൨൮. ബുദ്ധപകിണ്ണകകണ്ഡം

൧. അപരിമേയ്യിതോ കപ്പേ, ചതുരോ ആസും വിനായകാ;

തണ്ഹങ്കരോ മേധങ്കരോ, അഥോപി സരണങ്കരോ;

ദീപങ്കരോ ച സമ്ബുദ്ധോ, ഏകകപ്പമ്ഹി തേ ജിനാ.

൨. ദീപങ്കരസ്സ അപരേന, കോണ്ഡഞ്ഞോ നാമ നായകോ;

ഏകോവ ഏകകപ്പമ്ഹി, താരേസി ജനതം ബഹും.

൩. ദീപങ്കരസ്സ ഭഗവതോ, കോണ്ഡഞ്ഞസ്സ ച സത്ഥുനോ;

ഏതേസം അന്തരാ കപ്പാ, ഗണനാതോ അസങ്ഖിയാ.

൪. കോണ്ഡഞ്ഞസ്സ അപരേന, മങ്ഗലോ നാമ നായകോ;

തേസമ്പി അന്തരാ കപ്പാ, ഗണനാതോ അസങ്ഖിയാ.

൫. മങ്ഗലോ ച സുമനോ ച, രേവതോ സോഭിതോ മുനി;

തേപി ബുദ്ധാ ഏകകപ്പേ, ചക്ഖുമന്തോ പഭങ്കരാ.

൬. സോഭിതസ്സ അപരേന, അനോമദസ്സീ മഹായസോ;

തേസമ്പി അന്തരാ കപ്പാ, ഗണനാതോ അസങ്ഖിയാ.

൭. അനോമദസ്സീ പദുമോ, നാരദോ ചാപി നായകോ;

തേപി ബുദ്ധാ ഏകകപ്പേ, തമന്തകാരകാ മുനീ.

൮. നാരദസ്സ അപരേന, പദുമുത്തരോ നാമ നായകോ;

ഏകകപ്പമ്ഹി ഉപ്പന്നോ, താരേസി ജനതം ബഹും.

൯. നാരദസ്സ ഭഗവതോ, പദുമുത്തരസ്സ സത്ഥുനോ;

തേസമ്പി അന്തരാ കപ്പാ, ഗണനാതോ അസങ്ഖിയാ.

൧൦. കപ്പസതസഹസ്സമ്ഹി, ഏകോ ആസി മഹാമുനി;

പദുമുത്തരോ ലോകവിദൂ, ആഹുതീനം പടിഗ്ഗഹോ.

൧൧. തിംസകപ്പസഹസ്സമ്ഹി, ദുവേ ആസും വിനായകാ [ആസിംസു നായകാ (സ്യാ. ക.)];

സുമേധോ ച സുജാതോ ച, ഓരതോ പദുമുത്തരാ.

൧൨. അട്ഠാരസേ കപ്പസതേ, തയോ ആസും വിനായകാ [ആസിംസു നായകാ (സ്യാ. ക.)];

പിയദസ്സീ അത്ഥദസ്സീ, ധമ്മദസ്സീ ച നായകാ.

൧൩. ഓരതോ ച സുജാതസ്സ, സമ്ബുദ്ധാ ദ്വിപദുത്തമാ;

ഏകകപ്പമ്ഹി തേ ബുദ്ധാ, ലോകേ അപ്പടിപുഗ്ഗലാ.

൧൪. ചതുന്നവുതിതോ കപ്പേ, ഏകോ ആസി മഹാമുനി;

സിദ്ധത്ഥോ സോ ലോകവിദൂ, സല്ലകത്തോ അനുത്തരോ.

൧൫. ദ്വേനവുതേ ഇതോ കപ്പേ, ദുവേ ആസും വിനായകാ;

തിസ്സോ ഫുസ്സോ ച സമ്ബുദ്ധാ, അസമാ അപ്പടിപുഗ്ഗലാ.

൧൬. ഏകനവുതിതോ കപ്പേ, വിപസ്സീ നാമ നായകോ;

സോപി ബുദ്ധോ കാരുണികോ, സത്തേ മോചേസി ബന്ധനാ.

൧൭. ഏകതിംസേ ഇതോ കപ്പേ, ദുവേ ആസും വിനായകാ;

സിഖീ ച വേസ്സഭൂ ചേവ, അസമാ അപ്പടിപുഗ്ഗലാ.

൧൮. ഇമമ്ഹി ഭദ്ദകേ കപ്പേ, തയോ ആസും വിനായകാ;

കകുസന്ധോ കോണാഗമനോ, കസ്സപോ ചാപി നായകോ.

൧൯. അഹമേതരഹി സമ്ബുദ്ധോ, മേത്തേയ്യോ ചാപി ഹേസ്സതി;

ഏതേപിമേ പഞ്ച ബുദ്ധാ, ധീരാ ലോകാനുകമ്പകാ.

൨൦. ഏതേസം ധമ്മരാജൂനം, അഞ്ഞേസംനേകകോടിനം;

ആചിക്ഖിത്വാന തം മഗ്ഗം, നിബ്ബുതാ തേ സസാവകാതി.

ബുദ്ധപകിണ്ണകകണ്ഡം നിട്ഠിതം.