൨൯. ധാതുഭാജനീയകഥാ

൧. മഹാഗോതമോ ജിനവരോ, കുസിനാരമ്ഹി നിബ്ബുതോ;

ധാതുവിത്ഥാരികം ആസി, തേസു തേസു പദേസതോ.

൨. ഏകോ അജാതസത്തുസ്സ, ഏകോ വേസാലിയാ പുരേ;

ഏകോ കപിലവത്ഥുസ്മിം, ഏകോ ച അല്ലകപ്പകേ.

൩. ഏകോ ച രാമഗാമമ്ഹി, ഏകോ ച വേഠദീപകേ;

ഏകോ പാവേയ്യകേ മല്ലേ, ഏകോ ച കോസിനാരകേ.

൪. കുമ്ഭസ്സ ഥൂപം കാരേസി, ബ്രാഹ്മണോ ദോണസവ്ഹയോ;

അങ്ഗാരഥൂപം കാരേസും, മോരിയാ തുട്ഠമാനസാ.

൫. അട്ഠ സാരീരികാ ഥൂപാ, നവമോ കുമ്ഭചേതിയോ;

അങ്ഗാരഥൂപോ ദസമോ, തദായേവ പതിട്ഠിതോ.

൬. ഉണ്ഹീസം ചതസ്സോ ദാഠാ, അക്ഖകാ ദ്വേ ച ധാതുയോ;

അസമ്ഭിന്നാ ഇമാ സത്ത, സേസാ ഭിന്നാവ ധാതുയോ.

൭. മഹന്താ മുഗ്ഗമത്താ ച [മുഗ്ഗമാസാവ (ക.)], മജ്ഝിമാ ഭിന്നതണ്ഡുലാ;

ഖുദ്ദകാ സാസപമത്താ ച, നാനാവണ്ണാ ച ധാതുയോ.

൮. മഹന്താ സുവണ്ണവണ്ണാ ച, മുത്തവണ്ണാ ച മജ്ഝിമാ;

ഖുദ്ദകാ മകുലവണ്ണാ ച, സോളസദോണമത്തികാ.

൯. മഹന്താ പഞ്ച നാളിയോ, നാളിയോ പഞ്ച മജ്ഝിമാ;

ഖുദ്ദകാ ഛ നാളീ ചേവ, ഏതാ സബ്ബാപി ധാതുയോ.

൧൦. ഉണ്ഹീസം സീഹളേ ദീപേ, ബ്രഹ്മലോകേ ച വാമകം;

സീഹളേ ദക്ഖിണക്ഖഞ്ച, സബ്ബാപേതാ പതിട്ഠിതാ.

൧൧. ഏകാ ദാഠാ തിദസപുരേ, ഏകാ നാഗപുരേ അഹു;

ഏകാ ഗന്ധാരവിസയേ, ഏകാ കലിങ്ഗരാജിനോ.

൧൨. ചത്താലീസസമാ ദന്താ, കേസാ ലോമാ ച സബ്ബസോ;

ദേവാ ഹരിംസു ഏകേകം, ചക്കവാളപരമ്പരാ.

൧൩. വജിരായം ഭഗവതോ, പത്തോ ദണ്ഡഞ്ച ചീവരം;

നിവാസനം കുലഘരേ, പച്ചത്ഥരണം കപിലവ്ഹയേ [സിലവ്ഹയേ (സ്യാ.)].

൧൪. പാടലിപുത്തപുരമ്ഹി, കരണം കായബന്ധനം;

ചമ്പായുദകസാടിയം, ഉണ്ണലോമഞ്ച കോസലേ.

൧൫. കാസാവം ബ്രഹ്മലോകേ ച, വേഠനം തിദസേ പുരേ;

നിസീദനം അവന്തീസു, രട്ഠേ [ദേവരട്ഠേ (സ്യാ.)] അത്ഥരണം തദാ.

൧൬. അരണീ ച മിഥിലായം, വിദേഹേ പരിസാവനം;

വാസി സൂചിഘരഞ്ചാപി, ഇന്ദപത്ഥപുരേ തദാ.

൧൭. പരിക്ഖാരാ അവസേസാ, ജനപദേ അപരന്തകേ;

പരിഭുത്താനി മുനിനാ, അകംസു മനുജാ തദാ.

൧൮. ധാതുവിത്ഥാരികം ആസി, ഗോതമസ്സ മഹേസിനോ;

പാണീനം അനുകമ്പായ, അഹു പോരാണികം തദാതി.

ധാതുഭാജനീയകഥാ നിട്ഠിതാ.