൧൯. തിസ്സബുദ്ധവംസോ

൧. സിദ്ധത്ഥസ്സ അപരേന, അസമോ അപ്പടിപുഗ്ഗലോ;

അനന്തതേജോ അമിതയസോ, തിസ്സോ ലോകഗ്ഗനായകോ.

൨. തമന്ധകാരം വിധമിത്വാ, ഓഭാസേത്വാ സദേവകം;

അനുകമ്പകോ മഹാവീരോ, ലോകേ ഉപ്പജ്ജി ചക്ഖുമാ.

൩. തസ്സാപി അതുലാ ഇദ്ധി, അതുലം സീലം സമാധി ച;

സബ്ബത്ഥ പാരമിം ഗന്ത്വാ, ധമ്മചക്കം പവത്തയി.

൪. സോ ബുദ്ധോ ദസസഹസ്സിമ്ഹി, വിഞ്ഞാപേസി ഗിരം സുചിം;

കോടിസതാനി അഭിസമിംസു, പഠമേ ധമ്മദേസനേ.

൫. ദുതിയോ നവുതികോടീനം, തതിയോ സട്ഠികോടിയോ;

ബന്ധനാതോ പമോചേസി, സത്തേ [സമ്പത്തേ (ക.)] നരമരൂ തദാ.

൬. സന്നിപാതാ തയോ ആസും, തിസ്സേ ലോകഗ്ഗനായകേ;

ഖീണാസവാനം വിമലാനം, സന്തചിത്താന താദിനം.

൭. ഖീണാസവസതസഹസ്സാനം, പഠമോ ആസി സമാഗമോ;

നവുതിസതസഹസ്സാനം, ദുതിയോ ആസി സമാഗമോ.

൮. അസീതിസതസഹസ്സാനം, തതിയോ ആസി സമാഗമോ;

ഖീണാസവാനം വിമലാനം, പുപ്ഫിതാനം വിമുത്തിയാ.

൯. അഹം തേന സമയേന, സുജാതോ നാമ ഖത്തിയോ;

മഹാഭോഗം ഛഡ്ഡയിത്വാ, പബ്ബജിം ഇസിപബ്ബജം.

൧൦. മയി പബ്ബജിതേ സന്തേ, ഉപ്പജ്ജി ലോകനായകോ;

ബുദ്ധോതി സദ്ദം സുത്വാന, പീതി മേ ഉപപജ്ജഥ.

൧൧. ദിബ്ബം മന്ദാരവം പുപ്ഫം, പദുമം പാരിഛത്തകം;

ഉഭോ ഹത്ഥേഹി പഗ്ഗയ്ഹ, ധുനമാനോ ഉപാഗമിം.

൧൨. ചതുവണ്ണപരിവുതം, തിസ്സം ലോകഗ്ഗനായകം;

തമഹം പുപ്ഫം ഗഹേത്വാ, മത്ഥകേ ധാരയിം ജിനം.

൧൩. സോപി മം ബുദ്ധോ ബ്യാകാസി, ജനമജ്ഝേ നിസീദിയ;

‘‘ദ്വേനവുതേ ഇതോ കപ്പേ, അയം ബുദ്ധോ ഭവിസ്സതി.

൧൪. ‘‘പധാനം പദഹിത്വാന…പേ… ഹേസ്സാമ സമ്മുഖാ ഇമം’’.

൧൫. തസ്സാപി വചനം സുത്വാ, ഭിയ്യോ ചിത്തം പസാദയിം;

ഉത്തരിം വതമധിട്ഠാസിം, ദസപാരമിപൂരിയാ.

൧൬. ഖേമകം നാമ നഗരം, ജനസന്ധോ നാമ ഖത്തിയോ;

പദുമാ നാമ ജനികാ, തിസ്സസ്സ ച മഹേസിനോ.

൧൭. സത്തവസ്സസഹസ്സാനി, അഗാരം അജ്ഝ സോ വസി;

ഗുഹാസേല നാരിസയ നിസഭാ [കുമുദോ നാളിയോ പദുമോ (ക.)], തയോ പാസാദമുത്തമാ.

൧൮. സമതിംസസഹസ്സാനി, നാരിയോ സമലങ്കതാ;

സുഭദ്ദാനാമികാ നാരീ, ആനന്ദോ നാമ അത്രജോ.

൧൯. നിമിത്തേ ചതുരോ ദിസ്വാ, അസ്സയാനേന നിക്ഖമി;

അനൂനഅട്ഠമാസാനി, പധാനം പദഹീ ജിനോ.

൨൦. ബ്രഹ്മുനാ യാചിതോ സന്തോ, തിസ്സോ ലോകഗ്ഗനായകോ;

വത്തി ചക്കം മഹാവീരോ, യസവതിയമുത്തമേ.

൨൧. ബ്രഹ്മദേവോ ഉദയോ ച, അഹേസും അഗ്ഗസാവകാ;

സമങ്ഗോ നാമുപട്ഠാകോ, തിസ്സസ്സ ച മഹേസിനോ.

൨൨. ഫുസ്സാ ചേവ സുദത്താ ച, അഹേസും അഗ്ഗസാവികാ;

ബോധി തസ്സ ഭഗവതോ, അസനോതി പവുച്ചതി.

൨൩. സമ്ബലോ ച സിരിമാ ചേവ, അഹേസും അഗ്ഗുപട്ഠകാ;

കിസാഗോതമീ ഉപസേനാ, അഹേസും അഗ്ഗുപട്ഠികാ.

൨൪. സോ ബുദ്ധോ സട്ഠിരതനോ, അഹു ഉച്ചത്തനേ ജിനോ;

അനൂപമോ അസദിസോ, ഹിമവാ വിയ ദിസ്സതി.

൨൫. തസ്സാപി അതുലതേജസ്സ, ആയു ആസി അനുത്തരോ;

വസ്സസതസഹസ്സാനി, ലോകേ അട്ഠാസി ചക്ഖുമാ.

൨൬. ഉത്തമം പവരം സേട്ഠം, അനുഭോത്വാ മഹായസം;

ജലിത്വാ അഗ്ഗിക്ഖന്ധോവ, നിബ്ബുതോ സോ സസാവകോ.

൨൭. വലാഹകോവ അനിലേന, സൂരിയേന വിയ ഉസ്സവോ;

അന്ധകാരോവ പദീപേന, നിബ്ബുതോ സോ സസാവകോ.

൨൮. തിസ്സോ ജിനവരോ ബുദ്ധോ, നന്ദാരാമമ്ഹി നിബ്ബുതോ;

തത്ഥേവസ്സ ജിനഥൂപോ, തീണിയോജനമുഗ്ഗതോതി.

തിസ്സസ്സ ഭഗവതോ വംസോ സത്തരസമോ.