൧൩. സുമേധബുദ്ധവംസോ

൧. പദുമുത്തരസ്സ അപരേന, സുമേധോ നാമ നായകോ;

ദുരാസദോ ഉഗ്ഗതേജോ, സബ്ബലോകുത്തമോ മുനി.

൨. പസന്നനേത്തോ സുമുഖോ, ബ്രഹാ ഉജു പതാപവാ;

ഹിതേസീ സബ്ബസത്താനം, ബഹൂ മോചേസി ബന്ധനാ.

൩. യദാ ബുദ്ധോ പാപുണിത്വാ, കേവലം ബോധിമുത്തമം;

സുദസ്സനമ്ഹി നഗരേ, ധമ്മചക്കം പവത്തയി.

൪. തസ്സാപി അഭിസമയാ തീണി, അഹേസും ധമ്മദേസനേ;

കോടിസതസഹസ്സാനം, പഠമാഭിസമയോ അഹു.

൫. പുനാപരം കുമ്ഭകണ്ണം, യക്ഖം സോ ദമയീ ജിനോ;

നവുതികോടിസഹസ്സാനം, ദുതിയാഭിസമയോ അഹു.

൬. പുനാപരം അമിതയസോ, ചതുസച്ചം പകാസയി;

അസീതികോടിസഹസ്സാനം, തതിയാഭിസമയോ അഹു.

൭. സന്നിപാതാ തയോ ആസും, സുമേധസ്സ മഹേസിനോ;

ഖീണാസവാനം വിമലാനം, സന്തചിത്താന താദിനം.

൮. സുദസ്സനം നാമ നഗരം, ഉപഗഞ്ഛി ജിനോ യദാ;

തദാ ഖീണാസവാ ഭിക്ഖൂ, സമിംസു സതകോടിയോ.

൯. പുനാപരം ദേവകൂടേ, ഭിക്ഖൂനം കഥിനത്ഥതേ;

തദാ നവുതികോടീനം, ദുതിയോ ആസി സമാഗമോ.

൧൦. പുനാപരം ദസബലോ, യദാ ചരതി ചാരികം;

തദാ അസീതികോടീനം, തതിയോ ആസി സമാഗമോ.

൧൧. അഹം തേന സമയേന, ഉത്തരോ നാമ മാണവോ;

അസീതികോടിയോ മയ്ഹം, ഘരേ സന്നിചിതം ധനം.

൧൨. കേവലം സബ്ബം ദത്വാന, സസങ്ഘേ ലോകനായകേ;

സരണം തസ്സുപഗഞ്ഛിം, പബ്ബജ്ജഞ്ചാഭിരോചയിം.

൧൩. സോപി മം ബുദ്ധോ ബ്യാകാസി, കരോന്തോ അനുമോദനം;

‘‘തിംസകപ്പസഹസ്സമ്ഹി, അയം ബുദ്ധോ ഭവിസ്സതി.

൧൪. ‘‘പധാനം പദഹിത്വാന…പേ… ഹേസ്സാമ സമ്മുഖാ ഇമം’’.

൧൫. തസ്സാപി വചനം സുത്വാ, ഭിയ്യോ ചിത്തം പസാദയിം;

ഉത്തരിം വതമധിട്ഠാസിം, ദസപാരമിപൂരിയാ.

൧൬. സുത്തന്തം വിനയഞ്ചാപി, നവങ്ഗം സത്ഥുസാസനം;

സബ്ബം പരിയാപുണിത്വാന, സോഭയിം ജിനസാസനം.

൧൭. തത്ഥപ്പമത്തോ വിഹരന്തോ, നിസജ്ജട്ഠാനചങ്കമേ;

അഭിഞ്ഞാസു പാരമിം ഗന്ത്വാ, ബ്രഹ്മലോകമഗഞ്ഛഹം.

൧൮. സുദസ്സനം നാമ നഗരം, സുദത്തോ നാമ ഖത്തിയോ;

സുദത്താ നാമ ജനികാ, സുമേധസ്സ മഹേസിനോ.

൧൯. നവവസ്സസഹസ്സാനി, അഗാരം അജ്ഝ സോ വസി;

സുചന്ദകഞ്ചനസിരിവഡ്ഢാ, തയോ പാസാദമുത്തമാ.

൨൦. തിസോളസസഹസ്സാനി, നാരിയോ സമലങ്കതാ;

സുമനാ നാമ സാ നാരീ, പുനബ്ബസു നാമ അത്രജോ.

൨൧. നിമിത്തേ ചതുരോ ദിസ്വാ, ഹത്ഥിയാനേന നിക്ഖമി;

അനൂനകം അഡ്ഢമാസം, പധാനം പദഹീ ജിനോ.

൨൨. ബ്രഹ്മുനാ യാചിതോ സന്തോ, സുമേധോ ലോകനായകോ;

വത്തി ചക്കം മഹാവീരോ, സുദസ്സനുയ്യാനമുത്തമേ.

൨൩. സരണോ സബ്ബകാമോ ച, അഹേസും അഗ്ഗസാവകാ;

സാഗരോ നാമുപട്ഠാകോ, സുമേധസ്സ മഹേസിനോ.

൨൪. രാമാ ചേവ സുരാമാ ച, അഹേസും അഗ്ഗസാവികാ;

ബോധി തസ്സ ഭഗവതോ, മഹാനീപോതി വുച്ചതി.

൨൫. ഉരുവേലാ യസവാ ച, അഹേസും അഗ്ഗുപട്ഠകാ;

യസോധരാ സിരിമാ ച [യസാ നാമ സിരിമാ ച (സ്യാ. കം.)], അഹേസും അഗ്ഗുപട്ഠികാ.

൨൬. അട്ഠാസീതിരതനാനി, അച്ചുഗ്ഗതോ മഹാമുനി;

ഓഭാസേതി ദിസാ സബ്ബാ, ചന്ദോ താരഗണേ യഥാ.

൨൭. ചക്കവത്തിമണീ നാമ, യഥാ തപതി യോജനം;

തഥേവ തസ്സ രതനം, സമന്താ ഫരതി യോജനം.

൨൮. നവുതിവസ്സസഹസ്സാനി, ആയു വിജ്ജതി താവദേ;

താവതാ തിട്ഠമാനോ സോ, താരേസി ജനതം ബഹും.

൨൯. തേവിജ്ജഛളഭിഞ്ഞേഹി, ബലപ്പത്തേഹി താദിഹി;

സമാകുലമിദം ആസി, അരഹന്തേഹി സാധുഹി.

൩൦. തേപി സബ്ബേ അമിതയസാ, വിപ്പമുത്താ നിരൂപധീ;

ഞാണാലോകം ദസ്സയിത്വാ, നിബ്ബുതാ തേ മഹായസാ.

൩൧. സുമേധോ ജിനവരോ ബുദ്ധോ, മേധാരാമമ്ഹി നിബ്ബുതോ;

ധാതുവിത്ഥാരികം ആസി, തേസു തേസു പദേസതോതി.

സുമേധസ്സ ഭഗവതോ വംസോ ഏകാദസമോ.