൧൦. പദുമബുദ്ധവംസോ

൧. അനോമദസ്സിസ്സ അപരേന, സമ്ബുദ്ധോ ദ്വിപദുത്തമോ;

പദുമോ നാമ നാമേന, അസമോ അപ്പടിപുഗ്ഗലോ.

൨. തസ്സാപി അസമം സീലം, സമാധിപി അനന്തകോ;

അസങ്ഖേയ്യം ഞാണവരം, വിമുത്തിപി അനൂപമാ.

൩. തസ്സാപി അതുലതേജസ്സ, ധമ്മചക്കപ്പവത്തനേ;

അഭിസമയാ തയോ ആസും, മഹാതമപവാഹനാ.

൪. പഠമാഭിസമയേ ബുദ്ധോ, കോടിസതമബോധയി;

ദുതിയാഭിസമയേ ധീരോ, നവുതികോടിമബോധയി.

൫. യദാ ച പദുമോ ബുദ്ധോ, ഓവദീ സകമത്രജം;

തദാ അസീതികോടീനം, തതിയാഭിസമയോ അഹു.

൬. സന്നിപാതാ തയോ ആസും, പദുമസ്സ മഹേസിനോ;

കോടിസതസഹസ്സാനം, പഠമോ ആസി സമാഗമോ.

൭. കഥിനത്ഥാരസമയേ, ഉപ്പന്നേ കഥിനചീവരേ;

ധമ്മസേനാപതിത്ഥായ, ഭിക്ഖൂ സിബ്ബിംസു [യാചിംസു (ക.)] ചീവരം.

൮. തദാ തേ വിമലാ ഭിക്ഖൂ, ഛളഭിഞ്ഞാ മഹിദ്ധികാ;

തീണി സതസഹസ്സാനി, സമിംസു അപരാജിതാ.

൯. പുനാപരം സോ നരാസഭോ [നരവുസഭോ (സ്യാ. കം.)], പവനേ വാസം ഉപാഗമി;

തദാ സമാഗമോ ആസി, ദ്വിന്നം സതസഹസ്സിനം.

൧൦. അഹം തേന സമയേന, സീഹോ ആസിം മിഗാധിഭൂ;

വിവേകമനുബ്രൂഹന്തം, പവനേ അദ്ദസം ജിനം.

൧൧. വന്ദിത്വാ സിരസാ പാദേ, കത്വാന തം പദക്ഖിണം;

തിക്ഖത്തും അഭിനാദിത്വാ, സത്താഹം ജിനമുപട്ഠഹം.

൧൨. സത്താഹം വരസമാപത്തിയാ, വുട്ഠഹിത്വാ തഥാഗതോ;

മനസാ ചിന്തയിത്വാന, കോടിഭിക്ഖൂ സമാനയി.

൧൩. തദാപി സോ മഹാവീരോ, തേസം മജ്ഝേ വിയാകരി;

‘‘അപരിമേയ്യിതോ കപ്പേ, അയം ബുദ്ധോ ഭവിസ്സതി.

൧൪. ‘‘പധാനം പദഹിത്വാന…പേ… ഹേസ്സാമ സമ്മുഖാ ഇമം’’.

൧൫. തസ്സാപി വചനം സുത്വാ, ഭിയ്യോ ചിത്തം പസാദയിം;

ഉത്തരിം വതമധിട്ഠാസിം, ദസപാരമിപൂരിയാ.

൧൬. ചമ്പകം നാമ നഗരം, അസമോ നാമ ഖത്തിയോ;

അസമാ നാമ ജനികാ, പദുമസ്സ മഹേസിനോ.

൧൭. ദസവസ്സസഹസ്സാനി, അഗാരം അജ്ഝ സോ വസി;

നന്ദാവസുയസുത്തരാ, തയോ പാസാദമുത്തമാ.

൧൮. തേത്തിംസ ച സഹസ്സാനി, നാരിയോ സമലങ്കതാ;

ഉത്തരാ നാമ സാ നാരീ, രമ്മോ നാമാസി അത്രജോ.

൧൯. നിമിത്തേ ചതുരോ ദിസ്വാ, രഥയാനേന നിക്ഖമി;

അനൂനഅട്ഠമാസാനി, പധാനം പദഹീ ജിനോ.

൨൦. ബ്രഹ്മുനാ യാചിതോ സന്തോ, പദുമോ ലോകനായകോ;

വത്തി ചക്കം മഹാവീരോ, ധനഞ്ചുയ്യാനമുത്തമേ.

൨൧. സാലോ ച ഉപസാലോ ച, അഹേസും അഗ്ഗസാവകാ;

വരുണോ നാമുപട്ഠാകോ, പദുമസ്സ മഹേസിനോ.

൨൨. രാധാ ചേവ സുരാധാ ച, അഹേസും അഗ്ഗസാവികാ;

ബോധി തസ്സ ഭഗവതോ, മഹാസോണോതി വുച്ചതി.

൨൩. ഭിയ്യോ ചേവ അസമോ ച, അഹേസും അഗ്ഗുപട്ഠകാ;

രുചീ ച നന്ദരാമാ ച, അഹേസും അഗ്ഗുപട്ഠികാ.

൨൪. അട്ഠപണ്ണാസരതനം, അച്ചുഗ്ഗതോ മഹാമുനി;

പഭാ നിദ്ധാവതീ തസ്സ, അസമാ സബ്ബസോ ദിസാ.

൨൫. ചന്ദപ്പഭാ സൂരിയപ്പഭാ, രതനഗ്ഗിമണിപ്പഭാ;

സബ്ബാപി താ ഹതാ ഹോന്തി, പത്വാ ജിനപഭുത്തമം.

൨൬. വസ്സസതസഹസ്സാനി, ആയു വിജ്ജതി താവദേ;

താവതാ തിട്ഠമാനോ സോ, താരേസി ജനതം ബഹും.

൨൭. പരിപക്കമാനസേ സത്തേ, ബോധയിത്വാ അസേസതോ;

സേസകേ അനുസാസിത്വാ, നിബ്ബുതോ സോ സസാവകോ.

൨൮. ഉരഗോവ തചം ജിണ്ണം, വദ്ധപത്തംവ പാദപോ;

ജഹിത്വാ സബ്ബസങ്ഖാരേ, നിബ്ബുതോ സോ യഥാ സിഖീ.

൨൯. പദുമോ ജിനവരോ സത്ഥാ, ധമ്മാരാമമ്ഹി നിബ്ബുതോ;

ധാതുവിത്ഥാരികം ആസി, തേസു തേസു പദേസതോതി.

പദുമസ്സ ഭഗവതോ വംസോ അട്ഠമോ.