൧൪. സുജാതബുദ്ധവംസോ

൧. തത്ഥേവ മണ്ഡകപ്പമ്ഹി, സുജാതോ നാമ നായകോ;

സീഹഹനുസഭക്ഖന്ധോ, അപ്പമേയ്യോ ദുരാസദോ.

൨. ചന്ദോവ വിമലോ സുദ്ധോ, സതരംസീവ പതാപവാ;

ഏവം സോഭതി സമ്ബുദ്ധോ, ജലന്തോ സിരിയാ സദാ.

൩. പാപുണിത്വാന സമ്ബുദ്ധോ, കേവലം ബോധിമുത്തമം;

സുമങ്ഗലമ്ഹി നഗരേ, ധമ്മചക്കം പവത്തയി.

൪. ദേസേന്തേ [ദേസേന്തോ (സ്യാ. കം.)] പവരം ധമ്മം, സുജാതേ ലോകനായകേ [സുജാതോ ലോകനായകോ (സ്യാ. കം.)];

അസീതികോടീ അഭിസമിംസു, പഠമേ ധമ്മദേസനേ.

൫. യദാ സുജാതോ അമിതയസോ, ദേവേ വസ്സം ഉപാഗമി;

സത്തതിംസസതസഹസ്സാനം, ദുതിയാഭിസമയോ അഹു.

൬. യദാ സുജാതോ അസമസമോ, ഉപഗച്ഛി പിതുസന്തികം;

സട്ഠിസതസഹസ്സാനം [സത്തതിംസസഹസ്സാനം (സീ.)], തതിയാഭിസമയോ അഹു.

൭. സന്നിപാതാ തയോ ആസും, സുജാതസ്സ മഹേസിനോ;

ഖീണാസവാനം വിമലാനം, സന്തചിത്താന താദിനം.

൮. അഭിഞ്ഞാബലപ്പത്താനം, അപ്പത്താനം ഭവാഭവേ;

സട്ഠിസതസഹസ്സാനി, പഠമം സന്നിപതിംസു തേ.

൯. പുനാപരം സന്നിപാതേ, തിദിവോരോഹണേ ജിനേ;

പഞ്ഞാസസതസഹസ്സാനം, ദുതിയോ ആസി സമാഗമോ.

൧൦. ഉപസങ്കമന്തോ നരാസഭം, തസ്സ യോ അഗ്ഗസാവകോ;

ചതൂഹി സതസഹസ്സേഹി, സമ്ബുദ്ധം ഉപസങ്കമി.

൧൧. അഹം തേന സമയേന, ചതുദീപമ്ഹി ഇസ്സരോ;

അന്തലിക്ഖചരോ ആസിം, ചക്കവത്തീ മഹബ്ബലോ.

൧൨. ലോകേ അച്ഛരിയം ദിസ്വാ, അബ്ഭുതം ലോമഹംസനം;

ഉപഗന്ത്വാന വന്ദിം സോ, സുജാതം ലോകനായകം.

൧൩. ചതുദീപേ മഹാരജ്ജം, രതനേ സത്ത ഉത്തമേ;

ബുദ്ധേ നിയ്യാദയിത്വാന, പബ്ബജിം തസ്സ സന്തികേ.

൧൪. ആരാമികാ ജനപദേ, ഉട്ഠാനം പടിപിണ്ഡിയ;

ഉപനേന്തി ഭിക്ഖുസങ്ഘസ്സ, പച്ചയം സയനാസനം.

൧൫. സോപി മം ബുദ്ധോ [തദാ (സ്യാ. കം.)] ബ്യാകാസി, ദസസഹസ്സിമ്ഹി ഇസ്സരോ;

‘‘തിംസകപ്പസഹസ്സമ്ഹി, അയം ബുദ്ധോ ഭവിസ്സതി.

൧൬. ‘‘പധാനം പദഹിത്വാന…പേ… ഹേസ്സാമ സമ്മുഖാ ഇമം’’.

൧൭. തസ്സാപി വചനം സുത്വാ, ഭിയ്യോ ഹാസം ജനേസഹം;

അധിട്ഠഹിം വതം ഉഗ്ഗം, ദസപാരമിപൂരിയാ.

൧൮. സുത്തന്തം വിനയഞ്ചാപി, നവങ്ഗം സത്ഥുസാസനം;

സബ്ബം പരിയാപുണിത്വാന, സോഭയിം ജിനസാസനം.

