൫. മങ്ഗലബുദ്ധവംസോ

൧. കോണ്ഡഞ്ഞസ്സ അപരേന, മങ്ഗലോ നാമ നായകോ;

തമം ലോകേ നിഹന്ത്വാന, ധമ്മോക്കമഭിധാരയി.

൨. അതുലാസി പഭാ തസ്സ, ജിനേഹഞ്ഞേഹി ഉത്തരിം;

ചന്ദസൂരിയപഭം ഹന്ത്വാ, ദസസഹസ്സീ വിരോചതി.

൩. സോപി ബുദ്ധോ പകാസേസി, ചതുരോ സച്ചവരുത്തമേ;

തേ തേ സച്ചരസം പീത്വാ, വിനോദേന്തി മഹാതമം.

൪. പത്വാന ബോധിമതുലം, പഠമേ ധമ്മദേസനേ;

കോടിസതസഹസ്സാനം, ധമ്മാഭിസമയോ അഹു.

൫. സുരിന്ദദേവഭവനേ, ബുദ്ധോ ധമ്മമദേസയി;

തദാ കോടിസഹസ്സാനം [നവകോടിസഹസ്സാനം (സീ.)], ദുതിയോ സമയോ അഹു.

൬. യദാ സുനന്ദോ ചക്കവത്തീ, സമ്ബുദ്ധം ഉപസങ്കമി;

തദാ ആഹനി സമ്ബുദ്ധോ, ധമ്മഭേരിം വരുത്തമം.

൭. സുനന്ദസ്സാനുചരാ ജനതാ, തദാസും നവുതികോടിയോ;

സബ്ബേപി തേ നിരവസേസാ, അഹേസും ഏഹി ഭിക്ഖുകാ.

൮. സന്നിപാതാ തയോ ആസും, മങ്ഗലസ്സ മഹേസിനോ;

കോടിസതസഹസ്സാനം, പഠമോ ആസി സമാഗമോ.

൯. ദുതിയോ കോടിസതസഹസ്സാനം, തതിയോ നവുതികോടിനം;

ഖീണാസവാനം വിമലാനം, തദാ ആസി സമാഗമോ.

൧൦. അഹം തേന സമയേന, സുരുചീ നാമ ബ്രാഹ്മണോ;

അജ്ഝായകോ മന്തധരോ, തിണ്ണം വേദാന പാരഗൂ.

൧൧. തമഹം ഉപസങ്കമ്മ, സരണം ഗന്ത്വാന സത്ഥുനോ;

സമ്ബുദ്ധപ്പമുഖം സങ്ഘം, ഗന്ധമാലേന പൂജയിം;

പൂജേത്വാ ഗന്ധമാലേന, ഗവപാനേന തപ്പയിം.

൧൨. സോപി മം ബുദ്ധോ ബ്യാകാസി, മങ്ഗലോ ദ്വിപദുത്തമോ;

‘‘അപരിമേയ്യിതോ കപ്പേ, അയം ബുദ്ധോ ഭവിസ്സതി.

൧൩. ‘‘പധാനം പദഹിത്വാന…പേ… ഹേസ്സാമ സമ്മുഖാ ഇമം’’.

൧൪. തസ്സാപി വചനം സുത്വാ, ഭിയ്യോ ചിത്തം പസാദയിം;

ഉത്തരിം വതമധിട്ഠാസിം, ദസ പാരമിപൂരിയാ.

൧൫. തദാ പീതിമനുബ്രൂഹന്തോ, സമ്ബോധിവരപത്തിയാ;

ബുദ്ധേ ദത്വാന മം ഗേഹം, പബ്ബജിം തസ്സ സന്തികേ.

൧൬. സുത്തന്തം വിനയഞ്ചാപി, നവങ്ഗം സത്ഥുസാസനം;

സബ്ബം പരിയാപുണിത്വാ, സോഭയിം ജിനസാസനം.

