൨൫. കോണാഗമനബുദ്ധവംസോ

൧. കകുസന്ധസ്സ അപരേന, സമ്ബുദ്ധോ ദ്വിപദുത്തമോ;

കോണാഗമനോ നാമ ജിനോ, ലോകജേട്ഠോ നരാസഭോ.

൨. ദസധമ്മേ പൂരയിത്വാന, കന്താരം സമതിക്കമി;

പവാഹിയ മലം സബ്ബം, പത്തോ സമ്ബോധിമുത്തമം.

൩. ധമ്മചക്കം പവത്തേന്തേ, കോണാഗമനനായകേ;

തിംസകോടിസഹസ്സാനം, പഠമാഭിസമയോ അഹു.

൪. പാടിഹീരം കരോന്തേ ച, പരവാദപ്പമദ്ദനേ;

വീസതികോടിസഹസ്സാനം, ദുതിയാഭിസമയോ അഹു.

൫. തതോ വികുബ്ബനം കത്വാ, ജിനോ ദേവപുരം ഗതോ;

വസതേ തത്ഥ സമ്ബുദ്ധോ, സിലായ പണ്ഡുകമ്ബലേ.

൬. പകരണേ സത്ത ദേസേന്തോ, വസ്സം വസതി സോ മുനി;

ദസകോടിസഹസ്സാനം, തതിയാഭിസമയോ അഹു.

൭. തസ്സാപി ദേവദേവസ്സ, ഏകോ ആസി സമാഗമോ;

ഖീണാസവാനം വിമലാനം, സന്തചിത്താന താദിനം.

൮. തിംസഭിക്ഖുസഹസ്സാനം, തദാ ആസി സമാഗമോ;

ഓഘാനമതിക്കന്താനം, ഭിജ്ജിതാനഞ്ച മച്ചുയാ.

൯. അഹം തേന സമയേന, പബ്ബതോ നാമ ഖത്തിയോ;

മിത്താമച്ചേഹി സമ്പന്നോ, അനന്തബലവാഹനോ.

൧൦. സമ്ബുദ്ധദസ്സനം ഗന്ത്വാ, സുത്വാ ധമ്മമനുത്തരം;

നിമന്തേത്വാ സജിനസങ്ഘം, ദാനം ദത്വാ യദിച്ഛകം.

൧൧. പട്ടുണ്ണം ചീനപട്ടഞ്ച, കോസേയ്യം കമ്ബലമ്പി ച;

സോവണ്ണപാദുകഞ്ചേവ, അദാസിം സത്ഥുസാവകേ.

൧൨. സോപി മം ബുദ്ധോ ബ്യാകാസി, സങ്ഘമജ്ഝേ നിസീദിയ;

‘‘ഇമമ്ഹി ഭദ്ദകേ കപ്പേ, അയം ബുദ്ധോ ഭവിസ്സതി.

൧൩. ‘‘അഹു കപിലവ്ഹയാ രമ്മാ…പേ… ഹേസ്സാമ സമ്മുഖാ ഇമം’’.

൧൪. തസ്സാപി വചനം സുത്വാ, ഭിയ്യോ ചിത്തം പസാദയിം;

ഉത്തരിം വതമധിട്ഠാസിം, ദസപാരമിപൂരിയാ.

൧൫. സബ്ബഞ്ഞുതം ഗവേസന്തോ, ദാനം ദത്വാ നരുത്തമേ;

ഓഹായാഹം മഹാരജ്ജം, പബ്ബജിം ജിനസന്തികേ [തസ്സ സന്തികേ (സീ.)].

൧൬. നഗരം സോഭവതീ നാമ, സോഭോ നാമാസി ഖത്തിയോ;

വസതേ തത്ഥ നഗരേ, സമ്ബുദ്ധസ്സ മഹാകുലം.

൧൭. ബ്രാഹ്മണോ യഞ്ഞദത്തോ ച, ആസി ബുദ്ധസ്സ സോ പിതാ;

ഉത്തരാ നാമ ജനികാ, കോണാഗമനസ്സ സത്ഥുനോ.

൧൮. തീണി വസ്സസഹസ്സാനി, അഗാരം അജ്ഝ സോ വസി;

തുസിതസന്തുസിതസന്തുട്ഠാ, തയോ പാസാദമുത്തമാ.

൧൯. അനൂനസോളസസഹസ്സാനി, നാരിയോ സമലങ്കതാ;

രുചിഗത്താ നാമ നാരീ, സത്ഥവാഹോ നാമ അത്രജോ.

൨൦. നിമിത്തേ ചതുരോ ദിസ്വാ, ഹത്ഥിയാനേന നിക്ഖമി;

ഛമാസം പധാനചാരം, അചരീ പുരിസുത്തമോ.

൨൧. ബ്രഹ്മുനാ യാചിതോ സന്തോ, കോണാഗമനനായകോ;

വത്തി ചക്കം മഹാവീരോ, മിഗദായേ നരുത്തമോ.

൨൨. ഭിയ്യസോ ഉത്തരോ നാമ, അഹേസും അഗ്ഗസാവകാ;

സോത്ഥിജോ നാമുപട്ഠാകോ, കോണാഗമനസ്സ സത്ഥുനോ.

൨൩. സമുദ്ദാ ഉത്തരാ ചേവ, അഹേസും അഗ്ഗസാവികാ;

ബോധി തസ്സ ഭഗവതോ, ഉദുമ്ബരോതി പവുച്ചതി.

൨൪. ഉഗ്ഗോ ച സോമദേവോ ച, അഹേസും അഗ്ഗുപട്ഠകാ;

സീവലാ ചേവ സാമാ ച, അഹേസും അഗ്ഗുപട്ഠികാ.

൨൫. ഉച്ചത്തനേന സോ ബുദ്ധോ, തിംസഹത്ഥസമുഗ്ഗതോ;

ഉക്കാമുഖേ യഥാ കമ്ബു, ഏവം രംസീഹി മണ്ഡിതോ.

൨൬. തിംസവസ്സസഹസ്സാനി, ആയു ബുദ്ധസ്സ താവദേ;

താവതാ തിട്ഠമാനോ സോ, താരേസി ജനതം ബഹും.

൨൭. ധമ്മചേതിം സമുസ്സേത്വാ, ധമ്മദുസ്സവിഭൂസിതം;

ധമ്മപുപ്ഫഗുളം കത്വാ, നിബ്ബുതോ സോ സസാവകോ.

൨൮. മഹാവിലാസോ തസ്സ ജനോ, സിരിധമ്മപ്പകാസനോ;

സബ്ബം തമന്തരഹിതം, നനു രിത്താ സബ്ബസങ്ഖാരാ.

൨൯. കോണാഗമനോ സമ്ബുദ്ധോ, പബ്ബതാരാമമ്ഹി നിബ്ബുതോ;

ധാതുവിത്ഥാരികം ആസി, തേസു തേസു പദേസതോതി.

കോണാഗമനസ്സ ഭഗവതോ വംസോ തേവീസതിമോ.