൮. ഉത്തിയത്ഥേരഅപദാനം

൧൬൯. ‘‘ചന്ദഭാഗാനദീതീരേ, സുസുമാരോ അഹം തദാ;

സഗോചരപ്പസുതോഹം [സഭോജനപസുതാഹം (സ്യാ. ക.)], നദീതിത്ഥം അഗച്ഛഹം.

൧൭൦. ‘‘സിദ്ധത്ഥോ തമ്ഹി സമയേ, സയമ്ഭൂ അഗ്ഗപുഗ്ഗലോ;

നദിം തരിതുകാമോ സോ, നദീതിത്ഥം ഉപാഗമി.

൧൭൧. ‘‘ഉപാഗതേ ച [ഉപാഗതമ്ഹി (സ്യാ. ക.)] സമ്ബുദ്ധേ, അഹമ്പി തത്ഥുപാഗമിം;

ഉപഗന്ത്വാന സമ്ബുദ്ധം, ഇമം വാചം ഉദീരയിം.

൧൭൨. ‘‘‘അഭിരൂഹ മഹാവീര, താരേസ്സാമി അഹം തുവം;

പേത്തികം വിസയം മയ്ഹം, അനുകമ്പ മഹാമുനി’.

൧൭൩. ‘‘മമ ഉഗ്ഗജ്ജനം സുത്വാ, അഭിരൂഹി മഹാമുനി;

ഹട്ഠോ ഹട്ഠേന ചിത്തേന, താരേസിം ലോകനായകം.

൧൭൪. ‘‘നദിയാ പാരിമേ തീരേ, സിദ്ധത്ഥോ ലോകനായകോ;

അസ്സാസേസി മമം തത്ഥ, അമതം പാപുണിസ്സസി.

൧൭൫. ‘‘തമ്ഹാ കായാ ചവിത്വാന, ദേവലോകം ആഗച്ഛഹം;

ദിബ്ബസുഖം അനുഭവിം, അച്ഛരാഹി പുരക്ഖതോ.

൧൭൬. ‘‘സത്തക്ഖത്തുഞ്ച ദേവിന്ദോ, ദേവരജ്ജമകാസഹം;

തീണിക്ഖത്തും ചക്കവത്തീ, മഹിയാ ഇസ്സരോ അഹും.

൧൭൭. ‘‘വിവേകമനുയുത്തോഹം, നിപകോ ച സുസംവുതോ;

ധാരേമി അന്തിമം ദേഹം, സമ്മാസമ്ബുദ്ധസാസനേ.

൧൭൮. ‘‘ചതുന്നവുതിതോ കപ്പേ, താരേസിം യം നരാസഭം;

ദുഗ്ഗതിം നാഭിജാനാമി, തരണായ ഇദം ഫലം.

൧൭൯. ‘‘പടിസമ്ഭിദാ ചതസ്സോ, വിമോക്ഖാപി ച അട്ഠിമേ;

ഛളഭിഞ്ഞാ സച്ഛികതാ, കതം ബുദ്ധസ്സ സാസനം’’.

ഇത്ഥം സുദം ആയസ്മാ ഉത്തിയോ [ഉത്തിരിയോ (സീ.)] ഥേരോ ഇമാ ഗാഥായോ അഭാസിത്ഥാതി.

ഉത്തിയത്ഥേരസ്സാപദാനം അട്ഠമം.