൧൭. തത്ഥപ്പമത്തോ വിഹരന്തോ, ബ്രഹ്മം ഭാവേത്വ ഭാവനം;

അഭിഞ്ഞാപാരമിം ഗന്ത്വാ, ബ്രഹ്മലോകമഗച്ഛഹം.

൧൮. ഉത്തരം നാമ നഗരം, ഉത്തരോ നാമ ഖത്തിയോ;

ഉത്തരാ നാമ ജനികാ, മങ്ഗലസ്സ മഹേസിനോ.

൧൯. നവവസ്സസഹസ്സാനി, അഗാരം അജ്ഝ സോ വസി;

യസവാ സുചിമാ സിരീമാ, തയോ പാസാദമുത്തമാ.

൨൦. സമതിംസസഹസ്സാനി, നാരിയോ സമലങ്കതാ;

യസവതീ നാമ നാരീ, സീവലോ നാമ അത്രജോ.

൨൧. നിമിത്തേ ചതുരോ ദിസ്വാ, അസ്സയാനേന നിക്ഖമി;

അനൂനഅട്ഠമാസാനി, പധാനം പദഹീ ജിനോ.

൨൨. ബ്രഹ്മുനാ യാചിതോ സന്തോ, മങ്ഗലോ നാമ നായകോ;

വത്തി ചക്കം മഹാവീരോ, വനേ സിരീവരുത്തമേ.

൨൩. സുദേവോ ധമ്മസേനോ ച, അഹേസും അഗ്ഗസാവകാ;

പാലിതോ നാമുപട്ഠാകോ, മങ്ഗലസ്സ മഹേസിനോ.

൨൪. സീവലാ ച അസോകാ ച, അഹേസും അഗ്ഗസാവികാ;

ബോധി തസ്സ ഭഗവതോ, നാഗരുക്ഖോതി വുച്ചതി.

൨൫. നന്ദോ ചേവ വിസാഖോ ച, അഹേസും അഗ്ഗുപട്ഠകാ;

അനുലാ ചേവ സുതനാ ച, അഹേസും അഗ്ഗുപട്ഠികാ.

൨൬. അട്ഠാസീതി രതനാനി, അച്ചുഗ്ഗതോ മഹാമുനി;

തതോ നിദ്ധാവതീ രംസീ, അനേകസതസഹസ്സിയോ.

൨൭. നവുതിവസ്സസഹസ്സാനി, ആയു വിജ്ജതി താവദേ;

താവതാ തിട്ഠമാനോ സോ, താരേസി ജനതം ബഹും.

൨൮. യഥാപി സാഗരേ ഊമീ, ന സക്കാ താ ഗണേതുയേ;

തഥേവ സാവകാ തസ്സ, ന സക്കാ തേ ഗണേതുയേ.

൨൯. യാവ അട്ഠാസി സമ്ബുദ്ധോ, മങ്ഗലോ ലോകനായകോ;

ന തസ്സ സാസനേ അത്ഥി, സകിലേസമരണം [സംകിലേസമരണം (സീ.)] തദാ.

൩൦. ധമ്മോക്കം ധാരയിത്വാന, സന്താരേത്വാ മഹാജനം;

ജലിത്വാ ധൂമകേതൂവ, നിബ്ബുതോ സോ മഹായസോ.

൩൧. സങ്ഖാരാനം സഭാവത്ഥം, ദസ്സയിത്വാ സദേവകേ;

ജലിത്വാ അഗ്ഗിക്ഖന്ധോവ, സൂരിയോ അത്ഥങ്ഗതോ യഥാ.

൩൨. ഉയ്യാനേ വസ്സരേ നാമ, ബുദ്ധോ നിബ്ബായി മങ്ഗലോ;

തത്ഥേവസ്സ ജിനഥൂപോ, തിംസയോജനമുഗ്ഗതോതി.

മങ്ഗലസ്സ ഭഗവതോ വംസോ തതിയോ.