൨൩. വേസ്സഭൂബുദ്ധവംസോ

൧. തത്ഥേവ മണ്ഡകപ്പമ്ഹി, അസമോ അപ്പടിപുഗ്ഗലോ;

വേസ്സഭൂ നാമ നാമേന, ലോകേ ഉപ്പജ്ജി നായകോ [സോ ജിനോ (സ്യാ. കം. ക.)].

൨. ആദിത്തം വത രാഗഗ്ഗി, തണ്ഹാനം വിജിതം തദാ;

നാഗോവ ബന്ധനം ഛേത്വാ, പത്തോ സമ്ബോധിമുത്തമം.

൩. ധമ്മചക്കം പവത്തേന്തേ, വേസ്സഭൂലോകനായകേ;

അസീതികോടിസഹസ്സാനം, പഠമാഭിസമയോ അഹു.

൪. പക്കന്തേ ചാരികം രട്ഠേ, ലോകജേട്ഠേ നരാസഭേ;

സത്തതികോടിസഹസ്സാനം, ദുതിയാഭിസമയോ അഹു.

൫. മഹാദിട്ഠിം വിനോദേന്തോ, പാടിഹേരം കരോതി സോ;

സമാഗതാ നരമരൂ, ദസസഹസ്സീ സദേവകേ.

൬. മഹാഅച്ഛരിയം ദിസ്വാ, അബ്ഭുതം ലോമഹംസനം;

ദേവാ ചേവ മനുസ്സാ ച, ബുജ്ഝരേ സട്ഠികോടിയോ.

൭. സന്നിപാതാ തയോ ആസും, വേസ്സഭുസ്സ മഹേസിനോ;

ഖീണാസവാനം വിമലാനം, സന്തചിത്താന താദിനം.

൮. അസീതിഭിക്ഖുസഹസ്സാനം, പഠമോ ആസി സമാഗമോ;

സത്തതിഭിക്ഖുസഹസ്സാനം, ദുതിയോ ആസി സമാഗമോ.

൯. സട്ഠിഭിക്ഖുസഹസ്സാനം, തതിയോ ആസി സമാഗമോ;

ജരാദിഭയഭീതാനം, ഓരസാനം മഹേസിനോ.

൧൦. അഹം തേന സമയേന, സുദസ്സനോ നാമ ഖത്തിയോ;

നിമന്തേത്വാ മഹാവീരം, ദാനം ദത്വാ മഹാരഹം;

അന്നപാനേന വത്ഥേന, സസങ്ഘം ജിന പൂജയിം.

൧൧. തസ്സ ബുദ്ധസ്സ അസമസ്സ, ചക്കം വത്തിതമുത്തമം;

സുത്വാന പണിതം ധമ്മം, പബ്ബജ്ജമഭിരോചയിം.

൧൨. മഹാദാനം പവത്തേത്വാ, രത്തിന്ദിവമതന്ദിതോ;

പബ്ബജ്ജം ഗുണസമ്പന്നം, പബ്ബജിം ജിനസന്തികേ.

൧൩. ആചാരഗുണസമ്പന്നോ, വത്തസീലസമാഹിതോ;

സബ്ബഞ്ഞുതം ഗവേസന്തോ, രമാമി ജിനസാസനേ.

൧൪. സദ്ധാപീതിം ഉപഗന്ത്വാ, ബുദ്ധം വന്ദാമി സത്ഥരം;

പീതി ഉപ്പജ്ജതി മയ്ഹം, ബോധിയായേവ കാരണാ.

൧൫. അനിവത്തമാനസം ഞത്വാ, സമ്ബുദ്ധോ ഏതദബ്രവി;

‘‘ഏകതിംസേ ഇതോ കപ്പേ, അയം ബുദ്ധോ ഭവിസ്സതി.

൧൬. ‘‘അഹു കപിലവ്ഹയാ രമ്മാ…പേ… ഹേസ്സാമ സമ്മുഖാ ഇമം’’.

൧൭. തസ്സാഹം വചനം സുത്വാ, ഭിയ്യോ ചിത്തം പസാദയിം;

ഉത്തരിം വതമധിട്ഠാസിം, ദസപാരമിപൂരിയാ.

൧൮. അനോമം നാമ നഗരം, സുപ്പതീതോ നാമ ഖത്തിയോ;

മാതാ യസവതീ നാമ, വേസ്സഭുസ്സ മഹേസിനോ.

൧൯. ഛ ച വസ്സസഹസ്സാനി, അഗാരം അജ്ഝ സോ വസി;

രുചി സുരുചി രതിവഡ്ഢനോ, തയോ പാസാദമുത്തമാ.

൨൦. അനൂനതിംസസഹസ്സാനി, നാരിയോ സമലങ്കതാ;

സുചിത്താ നാമ സാ നാരീ, സുപ്പബുദ്ധോ നാമ അത്രജോ.

൨൧. നിമിത്തേ ചതുരോ ദിസ്വാ, സിവികായാഭിനിക്ഖമി;

ഛമാസം പധാനചാരം, അചരീ പുരിസുത്തമോ.

൨൨. ബ്രഹ്മുനാ യാചിതോ സന്തോ, വേസ്സഭൂലോകനായകോ;

വത്തി ചക്കം മഹാവീരോ, അരുണാരാമേ നരുത്തമോ.

൨൩. സോണോ ച ഉത്തരോ ചേവ, അഹേസും അഗ്ഗസാവകാ;

ഉപസന്തോ നാമുപട്ഠാകോ, വേസ്സഭുസ്സ മഹേസിനോ.

൨൪. രാമാ [ദാമാ (സീ.)] ചേവ സമാലാ ച, അഹേസും അഗ്ഗസാവികാ;

ബോധി തസ്സ ഭഗവതോ, മഹാസാലോതി വുച്ചതി.

൨൫. സോത്ഥികോ ചേവ രമ്ഭോ ച, അഹേസും അഗ്ഗുപട്ഠകാ;

ഗോതമീ സിരിമാ ചേവ, അഹേസും അഗ്ഗുപട്ഠികാ.

൨൬. സട്ഠിരതനമുബ്ബേധോ, ഹേമയൂപസമൂപമോ;

കായാ നിച്ഛരതി രസ്മി, രത്തിംവ പബ്ബതേ സിഖീ.

൨൭. സട്ഠിവസ്സസഹസ്സാനി, ആയു തസ്സ മഹേസിനോ;

താവതാ തിട്ഠമാനോ സോ, താരേസി ജനതം ബഹും.

൨൮. ധമ്മം വിത്ഥാരികം കത്വാ, വിഭജിത്വാ മഹാജനം;

ധമ്മനാവം ഠപേത്വാന, നിബ്ബുതോ സോ സസാവകോ.

൨൯. ദസ്സനേയ്യം സബ്ബജനം, വിഹാരം ഇരിയാപഥം;

സബ്ബം തമന്തരഹിതം, നനു രിത്താ സബ്ബസങ്ഖാരാ.

൩൦. വേസ്സഭൂ ജിനവരോ സത്ഥാ, ഖേമാരാമമ്ഹി നിബ്ബുതോ;

ധാതുവിത്ഥാരികം ആസി, തേസു തേസു പദേസതോതി.

വേസ്സഭുസ്സ ഭഗവതോ വംസോ ഏകവീസതിമോ.