൧൨. പദുമുത്തരബുദ്ധവംസോ

൧. നാരദസ്സ അപരേന, സമ്ബുദ്ധോ ദ്വിപദുത്തമോ;

പദുമുത്തരോ നാമ ജിനോ, അക്ഖോഭോ സാഗരൂപമോ.

൨. മണ്ഡകപ്പോവ സോ ആസി, യമ്ഹി ബുദ്ധോ അജായഥ;

ഉസ്സന്നകുസലാ ജനതാ, തമ്ഹി കപ്പേ അജായഥ.

൩. പദുമുത്തരസ്സ ഭഗവതോ, പഠമേ ധമ്മദേസനേ;

കോടിസതസഹസ്സാനം, ധമ്മാഭിസമയോ അഹു.

൪. തതോ പരമ്പി വസ്സന്തേ, തപ്പയന്തേ ച പാണിനേ;

സത്തതിംസസതസഹസ്സാനം, ദുതിയാഭിസമയോ അഹു.

൫. യമ്ഹി കാലേ മഹാവീരോ, ആനന്ദം ഉപസങ്കമി;

പിതുസന്തികം ഉപഗന്ത്വാ, ആഹനീ അമതദുന്ദുഭിം.

൬. ആഹതേ അമതഭേരിമ്ഹി, വസ്സന്തേ ധമ്മവുട്ഠിയാ;

പഞ്ഞാസസതസഹസ്സാനം, തതിയാഭിസമയോ അഹു.

൭. ഓവാദകോ വിഞ്ഞാപകോ, താരകോ സബ്ബപാണിനം;

ദേസനാകുസലോ ബുദ്ധോ, താരേസി ജനതം ബഹും.

൮. സന്നിപാതാ തയോ ആസും, പദുമുത്തരസ്സ സത്ഥുനോ;

കോടിസതസഹസ്സാനം, പഠമോ ആസി സമാഗമോ.

൯. യദാ ബുദ്ധോ അസമസമോ, വസി വേഭാരപബ്ബതേ;

നവുതികോടിസഹസ്സാനം, ദുതിയോ ആസി സമാഗമോ.

൧൦. പുന ചാരികം പക്കന്തേ, ഗാമനിഗമരട്ഠതോ;

അസീതികോടിസഹസ്സാനം, തതിയോ ആസി സമാഗമോ.

൧൧. അഹം തേന സമയേന, ജടിലോ നാമ രട്ഠികോ;

സമ്ബുദ്ധപ്പമുഖം സങ്ഘം, സഭത്തം ദുസ്സമദാസഹം.

൧൨. സോപി മം ബുദ്ധോ ബ്യാകാസി, സങ്ഘമജ്ഝേ നിസീദിയ;

‘‘സതസഹസ്സിതോ കപ്പേ, അയം ബുദ്ധോ ഭവിസ്സതി.

൧൩. ‘‘പധാനം പദഹിത്വാന…പേ… ഹേസ്സാമ സമ്മുഖാ ഇമം’’.

൧൪. തസ്സാപി വചനം സുത്വാ, ഉത്തരിം വതമധിട്ഠഹിം;

അകാസിം ഉഗ്ഗദള്ഹം ധിതിം, ദസപാരമിപൂരിയാ.

൧൫. ബ്യാഹതാ തിത്ഥിയാ സബ്ബേ, വിമനാ ദുമ്മനാ തദാ;

ന തേസം കേചി പരിചരന്തി, രട്ഠതോ നിച്ഛുഭന്തി തേ.

൧൬. സബ്ബേ തത്ഥ സമാഗന്ത്വാ, ഉപഗച്ഛും ബുദ്ധസന്തികേ;

തുവം നാഥോ മഹാവീര, സരണം ഹോഹി ചക്ഖുമ.

൧൭. അനുകമ്പകോ കാരുണികോ, ഹിതേസീ സബ്ബപാണിനം;

സമ്പത്തേ തിത്ഥിയേ സബ്ബേ, പഞ്ചസീലേ പതിട്ഠപി.

൧൮. ഏവം നിരാകുലം ആസി, സുഞ്ഞതം തിത്ഥിയേഹി തം;

വിചിത്തം അരഹന്തേഹി, വസീഭൂതേഹി താദിഹി.

൧൯. നഗരം ഹംസവതീ നാമ, ആനന്ദോ നാമ ഖത്തിയോ;

സുജാതാ നാമ ജനികാ, പദുമുത്തരസ്സ സത്ഥുനോ.

൨൦. ദസവസ്സസഹസ്സാനി, അഗാരം അജ്ഝ സോ വസി;

നരവാഹനോ യസോ വസവത്തീ [നാരിവാഹനോ യസവതീ (സ്യാ. കം.)], തയോ പാസാദമുത്തമാ.

൨൧. തിചത്താരീസസഹസ്സാനി, നാരിയോ സമലങ്കതാ;

വസുദത്താ നാമ നാരീ, ഉത്തമോ നാമ അത്രജോ.

൨൨. നിമിത്തേ ചതുരോ ദിസ്വാ, പാസാദേനാഭിനിക്ഖമി;

സത്താഹം പധാനചാരം, അചരീ പുരിസുത്തമോ.

൨൩. ബ്രഹ്മുനാ യാചിതോ സന്തോ, പദുമുത്തരോ വിനായകോ;

വത്തി ചക്കം മഹാവീരോ, മിഥിലുയ്യാനമുത്തമേ.

൨൪. ദേവലോ ച സുജാതോ ച, അഹേസും അഗ്ഗസാവകാ;

സുമനോ നാമുപട്ഠാകോ, പദുമുത്തരസ്സ മഹേസിനോ.

൨൫. അമിതാ ച അസമാ ച, അഹേസും അഗ്ഗസാവികാ;

ബോധി തസ്സ ഭഗവതോ, സലലോതി പവുച്ചതി.

൨൬. വിതിണ്ണോ ചേവ [അമിതോ ചേവ (സ്യാ.)] തിസ്സോ ച, അഹേസും അഗ്ഗുപട്ഠകാ;

ഹട്ഠാ ചേവ വിചിത്താ ച, അഹേസും അഗ്ഗുപട്ഠികാ.

൨൭. അട്ഠപണ്ണാസരതനം, അച്ചുഗ്ഗതോ മഹാമുനി;

കഞ്ചനഗ്ഘിയസങ്കാസോ, ദ്വത്തിംസവരലക്ഖണോ.

൨൮. കുട്ടാ കവാടാ ഭിത്തീ ച, രുക്ഖാ നഗസിലുച്ചയാ;

ന തസ്സാവരണം അത്ഥി, സമന്താ ദ്വാദസയോജനേ.

൨൯. വസ്സസതസഹസ്സാനി, ആയു വിജ്ജതി താവദേ;

താവതാ തിട്ഠമാനോ സോ, താരേസി ജനതം ബഹും.

൩൦. സന്താരേത്വാ ബഹുജനം, ഛിന്ദിത്വാ സബ്ബസംസയം;

ജലിത്വാ അഗ്ഗിക്ഖന്ധോവ നിബ്ബുതോ സോ സസാവകോ.

൩൧. പദുമുത്തരോ ജിനോ ബുദ്ധോ, നന്ദാരാമമ്ഹി നിബ്ബുതോ;

തത്ഥേവസ്സ ഥൂപവരോ, ദ്വാദസുബ്ബേധയോജനോതി.

പദുമുത്തരസ്സ ഭഗവതോ വംസോ ദസമോ.