൧൮. സിദ്ധത്ഥബുദ്ധവംസോ

൧. ധമ്മദസ്സിസ്സ അപരേന, സിദ്ധത്ഥോ നാമ നായകോ;

നിഹനിത്വാ തമം സബ്ബം, സൂരിയോ അബ്ഭുഗ്ഗതോ യഥാ.

൨. സോപി പത്വാന സമ്ബോധിം, സന്താരേന്തോ സദേവകം;

അഭിവസ്സി ധമ്മമേഘേന, നിബ്ബാപേന്തോ സദേവകം.

൩. തസ്സാപി അതുലതേജസ്സ, അഹേസും അഭിസമയാ തയോ;

കോടിസതസഹസ്സാനം, പഠമാഭിസമയോ അഹു.

൪. പുനാപരം ഭീമരഥേ [ഹിമരട്ഠേ (ക.)], യദാ ആഹനി ദുന്ദുഭിം;

തദാ നവുതികോടീനം, ദുതിയാഭിസമയോ അഹു.

൫. യദാ ബുദ്ധോ ധമ്മം ദേസേസി, വേഭാരേ സോ പുരുത്തമേ;

തദാ നവുതികോടീനം, തതിയാഭിസമയോ അഹു.

൬. സന്നിപാതാ തയോ ആസും, തസ്മിമ്പി ദ്വിപദുത്തമേ;

ഖീണാസവാനം വിമലാനം, സന്തചിത്താന താദിനം.

൭. കോടിസതാനം നവുതീനം [നവുതിയാ (സ്യാ. കം.)], അസീതിയാപി ച കോടിനം;

ഏതേ ആസും തയോ ഠാനാ, വിമലാനം സമാഗമേ.

൮. അഹം തേന സമയേന, മങ്ഗലോ നാമ താപസോ;

ഉഗ്ഗതേജോ ദുപ്പസഹോ, അഭിഞ്ഞാബലസമാഹിതോ.

൯. ജമ്ബുതോ ഫലമാനേത്വാ [ഫലമാഹത്വാ (സീ. സ്യാ.)] സിദ്ധത്ഥസ്സ അദാസഹം;

പടിഗ്ഗഹേത്വാ സമ്ബുദ്ധോ, ഇദം വചനമബ്രവി.

൧൦. ‘‘പസ്സഥ ഇമം താപസം, ജടിലം ഉഗ്ഗതാപനം;

ചതുന്നവുതിതോ കപ്പേ, അയം ബുദ്ധോ ഭവിസ്സതി.

൧൧. ‘‘പധാനം പദഹിത്വാന…പേ… ഹേസ്സാമ സമ്മുഖാ ഇമം’’.

൧൨. തസ്സാപി വചനം സുത്വാ, ഭിയ്യോ ചിത്തം പസാദയിം;

ഉത്തരിം വതമധിട്ഠാസിം, ദസപാരമിപൂരിയാ.

൧൩. വേഭാരം നാമ നഗരം, ഉദേനോ നാമ ഖത്തിയോ;

സുഫസ്സാ നാമ ജനികാ, സിദ്ധത്ഥസ്സ മഹേസിനോ.

൧൪. ദസവസ്സസഹസ്സാനി, അഗാരം അജ്ഝ സോ വസി;

കോകാസുപ്പലകോകനദാ, തയോ പാസാദമുത്തമാ.

൧൫. തിസോളസസഹസ്സാനി, നാരിയോ സമലങ്കതാ;

സോമനസ്സാ നാമ സാ നാരീ, അനുപമോ നാമ അത്രജോ.

൧൬. നിമിത്തേ ചതുരോ ദിസ്വാ, സിവികായാഭിനിക്ഖമി;

അനൂനദസമാസാനി, പധാനം പദഹീ ജിനോ.

൧൭. ബ്രഹ്മുനാ യാചിതോ സന്തോ, സിദ്ധത്ഥോ ലോകനായകോ;

വത്തി ചക്കം മഹാവീരോ, മിഗദായേ നരുത്തമോ.

൧൮. സമ്ബലോ ച സുമിത്തോ ച, അഹേസും അഗ്ഗസാവകാ;

രേവതോ നാമുപട്ഠാകോ, സിദ്ധത്ഥസ്സ മഹേസിനോ.

൧൯. സീവലാ ച സുരാമാ ച, അഹേസും അഗ്ഗസാവികാ;

ബോധി തസ്സ ഭഗവതോ, കണികാരോതി വുച്ചതി.

൨൦. സുപ്പിയോ ച സമുദ്ദോ ച, അഹേസും അഗ്ഗുപട്ഠകാ;

രമ്മാ ചേവ സുരമ്മാ ച, അഹേസും അഗ്ഗുപട്ഠികാ.

൨൧. സോ ബുദ്ധോ സട്ഠിരതനം, അഹോസി നഭമുഗ്ഗതോ;

കഞ്ചനഗ്ഘിയസങ്കാസോ, ദസസഹസ്സീ വിരോചതി.

൨൨. സോപി ബുദ്ധോ അസമസമോ, അതുലോ അപ്പടിപുഗ്ഗലോ;

വസ്സസതസഹസ്സാനി, ലോകേ അട്ഠാസി ചക്ഖുമാ.

൨൩. വിപുലം പഭം ദസ്സയിത്വാ, പുപ്ഫാപേത്വാന സാവകേ;

വിലാസേത്വാ സമാപത്യാ, നിബ്ബുതോ സോ സസാവകോ.

൨൪. സിദ്ധത്ഥോ മുനിവരോ ബുദ്ധോ, അനോമാരാമമ്ഹി നിബ്ബുതോ;

തത്ഥേവസ്സ ഥൂപവരോ, ചതുയോജനമുഗ്ഗതോതി.

സിദ്ധത്ഥസ്സ ഭഗവതോ വംസോ സോളസമോ.