൨൨. സിഖീബുദ്ധവംസോ

൧. വിപസ്സിസ്സ അപരേന, സമ്ബുദ്ധോ ദ്വിപദുത്തമോ;

സിഖിവ്ഹയോ ആസി ജിനോ, അസമോ അപ്പടിപുഗ്ഗലോ.

൨. മാരസേനം പമദ്ദിത്വാ, പത്തോ സമ്ബോധിമുത്തമം;

ധമ്മചക്കം പവത്തേസി, അനുകമ്പായ പാണിനം.

൩. ധമ്മചക്കം പവത്തേന്തേ, സിഖിമ്ഹി ജിനപുങ്ഗവേ [മുനിപുങ്ഗവേ (സീ.)];

കോടിസതസഹസ്സാനം, പഠമാഭിസമയോ അഹു.

൪. അപരമ്പി ധമ്മം ദേസേന്തേ, ഗണസേട്ഠേ നരുത്തമേ;

നവുതികോടിസഹസ്സാനം, ദുതിയാഭിസമയോ അഹു.

൫. യമകപാടിഹാരിയഞ്ച [യമകം പാടിഹീരഞ്ച (സീ.)], ദസ്സയന്തേ സദേവകേ;

അസീതികോടിസഹസ്സാനം, തതിയാഭിസമയോ അഹു.

൬. സന്നിപാതാ തയോ ആസും, സിഖിസ്സാപി മഹേസിനോ;

ഖീണാസവാനം വിമലാനം, സന്തചിത്താന താദിനം.

൭. ഭിക്ഖുസതസഹസ്സാനം, പഠമോ ആസി സമാഗമോ;

അസീതിഭിക്ഖുസഹസ്സാനം, ദുതിയോ ആസി സമാഗമോ.

൮. സത്തതിഭിക്ഖുസഹസ്സാനം, തതിയോ ആസി സമാഗമോ;

അനുപലിത്തോ പദുമംവ, തോയമ്ഹി സമ്പവഡ്ഢിതം.

൯. അഹം തേന സമയേന, അരിന്ദമോ നാമ ഖത്തിയോ;

സമ്ബുദ്ധപ്പമുഖം സങ്ഘം, അന്നപാനേന തപ്പയിം.

൧൦. ബഹും ദുസ്സവരം ദത്വാ, ദുസ്സകോടിം അനപ്പകം;

അലങ്കതം ഹത്ഥിയാനം, സമ്ബുദ്ധസ്സ അദാസഹം.

൧൧. ഹത്ഥിയാനം നിമ്മിനിത്വാ, കപ്പിയം ഉപനാമയിം;

പൂരയിം മാനസം മയ്ഹം, നിച്ചം ദള്ഹമുപട്ഠിതം.

൧൨. സോപി മം ബുദ്ധോ ബ്യാകാസി, സിഖീ ലോകഗ്ഗനായകോ;

‘‘ഏകതിംസേ ഇതോ കപ്പേ, അയം ബുദ്ധോ ഭവിസ്സതി.

൧൩. ‘‘അഹു കപിലവ്ഹയാ രമ്മാ…പേ… ഹേസ്സാമ സമ്മുഖാ ഇമം’’.

൧൪. തസ്സാഹം വചനം സുത്വാ, ഭിയ്യോ ചിത്തം പസാദയിം;

ഉത്തരിം വതമധിട്ഠാസിം, ദസപാരമിപൂരിയാ.

൧൫. നഗരം അരുണവതീ നാമ, അരുണോ നാമ ഖത്തിയോ;

പഭാവതീ നാമ ജനികാ, സിഖിസ്സാപി മഹേസിനോ.

൧൬. സത്തവസ്സസഹസ്സാനി, അഗാരം അജ്ഝ സോ വസി;

സുചന്ദകോ ഗിരി വസഭോ [സുചന്ദോ ഗിരിവഹനോ (സീ.)], തയോ പാസാദമുത്തമാ.

൧൭. ചതുവീസസഹസ്സാനി, നാരിയോ സമലങ്കതാ;

സബ്ബകാമാ നാമ നാരീ, അതുലോ നാമ അത്രജോ.

൧൮. നിമിത്തേ ചതുരോ ദിസ്വാ, ഹത്ഥിയാനേന നിക്ഖമി;

അട്ഠമാസം പധാനചാരം, അചരീ പുരിസുത്തമോ.

൧൯. ബ്രഹ്മുനാ യാചിതോ സന്തോ, സിഖീ ലോകഗ്ഗനായകോ;

വത്തി ചക്കം മഹാവീരോ, മിഗദായേ നരുത്തമോ.

൨൦. അഭിഭൂ സമ്ഭവോ ചേവ, അഹേസും അഗ്ഗസാവകാ;

ഖേമങ്കരോ നാമുപട്ഠാകോ, സിഖിസ്സാപി മഹേസിനോ.

൨൧. സഖിലാ ച പദുമാ ച, അഹേസും അഗ്ഗസാവികാ;

ബോധി തസ്സ ഭഗവതോ, പുണ്ഡരീകോതി വുച്ചതി.

൨൨. സിരിവഡ്ഢോ ച നന്ദോ ച, അഹേസും അഗ്ഗുപട്ഠകാ;

ചിത്താ ചേവ സുഗുത്താ ച, അഹേസും അഗ്ഗുപട്ഠികാ.

൨൩. ഉച്ചത്തനേന സോ ബുദ്ധോ, സത്തതിഹത്ഥമുഗ്ഗതോ;

കഞ്ചനഗ്ഘിയസങ്കാസോ, ദ്വത്തിംസവരലക്ഖണോ.

൨൪. തസ്സാപി ബ്യാമപ്പഭാ കായാ, ദിവാരത്തിം നിരന്തരം;

ദിസോദിസം നിച്ഛരന്തി, തീണിയോജനസോ പഭാ.

൨൫. സത്തതിവസ്സസഹസ്സാനി, ആയു തസ്സ മഹേസിനോ;

താവതാ തിട്ഠമാനോ സോ, താരേസി ജനതം ബഹും.

൨൬. ധമ്മമേഘം പവസ്സേത്വാ, തേമയിത്വാ സദേവകേ;

ഖേമന്തം പാപയിത്വാന, നിബ്ബുതോ സോ സസാവകോ.

൨൭. അനുബ്യഞ്ജനസമ്പന്നം, ദ്വത്തിംസവരലക്ഖണം;

സബ്ബം തമന്തരഹിതം, നനു രിത്താ സബ്ബസങ്ഖാരാ.

൨൮. സിഖീ മുനിവരോ ബുദ്ധോ, അസ്സാരാമമ്ഹി നിബ്ബുതോ;

തത്ഥേവസ്സ ഥൂപവരോ, തീണിയോജനമുഗ്ഗതോതി.

സിഖിസ്സ ഭഗവതോ വംസോ വീസതിമോ.