൪. കോണ്ഡഞ്ഞബുദ്ധവംസോ

൧. ദീപങ്കരസ്സ അപരേന, കോണ്ഡഞ്ഞോ നാമ നായകോ;

അനന്തതേജോ അമിതയസോ, അപ്പമേയ്യോ ദുരാസദോ.

൨. ധരണൂപമോ ഖമനേന, സീലേന സാഗരൂപമോ;

സമാധിനാ മേരൂപമോ, ഞാണേന ഗഗനൂപമോ.

൩. ഇന്ദ്രിയബലബോജ്ഝങ്ഗ-മഗ്ഗസച്ചപ്പകാസനം;

പകാസേസി സദാ ബുദ്ധോ, ഹിതായ സബ്ബപാണിനം.

൪. ധമ്മചക്കം പവത്തേന്തേ, കോണ്ഡഞ്ഞേ ലോകനായകേ;

കോടിസതസഹസ്സാനം, പഠമാഭിസമയോ അഹു.

൫. തതോ പരമ്പി ദേസേന്തേ, നരമരൂനം സമാഗമേ;

നവുതികോടിസഹസ്സാനം, ദുതിയാഭിസമയോ അഹു.

൬. തിത്ഥിയേ അഭിമദ്ദന്തോ, യദാ ധമ്മമദേസയി;

അസീതികോടിസഹസ്സാനം, തതിയാഭിസമയോ അഹു.

൭. സന്നിപാതാ തയോ ആസും, കോണ്ഡഞ്ഞസ്സ മഹേസിനോ;

ഖീണാസവാനം വിമലാനം, സന്തചിത്താന താദിനം.

൮. കോടിസതസഹസ്സാനം, പഠമോ ആസി സമാഗമോ;

ദുതിയോ കോടിസഹസ്സാനം, തതിയോ നവുതികോടിനം.

൯. അഹം തേന സമയേന, വിജിതാവീ നാമ ഖത്തിയോ;

സമുദ്ദം അന്തമന്തേന, ഇസ്സരിയം വത്തയാമഹം.

൧൦. കോടിസതസഹസ്സാനം, വിമലാനം മഹേസിനം;

സഹ ലോകഗ്ഗനാഥേന, പരമന്നേന തപ്പയിം.

൧൧. സോപി മം ബുദ്ധോ ബ്യാകാസി, കോണ്ഡഞ്ഞോ ലോകനായകോ;

‘‘അപരിമേയ്യിതോ കപ്പേ, ബുദ്ധോ ലോകേ ഭവിസ്സതി.

൧൨. ‘‘പധാനം പദഹിത്വാന, കത്വാ ദുക്കരകാരികം;

അസ്സത്ഥമൂലേ സമ്ബുദ്ധോ, ബുജ്ഝിസ്സതി മഹായസോ.

൧൩. ‘‘ഇമസ്സ ജനികാ മാതാ, മായാ നാമ ഭവിസ്സതി;

പിതാ സുദ്ധോദനോ നാമ, അയം ഹേസ്സതി ഗോതമോ.

൧൪. ‘‘കോലിതോ ഉപതിസ്സോ ച, അഗ്ഗാ ഹേസ്സന്തി സാവകാ;

ആനന്ദോ നാമുപട്ഠാകോ, ഉപട്ഠിസ്സതിമം ജിനം.

൧൫. ‘‘ഖേമാ ഉപ്പലവണ്ണാ ച, അഗ്ഗാ ഹേസ്സന്തി സാവികാ;

ബോധി തസ്സ ഭഗവതോ, അസ്സത്ഥോതി പവുച്ചതി.

൧൬. ‘‘ചിത്തോ ച ഹത്ഥാളവകോ, അഗ്ഗാ ഹേസ്സന്തുപട്ഠകാ;

നന്ദമാതാ ച ഉത്തരാ, അഗ്ഗാ ഹേസ്സന്തുപട്ഠികാ;

ആയു വസ്സസതം തസ്സ, ഗോതമസ്സ യസസ്സിനോ’’.

൧൭. ഇദം സുത്വാന വചനം, അസമസ്സ മഹേസിനോ;

ആമോദിതാ നരമരൂ, ബുദ്ധബീജം കിര അയം.

൧൮. ഉക്കുട്ഠിസദ്ദാ വത്തന്തി, അപ്ഫോടേന്തി ഹസന്തി ച;

കതഞ്ജലീ നമസ്സന്തി, ദസസഹസ്സിദേവതാ.

൧൯. ‘‘യദിമസ്സ ലോകനാഥസ്സ, വിരജ്ഝിസ്സാമ സാസനം;

അനാഗതമ്ഹി അദ്ധാനേ, ഹേസ്സാമ സമ്മുഖാ ഇമം.

൨൦. ‘‘യഥാ മനുസ്സാ നദിം തരന്താ, പടിതിത്ഥം വിരജ്ഝിയ;

ഹേട്ഠാതിത്ഥേ ഗഹേത്വാന, ഉത്തരന്തി മഹാനദിം.

