൨൦. ഫുസ്സബുദ്ധവംസോ

൧. തത്ഥേവ മണ്ഡകപ്പമ്ഹി, അഹു സത്ഥാ അനുത്തരോ;

അനുപമോ അസമസമോ, ഫുസ്സോ ലോകഗ്ഗനായകോ.

൨. സോപി സബ്ബം തമം ഹന്ത്വാ, വിജടേത്വാ മഹാജടം;

സദേവകം തപ്പയന്തോ, അഭിവസ്സി അമതമ്ബുനാ.

൩. ധമ്മചക്കം പവത്തേന്തേ, ഫുസ്സേ നക്ഖത്തമങ്ഗലേ;

കോടിസതസഹസ്സാനം, പഠമാഭിസമയോ അഹു.

൪. നവുതിസതസഹസ്സാനം, ദുതിയാഭിസമയോ അഹു;

അസീതിസതസഹസ്സാനം, തതിയാഭിസമയോ അഹു.

൫. സന്നിപാതാ തയോ ആസും, ഫുസ്സസ്സാപി മഹേസിനോ;

ഖീണാസവാനം വിമലാനം, സന്തചിത്താന താദിനം.

൬. സട്ഠിസതസഹസ്സാനം, പഠമോ ആസി സമാഗമോ;

പഞ്ഞാസസതസഹസ്സാനം, ദുതിയോ ആസി സമാഗമോ.

൭. ചത്താരീസസതസഹസ്സാനം, തതിയോ ആസി സമാഗമോ;

അനുപാദാ വിമുത്താനം, വോച്ഛിന്നപടിസന്ധിനം.

൮. അഹം തേന സമയേന, വിജിതാവീ നാമ ഖത്തിയോ;

ഛഡ്ഡയിത്വാ മഹാരജ്ജം, പബ്ബജിം തസ്സ സന്തികേ.

൯. സോപി മം ബുദ്ധോ ബ്യാകാസി, ഫുസ്സോ ലോകഗ്ഗനായകോ;

‘‘ദ്വേനവുതേ ഇതോ കപ്പേ, അയം ബുദ്ധോ ഭവിസ്സതി.

൧൦. ‘‘പധാനം പദഹിത്വാന…പേ… ഹേസ്സാമ സമ്മുഖാ ഇമം’’.

൧൧. തസ്സാപി വചനം സുത്വാ, ഭിയ്യോ ചിത്തം പസാദയിം;

ഉത്തരിം വതമധിട്ഠാസിം, ദസപാരമിപൂരിയാ.

൧൨. സുത്തന്തം വിനയഞ്ചാപി, നവങ്ഗം സത്ഥുസാസനം;

സബ്ബം പരിയാപുണിത്വാ, സോഭയിം ജിനസാസനം.

൧൩. തത്ഥപ്പമത്തോ വിഹരന്തോ, ബ്രഹ്മം ഭാവേത്വ ഭാവനം;

അഭിഞ്ഞാസു പാരമിം ഗന്ത്വാ, ബ്രഹ്മലോകമഗഞ്ഛഹം.

൧൪. കാസികം നാമ നഗരം, ജയസേനോ നാമ ഖത്തിയോ;

സിരിമാ നാമ ജനികാ, ഫുസ്സസ്സാപി മഹേസിനോ.

൧൫. നവവസ്സസഹസ്സാനി, അഗാരം അജ്ഝ സോ വസി;

ഗരുളപക്ഖ ഹംസ സുവണ്ണഭാരാ, തയോ പാസാദമുത്തമാ.

൧൬. തിംസഇത്ഥിസഹസ്സാനി, നാരിയോ സമലങ്കതാ;

കിസാഗോതമീ നാമ നാരീ, അനൂപമോ നാമ അത്രജോ.

൧൭. നിമിത്തേ ചതുരോ ദിസ്വാ, ഹത്ഥിയാനേന നിക്ഖമി;

ഛമാസം പധാനചാരം, അചരീ പുരിസുത്തമോ.

൧൮. ബ്രഹ്മുനാ യാചിതോ സന്തോ, ഫുസ്സോ ലോകഗ്ഗനായകോ;

വത്തി ചക്കം മഹാവീരോ, മിഗദായേ നരുത്തമോ.

൧൯. സുരക്ഖിതോ ധമ്മസേനോ, അഹേസും അഗ്ഗസാവകാ;

സഭിയോ നാമുപട്ഠാകോ, ഫുസ്സസ്സാപി മഹേസിനോ.

൨൦. ചാലാ ച ഉപചാലാ ച, അഹേസും അഗ്ഗസാവികാ;

ബോധി തസ്സ ഭഗവതോ, ആമണ്ഡോതി പവുച്ചതി.

൨൧. ധനഞ്ചയോ വിസാഖോ ച, അഹേസും അഗ്ഗുപട്ഠകാ;

പദുമാ ചേവ നാഗാ ച, അഹേസും അഗ്ഗുപട്ഠികാ.

൨൨. അട്ഠപണ്ണാസരതനം, സോപി അച്ചുഗ്ഗതോ മുനി;

സോഭതേ സതരംസീവ, ഉളുരാജാവ പൂരിതോ.

൨൩. നവുതിവസ്സസഹസ്സാനി, ആയു വിജ്ജതി താവദേ;

താവതാ തിട്ഠമാനോ സോ, താരേസി ജനതം ബഹും.

൨൪. ഓവദിത്വാ ബഹൂ സത്തേ, സന്താരേത്വാ ബഹൂ ജനേ;

സോപി സത്ഥാ അതുലയസോ, നിബ്ബുതോ സോ സസാവകോ.

൨൫. ഫുസ്സോ ജിനവരോ സത്ഥാ, സേനാരാമമ്ഹി നിബ്ബുതോ;

ധാതുവിത്ഥാരികം ആസി, തേസു തേസു പദേസതോതി.

ഫുസ്സസ്സ ഭഗവതോ വംസോ അട്ഠാരസമോ.