൧൯. തത്ഥപ്പമത്തോ വിഹരന്തോ, ബ്രഹ്മം ഭാവേത്വ ഭാവനം;

അഭിഞ്ഞാപാരമിം ഗന്ത്വാ, ബ്രഹ്മലോകമഗഞ്ഛഹം.

൨൦. സുമങ്ഗലം നാമ നഗരം, ഉഗ്ഗതോ നാമ ഖത്തിയോ;

മാതാ പഭാവതീ നാമ, സുജാതസ്സ മഹേസിനോ.

൨൧. നവവസ്സസഹസ്സാനി, അഗാരം അജ്ഝ സോ വസി;

സിരീ ഉപസിരീ നന്ദോ, തയോ പാസാദമുത്തമാ.

൨൨. തേവീസതിസഹസ്സാനി, നാരിയോ സമലങ്കതാ;

സിരിനന്ദാ നാമ നാരീ, ഉപസേനോ നാമ അത്രജോ.

൨൩. നിമിത്തേ ചതുരോ ദിസ്വാ, അസ്സയാനേന നിക്ഖമി;

അനൂനനവമാസാനി, പധാനം പദഹീ ജിനോ.

൨൪. ബ്രഹ്മുനാ യാചിതോ സന്തോ, സുജാതോ ലോകനായകോ;

വത്തി ചക്കം മഹാവീരോ, സുമങ്ഗലുയ്യാനമുത്തമേ.

൨൫. സുദസ്സനോ സുദേവോ ച, അഹേസും അഗ്ഗസാവകാ;

നാരദോ നാമുപട്ഠാകോ, സുജാതസ്സ മഹേസിനോ.

൨൬. നാഗാ ച നാഗസമാലാ ച, അഹേസും അഗ്ഗസാവികാ;

ബോധി തസ്സ ഭഗവതോ, മഹാവേളൂതി വുച്ചതി.

൨൭. സോ ച രുക്ഖോ ഘനക്ഖന്ധോ [ഘനരുചിരോ (സീ. ക.)], അച്ഛിദ്ദോ ഹോതി പത്തികോ;

ഉജു വംസോ ബ്രഹാ ഹോതി, ദസ്സനീയോ മനോരമോ.

൨൮. ഏകക്ഖന്ധോ പവഡ്ഢിത്വാ, തതോ സാഖാ പഭിജ്ജതി;

യഥാ സുബദ്ധോ മോരഹത്ഥോ, ഏവം സോഭതി സോ ദുമോ.

൨൯. ന തസ്സ കണ്ടകാ ഹോന്തി, നാപി ഛിദ്ദം മഹാ അഹു;

വിത്ഥിണ്ണസാഖോ അവിരലോ, സന്ദച്ഛായോ മനോരമോ.

൩൦. സുദത്തോ ചേവ ചിത്തോ ച, അഹേസും അഗ്ഗുപട്ഠകാ;

സുഭദ്ദാ ച പദുമാ ച, അഹേസും അഗ്ഗുപട്ഠികാ.

൩൧. പഞ്ഞാസരതനോ ആസി, ഉച്ചത്തനേന സോ ജിനോ;

സബ്ബാകാരവരൂപേതോ, സബ്ബഗുണമുപാഗതോ.

൩൨. തസ്സ പഭാ അസമസമാ, നിദ്ധാവതി സമന്തതോ;

അപ്പമാണോ അതുലിയോ, ഓപമ്മേഹി അനൂപമോ.

൩൩. നവുതിവസ്സസഹസ്സാനി, ആയു വിജ്ജതി താവദേ;

താവതാ തിട്ഠമാനോ സോ, താരേസി ജനതം ബഹും.

൩൪. യഥാപി സാഗരേ ഊമീ, ഗഗനേ താരകാ യഥാ;

ഏവം തദാ പാവചനം, അരഹന്തേഹി ചിത്തിതം [ചിത്തകം (സ്യാ. കം.)].

൩൫. സോ ച ബുദ്ധോ അസമസമോ, ഗുണാനി ച താനി അതുലിയാനി;

സബ്ബം തമന്തരഹിതം, നനു രിത്താ സബ്ബസങ്ഖാരാ.

൩൬. സുജാതോ ജിനവരോ ബുദ്ധോ, സിലാരാമമ്ഹി നിബ്ബുതോ;

തത്ഥേവ തസ്സ ചേതിയോ [തത്ഥേവ ചേതിയോ സത്ഥു (സ്യാ. കം.)], തീണിഗാവുതമുഗ്ഗതോതി.

സുജാതസ്സ ഭഗവതോ വംസോ ദ്വാദസമോ.