൧൭. ധമ്മദസ്സീബുദ്ധവംസോ

൧. തത്ഥേവ മണ്ഡകപ്പമ്ഹി, ധമ്മദസ്സീ മഹായസോ;

തമന്ധകാരം വിധമിത്വാ, അതിരോചതി സദേവകേ.

൨. തസ്സാപി അതുലതേജസ്സ, ധമ്മചക്കപ്പവത്തനേ;

കോടിസതസഹസ്സാനം, പഠമാഭിസമയോ അഹു.

൩. യദാ ബുദ്ധോ ധമ്മദസ്സീ, വിനേസി സഞ്ജയം ഇസിം;

തദാ നവുതികോടീനം, ദുതിയാഭിസമയോ അഹു.

൪. യദാ സക്കോ ഉപാഗഞ്ഛി, സപരിസോ വിനായകം;

തദാ അസീതികോടീനം, തതിയാഭിസമയോ അഹു.

൫. തസ്സാപി ദേവദേവസ്സ, സന്നിപാതാ തയോ അഹും [ആസും (സീ. സ്യാ.)];

ഖീണാസവാനം വിമലാനം, സന്തചിത്താന താദിനം.

൬. യദാ ബുദ്ധോ ധമ്മദസ്സീ, സരണേ വസ്സം ഉപാഗമി;

തദാ കോടിസതസഹസ്സാനം [കോടിസഹസ്സാനം (സീ. സ്യാ. കം.)], പഠമോ ആസി സമാഗമോ.

൭. പുനാപരം യദാ ബുദ്ധോ, ദേവതോ ഏതി മാനുസം;

തദാപി സതകോടീനം, ദുതിയോ ആസി സമാഗമോ.

൮. പുനാപരം യദാ ബുദ്ധോ, പകാസേസി ധുതേ ഗുണേ;

തദാ അസീതികോടീനം, തതിയോ ആസി സമാഗമോ.

൯. അഹം തേന സമയേന, സക്കോ ആസിം പുരിന്ദദോ;

ദിബ്ബേന ഗന്ധമാലേന, തുരിയേനാഭിപൂജയിം.

൧൦. സോപി മം ബുദ്ധോ ബ്യാകാസി, ദേവമജ്ഝേ നിസീദിയ;

‘‘അട്ഠാരസേ കപ്പസതേ, അയം ബുദ്ധോ ഭവിസ്സതി.

൧൧. ‘‘പധാനം പദഹിത്വാന…പേ… ഹേസ്സാമ സമ്മുഖാ ഇമം’’.

൧൨. തസ്സാപി വചനം സുത്വാ, ഭിയ്യോ ചിത്തം പസാദയിം;

ഉത്തരിം വതമധിട്ഠാസിം, ദസപാരമിപൂരിയാ.

൧൩. സരണം നാമ നഗരം, സരണോ നാമ ഖത്തിയോ;

സുനന്ദാ നാമ ജനികാ, ധമ്മദസ്സിസ്സ സത്ഥുനോ.

൧൪. അട്ഠവസ്സസഹസ്സാനി, അഗാരം അജ്ഝ സോ വസി;

അരജോ വിരജോ സുദസ്സനോ, തയോ പാസാദമുത്തമാ.

൧൫. തിചത്താരീസസഹസ്സാനി [ചത്താലീസസഹസ്സാനി (സ്യാ. കം.)], നാരിയോ സമലങ്കതാ;

വിചികോളി നാമ നാരീ, അത്രജോ പുഞ്ഞവഡ്ഢനോ.

൧൬. നിമിത്തേ ചതുരോ ദിസ്വാ, പാസാദേനാഭിനിക്ഖമി;

സത്താഹം പധാനചാരം, അചരീ പുരിസുത്തമോ.

൧൭. ബ്രഹ്മുനാ യാചിതോ സന്തോ, ധമ്മദസ്സീ നരാസഭോ;

വത്തി ചക്കം മഹാവീരോ, മിഗദായേ നരുത്തമോ.

൧൮. പദുമോ ഫുസ്സദേവോ ച, അഹേസും അഗ്ഗസാവകാ;

സുനേത്തോ [സുദത്തോ (സ്യാ. കം.)] നാമുപട്ഠാകോ, ധമ്മദസ്സിസ്സ സത്ഥുനോ.

൧൯. ഖേമാ ച സച്ചനാമാ ച, അഹേസും അഗ്ഗസാവികാ;

ബോധി തസ്സ ഭഗവതോ, ബിമ്ബിജാലോതി വുച്ചതി.

൨൦. സുഭദ്ദോ കടിസ്സഹോ ചേവ, അഹേസും അഗ്ഗുപട്ഠകാ;

സാളിയാ [സാലിസാ (സ്യാ. കം.)] ച കളിയാ ച, അഹേസും അഗ്ഗുപട്ഠികാ.

൨൧. സോപി ബുദ്ധോ അസമസമോ, അസീതിഹത്ഥമുഗ്ഗതോ;

അതിരോചതി തേജേന, ദസസഹസ്സിമ്ഹി ധാതുയാ.

൨൨. സുഫുല്ലോ സാലരാജാവ, വിജ്ജൂവ ഗഗനേ യഥാ;

മജ്ഝന്ഹികേവ സൂരിയോ, ഏവം സോ ഉപസോഭഥ.

൨൩. തസ്സാപി അതുലതേജസ്സ, സമകം ആസി ജീവിതം;

വസ്സസതസഹസ്സാനി, ലോകേ അട്ഠാസി ചക്ഖുമാ.

൨൪. ഓഭാസം ദസ്സയിത്വാന, വിമലം കത്വാന സാസനം;

ചവി ചന്ദോവ ഗഗനേ, നിബ്ബുതോ സോ സസാവകോ.

൨൫. ധമ്മദസ്സീ മഹാവീരോ, സാലാരാമമ്ഹി നിബ്ബുതോ;

തത്ഥേവസ്സ ഥൂപവരോ, തീണിയോജനമുഗ്ഗതോതി.

ധമ്മദസ്സിസ്സ ഭഗവതോ വംസോ പന്നരസമോ.