൨൪. കകുസന്ധബുദ്ധവംസോ

൧. വേസ്സഭുസ്സ അപരേന, സമ്ബുദ്ധോ ദ്വിപദുത്തമോ;

കകുസന്ധോ നാമ നാമേന, അപ്പമേയ്യോ ദുരാസദോ.

൨. ഉഗ്ഘാടേത്വാ സബ്ബഭവം, ചരിയായ പാരമിം ഗതോ;

സീഹോവ പഞ്ജരം ഭേത്വാ, പത്തോ സമ്ബോധിമുത്തമം.

൩. ധമ്മചക്കം പവത്തേന്തേ, കകുസന്ധേ ലോകനായകേ;

ചത്താരീസകോടിസഹസ്സാനം, ധമ്മാഭിസമയോ അഹു.

൪. അന്തലിക്ഖമ്ഹി ആകാസേ, യമകം കത്വാ വികുബ്ബനം;

തിംസകോടിസഹസ്സാനം, ബോധേസി ദേവമാനുസേ.

൫. നരദേവസ്സ യക്ഖസ്സ, ചതുസച്ചപ്പകാസനേ;

ധമ്മാഭിസമയോ തസ്സ, ഗണനാതോ അസങ്ഖിയോ.

൬. കകുസന്ധസ്സ ഭഗവതോ, ഏകോ ആസി സമാഗമോ;

ഖീണാസവാനം വിമലാനം, സന്തചിത്താന താദിനം.

൭. ചത്താലീസസഹസ്സാനം, തദാ ആസി സമാഗമോ;

ദന്തഭൂമിമനുപ്പത്താനം, ആസവാരിഗണക്ഖയാ.

൮. അഹം തേന സമയേന, ഖേമോ നാമാസി ഖത്തിയോ;

തഥാഗതേ ജിനപുത്തേ, ദാനം ദത്വാ അനപ്പകം.

൯. പത്തഞ്ച ചീവരം ദത്വാ, അഞ്ജനം മധുലട്ഠികം;

ഇമേതം പത്ഥിതം സബ്ബം, പടിയാദേമി വരം വരം.

൧൦. സോപി മം ബുദ്ധോ ബ്യാകാസി, കകുസന്ധോ വിനായകോ;

‘‘ഇമമ്ഹി ഭദ്ദകേ കപ്പേ, അയം ബുദ്ധോ ഭവിസ്സതി.

൧൧. ‘‘അഹു കപിലവ്ഹയാ രമ്മാ…പേ… ഹേസ്സാമ സമ്മുഖാ ഇമം’’.

൧൨. തസ്സാപി വചനം സുത്വാ, ഭിയ്യോ ചിത്തം പസാദയിം;

ഉത്തരിം വതമധിട്ഠാസിം, ദസപാരമിപൂരിയാ.

൧൩. നഗരം ഖേമാവതീ നാമ, ഖേമോ നാമാസഹം തദാ;

സബ്ബഞ്ഞുതം ഗവേസന്തോ, പബ്ബജിം തസ്സ സന്തികേ.

൧൪. ബ്രാഹ്മണോ അഗ്ഗിദത്തോ ച, ആസി ബുദ്ധസ്സ സോ പിതാ;

വിസാഖാ നാമ ജനികാ, കകുസന്ധസ്സ സത്ഥുനോ.

൧൫. വസതേ തത്ഥ ഖേമേ പുരേ, സമ്ബുദ്ധസ്സ മഹാകുലം;

നരാനം പവരം സേട്ഠം, ജാതിമന്തം മഹായസം.

൧൬. ചതുവസ്സസഹസ്സാനി, അഗാരം അജ്ഝ സോ വസി;

കാമ -കാമവണ്ണ-കാമസുദ്ധിനാമാ [സുചി സുരുചി രതിവദ്ധനനാമകാ (സീ.)], തയോ പാസാദമുത്തമാ.

൧൭. സമതിംസസഹസ്സാനി, നാരിയോ സമലങ്കതാ;

രോചിനീ നാമ സാ നാരീ, ഉത്തരോ നാമ അത്രജോ.

൧൮. നിമിത്തേ ചതുരോ ദിസ്വാ, രഥയാനേന നിക്ഖമി;

അനൂനഅട്ഠമാസാനി, പധാനം പദഹീ ജിനോ.

൧൯. ബ്രഹ്മുനാ യാചിതോ സന്തോ, കകുസന്ധോ വിനായകോ;

വത്തി ചക്കം മഹാവീരോ, മിഗദായേ നരുത്തമോ.

൨൦. വിധുരോ ച സഞ്ജീവോ ച, അഹേസും അഗ്ഗസാവകാ;

ബുദ്ധിജോ നാമുപട്ഠാകോ, കകുസന്ധസ്സ സത്ഥുനോ.

൨൧. സാമാ ച ചമ്പാനാമാ ച, അഹേസും അഗ്ഗസാവികാ;

ബോധി തസ്സ ഭഗവതോ, സിരീസോതി പവുച്ചതി.

൨൨. അച്ചുതോ ച സുമനോ ച, അഹേസും അഗ്ഗുപട്ഠകാ;

നന്ദാ ചേവ സുനന്ദാ ച, അഹേസും അഗ്ഗുപട്ഠികാ.

൨൩. ചത്താലീസരതനാനി, അച്ചുഗ്ഗതോ മഹാമുനി;

കനകപ്പഭാ നിച്ഛരതി, സമന്താ ദസയോജനം.

൨൪. ചത്താലീസവസ്സസഹസ്സാനി, ആയു തസ്സ മഹേസിനോ;

താവതാ തിട്ഠമാനോ സോ, താരേസി ജനതം ബഹും.

൨൫. ധമ്മാപണം പസാരേത്വാ, നരനാരീനം സദേവകേ;

നദിത്വാ സീഹനാദംവ, നിബ്ബുതോ സോ സസാവകോ.

൨൬. അട്ഠങ്ഗവചനസമ്പന്നോ, അച്ഛിദ്ദാനി നിരന്തരം;

സബ്ബം തമന്തരഹിതം, നനു രിത്താ സബ്ബസങ്ഖാരാ.

൨൭. കകുസന്ധോ ജിനവരോ, ഖേമാരാമമ്ഹി നിബ്ബുതോ;

തത്ഥേവസ്സ ഥൂപവരോ, ഗാവുതം നഭമുഗ്ഗതോതി.

കകുസന്ധസ്സ ഭഗവതോ വംസോ ദ്വാവീസതിമോ.