൧൫. പിയദസ്സീബുദ്ധവംസോ

൧. സുജാതസ്സ അപരേന, സയമ്ഭൂ ലോകനായകോ;

ദുരാസദോ അസമസമോ, പിയദസ്സീ മഹായസോ.

൨. സോപി ബുദ്ധോ അമിതയസോ, ആദിച്ചോവ വിരോചതി;

സബ്ബം തമം നിഹന്ത്വാന, ധമ്മചക്കം പവത്തയി.

൩. തസ്സാപി അതുലതേജസ്സ, അഹേസും അഭിസമയാ തയോ;

കോടിസതസഹസ്സാനം, പഠമാഭിസമയോ അഹു.

൪. സുദസ്സനോ ദേവരാജാ, മിച്ഛാദിട്ഠിമരോചയി;

തസ്സ ദിട്ഠിം വിനോദേന്തോ, സത്ഥാ ധമ്മമദേസയി.

൫. ജനസന്നിപാതോ അതുലോ, മഹാസന്നിപതീ തദാ;

നവുതികോടിസഹസ്സാനം, ദുതിയാഭിസമയോ അഹു.

൬. യദാ ദോണമുഖം ഹത്ഥിം, വിനേസി നരസാരഥി;

അസീതികോടിസഹസ്സാനം, തതിയാഭിസമയോ അഹു.

൭. സന്നിപാതാ തയോ ആസും, തസ്സാപി പിയദസ്സിനോ;

കോടിസതസഹസ്സാനം, പഠമോ ആസി സമാഗമോ.

൮. തതോ പരം നവുതികോടീ, സമിംസു ഏകതോ മുനീ;

തതിയേ സന്നിപാതമ്ഹി, അസീതികോടിയോ അഹൂ.

൯. അഹം തേന സമയേന, കസ്സപോ നാമ ബ്രാഹ്മണോ [മാനവോ (സ്യാ. കം.)];

അജ്ഝായകോ മന്തധരോ, തിണ്ണം വേദാന പാരഗൂ.

൧൦. തസ്സ ധമ്മം സുണിത്വാന, പസാദം ജനയിം അഹം;

കോടിസതസഹസ്സേഹി, സങ്ഘാരാമം അമാപയിം.

൧൧. തസ്സ ദത്വാന ആരാമം, ഹട്ഠോ സംവിഗ്ഗമാനസോ;

സരണേ പഞ്ച സീലേ ച [സരണം പഞ്ചസീലഞ്ച (സീ.)], ദള്ഹം കത്വാ സമാദിയിം.

൧൨. സോപി മം ബുദ്ധോ ബ്യാകാസി, സങ്ഘമജ്ഝേ നിസീദിയ;

‘‘അട്ഠാരസേ കപ്പസതേ, അയം ബുദ്ധോ ഭവിസ്സതി.

൧൩. ‘‘പധാനം പദഹിത്വാന…പേ… ഹേസ്സാമ സമ്മുഖാ ഇമം’’.

൧൪. തസ്സാപി വചനം സുത്വാ, ഭിയ്യോ ചിത്തം പസാദയിം;

ഉത്തരിം വതമധിട്ഠാസിം, ദസപാരമിപൂരിയാ.

൧൫. സുധഞ്ഞം നാമ നഗരം, സുദത്തോ നാമ ഖത്തിയോ;

ചന്ദാ നാമാസി ജനികാ, പിയദസ്സിസ്സ സത്ഥുനോ.

൧൬. നവവസ്സസഹസ്സാനി, അഗാരം അജ്ഝ സോ വസി;

സുനിമ്മലവിമലഗിരിഗുഹാ, തയോ പാസാദമുത്തമാ.

൧൭. തേത്തിംസസഹസ്സാനി ച, നാരിയോ സമലങ്കതാ;

വിമലാ നാമ നാരീ ച, കഞ്ചനാവേളോ നാമ അത്രജോ.

൧൮. നിമിത്തേ ചതുരോ ദിസ്വാ, രഥയാനേന നിക്ഖമി;

ഛമാസം പധാനചാരം, അചരീ പുരിസുത്തമോ.

൧൯. ബ്രഹ്മുനാ യാചിതോ സന്തോ, പിയദസ്സീ മഹാമുനി;

വത്തി ചക്കം മഹാവീരോ, ഉസഭുയ്യാനേ മനോരമേ.

൨൦. പാലിതോ സബ്ബദസ്സീ ച, അഹേസും അഗ്ഗസാവകാ;

സോഭിതോ നാമുപട്ഠാകോ, പിയദസ്സിസ്സ സത്ഥുനോ.

൨൧. സുജാതാ ധമ്മദിന്നാ ച, അഹേസും അഗ്ഗസാവികാ;

ബോധി തസ്സ ഭഗവതോ, കകുധോതി പവുച്ചതി.

൨൨. സന്ധകോ ധമ്മകോ ചേവ, അഹേസും അഗ്ഗുപട്ഠകാ;

വിസാഖാ ധമ്മദിന്നാ ച, അഹേസും അഗ്ഗുപട്ഠികാ.

൨൩. സോപി ബുദ്ധോ അമിതയസോ, ദ്വത്തിംസവരലക്ഖണോ;

അസീതിഹത്ഥമുബ്ബേധോ, സാലരാജാവ ദിസ്സതി.

൨൪. അഗ്ഗിചന്ദസൂരിയാനം, നത്ഥി താദിസികാ പഭാ;

യഥാ അഹു പഭാ തസ്സ, അസമസ്സ മഹേസിനോ.

൨൫. തസ്സാപി ദേവദേവസ്സ, ആയു താവതകം അഹു;

നവുതിവസ്സസഹസ്സാനി, ലോകേ അട്ഠാസി ചക്ഖുമാ.

൨൬. സോപി ബുദ്ധോ അസമസമോ, യുഗാനിപി താനി അതുലിയാനി;

സബ്ബം തമന്തരഹിതം, നനു രിത്താ സബ്ബസങ്ഖാരാ.

൨൭. പിയദസ്സീ മുനിവരോ, അസ്സത്ഥാരാമമ്ഹി നിബ്ബുതോ;

തത്ഥേവസ്സ ജിനഥൂപോ, തീണിയോജനമുഗ്ഗതോതി.

പിയദസ്സിസ്സ ഭഗവതോ വംസോ തേരസമോ.