൩. ദീപങ്കരബുദ്ധവംസോ
൧. തദാ തേ ഭോജയിത്വാന, സസങ്ഘം ലോകനായകം;
ഉപഗച്ഛും സരണം തസ്സ, ദീപങ്കരസ്സ സത്ഥുനോ.
൨. സരണാഗമനേ കഞ്ചി, നിവേസേസി തഥാഗതോ;
കഞ്ചി പഞ്ചസു സീലേസു, സീലേ ദസവിധേ പരം.
൩. കസ്സചി ദേതി സാമഞ്ഞം, ചതുരോ ഫലമുത്തമേ;
കസ്സചി അസമേ ധമ്മേ, ദേതി സോ പടിസമ്ഭിദാ.
൪. കസ്സചി വരസമാപത്തിയോ, അട്ഠ ദേതി നരാസഭോ;
തിസ്സോ കസ്സചി വിജ്ജായോ, ഛളഭിഞ്ഞാ പവേച്ഛതി.
൫. തേന യോഗേന ജനകായം, ഓവദതി മഹാമുനി;
തേന വിത്ഥാരികം ആസി, ലോകനാഥസ്സ സാസനം.
൬. മഹാഹനുസഭക്ഖന്ധോ, ദീപങ്കരസ്സ നാമകോ;
ബഹൂ ജനേ താരയതി, പരിമോചേതി ദുഗ്ഗതിം.
൭. ബോധനേയ്യം ജനം ദിസ്വാ, സതസഹസ്സേപി യോജനേ;
ഖണേന ഉപഗന്ത്വാന, ബോധേതി തം മഹാമുനി.
൮. പഠമാഭിസമയേ ബുദ്ധോ, കോടിസതമബോധയി;
ദുതിയാഭിസമയേ നാഥോ, നവുതികോടിമബോധയി.
൯. യദാ ച ദേവഭവനമ്ഹി, ബുദ്ധോ ധമ്മമദേസയി;
നവുതികോടിസഹസ്സാനം, തതിയാഭിസമയോ അഹു.
൧൦. സന്നിപാതാ തയോ ആസും, ദീപങ്കരസ്സ സത്ഥുനോ;
കോടിസതസഹസ്സാനം, പഠമോ ആസി സമാഗമോ.
൧൧. പുന നാരദകൂടമ്ഹി, പവിവേകഗതേ ജിനേ;
ഖീണാസവാ വീതമലാ, സമിംസു സതകോടിയോ.
൧൨. യമ്ഹി കാലേ മഹാവീരോ, സുദസ്സനസിലുച്ചയേ;
നവകോടിസഹസ്സേഹി, പവാരേസി മഹാമുനി.
൧൩. ദസവീസസഹസ്സാനം, ധമ്മാഭിസമയോ അഹു;
ഏകദ്വിന്നം അഭിസമയാ, ഗണനാതോ അസങ്ഖിയാ.
൧൪. വിത്ഥാരികം ബാഹുജഞ്ഞം, ഇദ്ധം ഫീതം അഹൂ തദാ;
ദീപങ്കരസ്സ ഭഗവതോ, സാസനം സുവിസോധിതം.
൧൫. ചത്താരി സതസഹസ്സാനി, ഛളഭിഞ്ഞാ മഹിദ്ധികാ;
ദീപങ്കരം ലോകവിദും, പരിവാരേന്തി സബ്ബദാ.
൧൬. യേ കേചി തേന സമയേന, ജഹന്തി മാനുസം ഭവം;
അപത്തമാനസാ സേഖാ, ഗരഹിതാ ഭവന്തി തേ.
൧൭. സുപുപ്ഫിതം പാവചനം, അരഹന്തേഹി താദിഹി;
ഖീണാസവേഹി വിമലേഹി, ഉപസോഭതി സബ്ബദാ.
൧൮. നഗരം രമ്മവതീ നാമ, സുദേവോ നാമ ഖത്തിയോ;
സുമേധാ നാമ ജനികാ, ദീപങ്കരസ്സ സത്ഥുനോ.
൧൯. ദസവസ്സസഹസ്സാനി, അഗാരം അജ്ഝ സോ വസി [അജ്ഝാവസീ ജിനോ (സ്യാ. ക.)];
ഹംസാ കോഞ്ചാ മയൂരാ ച, തയോ പാസാദമുത്തമാ.
൨൦. തീണിസതസഹസ്സാനി, നാരിയോ സമലങ്കതാ;
പദുമാ നാമ സാ നാരീ, ഉസഭക്ഖന്ധോ അത്രജോ.
൨൧. നിമിത്തേ ചതുരോ ദിസ്വാ, ഹത്ഥിയാനേന നിക്ഖമി;
അനൂനദസമാസാനി, പധാനേ പദഹീ ജിനോ.
൨൨. പധാനചാരം ചരിത്വാന, അബുജ്ഝി മാനസം മുനി;
ബ്രഹ്മുനാ യാചിതോ സന്തോ, ദീപങ്കരോ മഹാമുനി.
൨൩. വത്തി ചക്കം മഹാവീരോ, നന്ദാരാമേ സിരീഘരേ [സിരീധരേ (സീ.)];
നിസിന്നോ സിരീസമൂലമ്ഹി, അകാ തിത്ഥിയമദ്ദനം.
൨൪. സുമങ്ഗലോ ച തിസ്സോ ച, അഹേസും അഗ്ഗസാവകാ;
സാഗതോ [സോഭിതോ (ക.)] നാമുപട്ഠാകോ, ദീപങ്കരസ്സ സത്ഥുനോ.
൨൫. നന്ദാ ചേവ സുനന്ദാ ച, അഹേസും അഗ്ഗസാവികാ;
ബോധി തസ്സ ഭഗവതോ, പിപ്ഫലീതി പവുച്ചതി.
൨൬. തപുസ്സഭല്ലികാ [തപസ്സുഭല്ലികാ (സീ.)] നാമ, അഹേസും അഗ്ഗുപട്ഠകാ;
സിരിമാ കോണാ ഉപട്ഠികാ, ദീപങ്കരസ്സ സത്ഥുനോ.
൨൭. അസീതിഹത്ഥമുബ്ബേധോ, ദീപങ്കരോ മഹാമുനി;
സോഭതി ദീപരുക്ഖോവ, സാലരാജാവ ഫുല്ലിതോ.
൨൮. സതസഹസ്സവസ്സാനി, ആയു തസ്സ മഹേസിനോ;
താവതാ തിട്ഠമാനോ സോ, താരേസി ജനതം ബഹും.
൨൯. ജോതയിത്വാന സദ്ധമ്മം, സന്താരേത്വാ മഹാജനം;
ജലിത്വാ അഗ്ഗിക്ഖന്ധോവ, നിബ്ബുതോ സോ സസാവകോ.
൩൦. സാ ച ഇദ്ധി സോ ച യസോ, താനി ച പാദേസു ചക്കരതനാനി;
സബ്ബം തമന്തരഹിതം [സമന്തരഹിതം (സീ. സ്യാ. ക.)], നനു രിത്താ സബ്ബസങ്ഖാരാ [സബ്ബസങ്ഖാരാതി (സബ്ബത്ഥ)].
൩൧. ദീപങ്കരോ ജിനോ സത്ഥാ, നന്ദാരാമമ്ഹി നിബ്ബുതോ;
തത്ഥേവസ്സ ജിനഥൂപോ, ഛത്തിംസുബ്ബേധയോജനോതി.
ദീപങ്കരസ്സ ഭഗവതോ വംസോ പഠമോ.