഞ്ഛഹം.

൧൧. തസ്സ സീലം സമാധിഞ്ച, പഞ്ഞാഗുണമനുത്തമം;

ഥോമയിത്വാ യഥാഥാമം, ഉത്തരീയമദാസഹം.

൧൨. സോപി മം ബുദ്ധോ ബ്യാകാസി, രേവതോ ലോകനായകോ;

‘‘അപരിമേയ്യിതോ കപ്പേ, അയം ബുദ്ധോ ഭവിസ്സതി.

൧൩. ‘‘പധാനം പദഹിത്വാന…പേ… ഹേസ്സാമ സമ്മുഖാ ഇമം’’.

൧൪. തസ്സാപി വചനം സുത്വാ, ഭിയ്യോ ചിത്തം പസാദയിം;

ഉത്തരിം വതമധിട്ഠാസിം, ദസപാരമിപൂരിയാ.

൧൫. തദാപി തം ബുദ്ധധമ്മം, സരിത്വാ അനുബ്രൂഹയിം;

ആഹരിസ്സാമി തം ധമ്മം, യം മയ്ഹം അഭിപത്ഥിതം.

൧൬. നഗരം സുധഞ്ഞവതീ നാമ [സുധമ്മകം നാമ (സീ.), സുധഞ്ഞകം നാമ (സ്യാ.)], വിപുലോ നാമ ഖത്തിയോ;

വിപുലാ നാമ ജനികാ, രേവതസ്സ മഹേസിനോ.

൧൭. ഛ ച വസ്സസഹസ്സാനി [ഛബ്ബസ്സസഹസ്സാനി (സീ. സ്യാ.)], അഗാരം അജ്ഝ സോ വസി;

സുദസ്സനോ രതനഗ്ഘി, ആവേളോ ച വിഭൂസിതോ;

പുഞ്ഞകമ്മാഭിനിബ്ബത്താ, തയോ പാസാദമുത്തമാ.

൧൮. തേത്തിംസ ച സഹസ്സാനി, നാരിയോ സമലങ്കതാ;

സുദസ്സനാ നാമ നാരീ, വരുണോ നാമ അത്രജോ.

൧൯. നിമിത്തേ ചതുരോ ദിസ്വാ, രഥയാനേന നിക്ഖമി;

അനൂനസത്തമാസാനി, പധാനം പദഹീ ജിനോ.

൨൦. ബ്രഹ്മുനാ യാചിതോ സന്തോ, രേവതോ ലോകനായകോ;

വത്തി ചക്കം മഹാവീരോ, വരുണാരാമേ സിരീഘരേ.

൨൧. വരുണോ ബ്രഹ്മദേവോ ച, അഹേസും അഗ്ഗസാവകാ;

സമ്ഭവോ നാമുപട്ഠാകോ, രേവതസ്സ മഹേസിനോ.

൨൨. ഭദ്ദാ ചേവ സുഭദ്ദാ ച, അഹേസും അഗ്ഗസാവികാ;

സോപി ബുദ്ധോ അസമസമോ, നാഗമൂലേ അബുജ്ഝഥ.

൨൩. പദുമോ കുഞ്ജരോ ചേവ, അഹേസും അഗ്ഗുപട്ഠികാ;

സിരീമാ ചേവ യസവതീ, അഹേസും അഗ്ഗുപട്ഠികാ.

൨൪. ഉച്ചത്തനേന സോ ബുദ്ധോ, അസീതിഹത്ഥമുഗ്ഗതോ;

ഓഭാസേതി ദിസാ സബ്ബാ, ഇന്ദകേതുവ ഉഗ്ഗതോ.

൨൫. തസ്സ സരീരേ നിബ്ബത്താ, പഭാമാലാ അനുത്തരാ;

ദിവാ വാ യദി വാ രത്തിം, സമന്താ ഫരതി യോജനം.

൨൬. സട്ഠിവസ്സസഹസ്സാനി, ആയു വിജ്ജതി താവദേ;

താവതാ തിട്ഠമാനോ സോ, താരേസി ജനതം ബഹും.

൨൭. ദസ്സയിത്വാ ബുദ്ധബലം, അമതം ലോകേ പകാസയം;

നിബ്ബായി അനുപാദാനോ, യഥഗ്ഗുപാദാനസങ്ഖയാ.

൨൮. സോ ച കായോ രതനനിഭോ, സോ ച ധമ്മോ അസാദിസോ;

സബ്ബം തമന്തരഹിതം, നനു രിത്താ സബ്ബസങ്ഖാരാ.

൨൯. രേവതോ യസധരോ ബുദ്ധോ, നിബ്ബുതോ സോ മഹാപുരേ;

ധാതുവിത്ഥാരികം ആസി, തേസു തേസു പദേസതോതി.

രേവതസ്സ ഭഗവതോ വംസോ പഞ്ചമോ.