൨൧. ‘‘ഏവമേവ മയം സബ്ബേ, യദി മുഞ്ചാമിമം ജിനം;

അനാഗതമ്ഹി അദ്ധാനേ, ഹേസ്സാമ സമ്മുഖാ ഇമം’’.

൨൨. തസ്സാഹം വചനം സുത്വാ, ഭിയ്യോ ചിത്തം പസാദയിം;

തമേവ അത്ഥം സാധേന്തോ, മഹാരജ്ജം ജിനേ അദം;

മഹാരജ്ജം ദദിത്വാന [ചജിത്വാ (സീ.)], പബ്ബജിം തസ്സ സന്തികേ.

൨൩. സുത്തന്തം വിനയഞ്ചാപി, നവങ്ഗം സത്ഥുസാസനം;

സബ്ബം പരിയാപുണിത്വാന, സോഭയിം ജിനസാസനം.

൨൪. തത്ഥപ്പമത്തോ വിഹരന്തോ, നിസജ്ജട്ഠാനചങ്കമേ;

അഭിഞ്ഞാപാരമിം ഗന്ത്വാ, ബ്രഹ്മലോകമഗഞ്ഛഹം.

൨൫. നഗരം രമ്മവതീ നാമ, സുനന്ദോ നാമ ഖത്തിയോ;

സുജാതാ നാമ ജനികാ, കോണ്ഡഞ്ഞസ്സ മഹേസിനോ.

൨൬. ദസവസ്സസഹസ്സാനി, അഗാരം അജ്ഝ സോ വസി [അഗാരമജ്ഝേ ച സോ വസി (സ്യാ.)];

സുചി സുരുചി സുഭോ ച, തയോ പാസാദമുത്തമാ.

൨൭. തീണിസതസഹസ്സാനി, നാരിയോ സമലങ്കതാ;

രുചിദേവീ നാമ നാരീ, വിജിതസേനോ അത്രജോ.

൨൮. നിമിത്തേ ചതുരോ ദിസ്വാ, രഥയാനേന നിക്ഖമി;

അനൂനദസമാസാനി, പധാനം പദഹീ ജിനോ.

൨൯. ബ്രഹ്മുനാ യാചിതോ സന്തോ, കോണ്ഡഞ്ഞോ ദ്വിപദുത്തമോ;

വത്തി ചക്കം മഹാവീരോ, ദേവാനം നഗരുത്തമേ.

൩൦. ഭദ്ദോ ചേവ സുഭദ്ദോ ച, അഹേസും അഗ്ഗസാവകാ;

അനുരുദ്ധോ നാമുപട്ഠാകോ, കോണ്ഡഞ്ഞസ്സ മഹേസിനോ.

൩൧. തിസ്സാ ച ഉപതിസ്സാ ച, അഹേസും അഗ്ഗസാവികാ;

സാലകല്യാണികോ ബോധി, കോണ്ഡഞ്ഞസ്സ മഹേസിനോ.

൩൨. സോണോ ച ഉപസോണോ ച, അഹേസും അഗ്ഗുപട്ഠകാ;

നന്ദാ ചേവ സിരീമാ ച, അഹേസും അഗ്ഗുപട്ഠികാ.

൩൩. സോ അട്ഠാസീതി ഹത്ഥാനി, അച്ചുഗ്ഗതോ മഹാമുനി;

സോഭതേ ഉളുരാജാവ സൂരിയോ മജ്ഝന്ഹികേ യഥാ.

൩൪. വസ്സസതസഹസ്സാനി, ആയു വിജ്ജതി താവദേ;

താവതാ തിട്ഠമാനോ സോ, താരേസി ജനതം ബഹും.

൩൫. ഖീണാസവേഹി വിമലേഹി, വിചിത്താ ആസി മേദനീ;

യഥാ ഗഗനമുളൂഹി, ഏവം സോ ഉപസോഭഥ.

൩൬. തേപി നാഗാ അപ്പമേയ്യാ, അസങ്ഖോഭാ ദുരാസദാ;

വിജ്ജുപാതംവ ദസ്സേത്വാ, നിബ്ബുതാ തേ മഹായസാ.

൩൭. സാ ച അതുലിയാ ജിനസ്സ ഇദ്ധി, ഞാണപരിഭാവിതോ ച സമാധി;

സബ്ബം തമന്തരഹിതം, നനു രിത്താ സബ്ബസങ്ഖാരാ.

൩൮. കോണ്ഡഞ്ഞോ പവരോ ബുദ്ധോ, ചന്ദാരാമമ്ഹി നിബ്ബുതോ;

തത്ഥേവ ചേതിയോ ചിത്തോ, സത്ത യോജനമുസ്സിതോതി.

കോണ്ഡഞ്ഞസ്സ ഭഗവതോ വംസോ ദുതിയോ.